ନୂଆଦିଲ୍ଲୀ,୨୪।୮: ଅନ୍ତର୍ଜାତୀୟ କ୍ରିକେଟ ପରିଷଦ (ICC) ଭାରତୀୟ କ୍ରିକେଟ ଦଳର ଷ୍ଟାର ଓପନିଂ ବ୍ୟାଟ୍ସମ୍ୟାନ ଯଶସ୍ବୀ ଜୟସ୍ବାଲଙ୍କୁ ଏକ ଝଗଡ଼ା ପାଇଁ ଦଣ୍ଡିତ କରିଛି। ଶ୍ରୀଲଙ୍କା ବୋଲର ଅସୀଥା ଫର୍ନାଣ୍ଡୋ ମଧ୍ୟ ଜୟସ୍ବାଲଙ୍କ ସହିତ କାର୍ଯ୍ୟାନୁଷ୍ଠାନର ସମ୍ମୁଖୀନ ହୋଇଛନ୍ତି। ICC କହିଛି ଯେ, କଲମ୍ବୋରେ ଭାରତ-ଶ୍ରୀଲଙ୍କା ଟେଷ୍ଟର ପ୍ରଥମ ଦିନରେ ଘଟିଥିବା ଏକ ଘଟଣା ପରେ ଉଭୟ ଖେଳାଳିଙ୍କୁ ସେମାନଙ୍କ ମ୍ୟାଚ ଫିର ୨୫ ପ୍ରତିଶତ ଜରିମାନା କରାଯାଇଛି। ଏହା ସହିତ ଉଭୟ ଖେଳାଳିଙ୍କୁ ଗୋଟିଏ ଲେଖାଏ ଡିମେରିଟ ପଏଣ୍ଟ ଦିଆଯାଇଛି।
ରବିବାରଠାରୁ ଆରମ୍ଭ ହୋଇଥିବା ମ୍ୟାଚ ସମୟରେ, ବ୍ୟାଟ୍ସମ୍ୟାନ ୪୫ ରନ କରି ଆଉଟ ହେବା ପରେ ଶ୍ରୀଲଙ୍କା ବୋଲର ଜୟସ୍ବାଲଙ୍କୁ ‘ସେଣ୍ଡ-ଅଫ’ ଦେଇଥିଲେ। ଏହା ଉଭୟଙ୍କ ମଧ୍ୟରେ ଯୁକ୍ତିତର୍କ ଏବଂ ସାମାନ୍ୟ ଶାରୀରିକ ସଂଘର୍ଷର କାରଣ ହୋଇଥିଲା। ଘଟଣା ପରଠାରୁ, ଖେଳାଳିମାନଙ୍କ ପାଇଁ ସମ୍ଭାବ୍ୟ ଜରିମାନା କିମ୍ବା ବାସନ୍ଦ ବିଷୟରେ କଳ୍ପନାଜଳ୍ପନା କରାଯାଉଥିଲା। କିଛି ରିପୋର୍ଟରେ ଜୟସ୍ବାଲଙ୍କୁ ଜୀବନବ୍ୟାପୀ ବାସନ୍ଦର ସମ୍ମୁଖୀନ ହେବାକୁ ପଡ଼ିପାରେ ବୋଲି ମଧ୍ୟ ଦାବି କରାଯାଇଥିଲା।
ICC ସ୍ପଷ୍ଟ କରିଛି ଯେ, କୌଣସି ଖେଳାଳିଙ୍କୁ ଜୀବନବ୍ୟାପୀ ବାସନ୍ଦ କରାଯାଇନାହିଁ। ସେମାନଙ୍କ ମ୍ୟାଚ ଫିରୁ କେବଳ ୨୫% କଟାଯିବ। ଉଭୟ ଖେଳାଳି ICC ଆଚରଣ ସଂହିତାର ଧାରା 2.12 ଉଲ୍ଲଂଘନ କରିଥିବା ଜଣାପଡିଛି।
ଏହା ଗତ ୨୪ ମାସ ମଧ୍ୟରେ ଉଭୟ ଖେଳାଳିଙ୍କ ପାଇଁ ପ୍ରଥମ ଅପରାଧ। ଉଭୟ ଖେଳାଳି ଅପରାଧ ସ୍ବୀକାର କରିଛନ୍ତି ଏବଂ ମ୍ୟାଚ ରେଫରି ଆଣ୍ଡି ପାଇକ୍ରଫ୍ଟଙ୍କ ଦ୍ୱାରା ଲାଗୁ କରାଯାଇଥିବା ଦଣ୍ଡକୁ ଗ୍ରହଣ କରିଛନ୍ତି, ଯାହା ଫଳରେ ଆନୁଷ୍ଠାନିକ ଶୁଣାଣିର ଆବଶ୍ୟକତାକୁ ଦୂର କରାଯାଇଛି।
ଟସ ଜିତି ବ୍ୟାଟିଂ ନିଷ୍ପତ୍ତି ନେବା ପରେ, ପ୍ରଥମ ଦିନ ଶେଷ ସୁଦ୍ଧା ଟିମ ଇଣ୍ଡିଆ ୫ ଉଇକେଟ ହରାଇ ୩୦୦ ରନ ସଂଗ୍ରହ କରିଥିଲା। ଦ୍ୱିତୀୟ ଦିନରେ ଖେଳ ପୁଣି ଆରମ୍ଭ ହୋଇଥିଲା ଏବଂ ଟିମ ଇଣ୍ଡିଆର ସ୍କୋର ଆହୁରି ବଢ଼ିଥିଲା। ବର୍ଷା ଯୋଗୁ ଦ୍ୱିତୀୟ ଦିନ ଖେଳ ବନ୍ଦ ରହିଛି। ଟିମ ଇଣ୍ଡିଆର ସ୍କୋର ୮ ଉଇକେଟ ହରାଇ ୪୭୫ ରନରେ ପହଞ୍ଚିଛି।