ରାଞ୍ଚି,୨।୩: ଝାଡ଼ଖଣ୍ଡ ରାଜ୍ୟ ଗୃହ ବୋର୍ଡ ରାଞ୍ଚିର ହାର୍ମୁ ଅଞ୍ଚଳରେ ତାଙ୍କ ବାସସ୍ଥାନ ପାଇଁ ଆବଣ୍ଟିତ ଜମିର ବାଣିଜି୍ୟକ ବ୍ୟବହାର ସମ୍ପର୍କରେ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କୁ ନୋଟିସ ଜାରି କରିଛି। ବୋର୍ଡ କହିଛି ଯେ, ପ୍ଲଟ କେବଳ ଆବାସିକ ଉଦ୍ଦେଶ୍ୟରେ ଏମଏସ ଧୋନୀଙ୍କୁ ଆବଣ୍ଟିତ କରାଯାଇଥିଲା, କିନ୍ତୁ ନିୟମ ଉଲ୍ଲଂଘନ କରି ସେଠାରେ ବ୍ୟବସାୟିକ କାର୍ଯ୍ୟକଳାପ କରାଯାଉଛି।
ଝାଡ଼ଖଣ୍ଡ ରାଜ୍ୟ ଗୃହ ବୋର୍ଡର ନୋଟିସରେ ସ୍ପଷ୍ଟ ଭାବରେ ଉଲ୍ଲେଖ ଅଛି ଯେ, ଏମଏସ ଧୋନୀଙ୍କୁ ୧୫ ଦିନ ମଧ୍ୟରେ ତାଙ୍କର ପକ୍ଷ ଉପସ୍ଥାପନ କରିବାକୁ ପଡିବ। ଯଦି ସନ୍ତୋଷଜନକ ଉତ୍ତର ନ ମିଳେ, ତେବେ ବୋର୍ଡ ପ୍ଲଟ H-(10)A ର ଆବଣ୍ଟନ ବାତିଲ କରିବାକୁ ସୁପାରିଶ କରିପାରେ। ଝାଡ଼ଖଣ୍ଡ ସରକାରଙ୍କ ସୁପାରିଶରେ ଝାଡ଼ଖଣ୍ଡ ରାଜ୍ୟ ଗୃହ ବୋର୍ଡ ଦ୍ୱାରା ୨୦୦୯ ମସିହାରେ ଧୋନୀଙ୍କୁ ଆବାସିକ ବ୍ୟବହାର ପାଇଁ ଏହି ପ୍ଲଟ ଆବଣ୍ଟିତ କରାଯାଇଥିଲା। ବୋର୍ଡ ଅଧ୍ୟକ୍ଷ ସଞ୍ଜୟ ଲାଲ ପାସୱାନ ଏହି ମାମଲାର ତଦନ୍ତ ପରେ ନିଆଯାଇଥିବା କାର୍ଯ୍ୟାନୁଷ୍ଠାନକୁ ନିଶ୍ଚିତ କରିଛନ୍ତି। ସମାନ ଉଲ୍ଲଂଘନ ପାଇଁ ଅନ୍ୟ ଅନେକ ବ୍ୟକ୍ତିଙ୍କୁ ମଧ୍ୟ ନୋଟିସ ଜାରି କରାଯାଇଛି।
ଏମଏସ ଧୋନୀଙ୍କ ହାର୍ମୁ ବାସଭବନରେ ଏକ ଡାଇଗ୍ନୋଷ୍ଟିକ ସେଣ୍ଟର (ନିବର୍ଗ ପଲ୍ସ ଡାଇଗ୍ନୋଷ୍ଟିକ୍ସ)ର କାର୍ଯ୍ୟକୁ ବିବାଦର ଏକ ପ୍ରମୁଖ ଉତ୍ସ ଭାବରେ ଦର୍ଶାଯାଉଛି। ଏହି ବାସଭବନ କ୍ରିକେଟ ପ୍ରଶଂସକଙ୍କ ପାଇଁ ବହୁତ ସ୍ବତନ୍ତ୍ର, କାରଣ ଏହା ଧୋନୀଙ୍କ ପୂର୍ବ ଘର ଥିଲା। ଏହି ଘରର କାନ୍ଥରେ ତାଙ୍କର ନାମ ‘ଧୋନୀ, ତାଙ୍କର ଜର୍ସି ନମ୍ବର ୭, ତାଙ୍କର ହେଲିକପ୍ଟର ସଟ ଏବଂ ତାଙ୍କର ଉଇକେଟକିପିଂ ଆକ୍ସନ ରହିଛି। ଧୋନୀ ବର୍ତ୍ତମାନ ରାଞ୍ଚିର ସିମାଲିଆ ରିଙ୍ଗ ରୋଡରେ ଅବସ୍ଥିତ ତାଙ୍କର ବିସ୍ତୃତ ଫାର୍ମହାଉସ, କୈଳାସପଟ୍ଟିରେ ତାଙ୍କ ପରିବାର ସହିତ ରୁହନ୍ତି। ହାର୍ମୁ ବାସଭବନ ବର୍ତ୍ତମାନ ତାଙ୍କର ପୂର୍ବ ବାସଭବନ ଭାବରେ ଜଣାଶୁଣା।
ଧୋନୀ ଖୁବ ଶୀଘ୍ର ଆଇପିଏଲ ୨୦୨୬ରେ ଖେଳିବାର ନଜର ଆସିବେ। ସେ ବହୁ ବର୍ଷ ଧରି ଚେନ୍ନାଇ ସୁପର କିଙ୍ଗସ ଦଳର ଅଂଶ ଅଛନ୍ତି। ଏହା ଧୋନୀଙ୍କର ୪୪ ବର୍ଷ ବୟସରେ ଶେଷ IPL ସିଜିନ ହୋଇପାରେ। ଯଦିଓ ସେ ୨୦୨୦ ମସିହାରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ, ତଥାପି ସେ IPLର ଏକ ଅଂଶ ଅଟନ୍ତି।
Dharitri – Odisha’s No.1 Odia Daily
