ନୂଆଦିଲ୍ଲୀ,୨୫।୭: ସବୁ କଳ୍ପନା ଜଳ୍ପନାର ଅନ୍ତ ଘଟାଇ ଶେଷରେ ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେଲେ ଧର୍ମେନ୍ଦ୍ର ପ୍ରଧାନ। Gen-Z ଆଗରେ ନଇଁଲେ କେନ୍ଦ୍ରମନ୍ତ୍ରୀ। ଯୁବପିଢ଼ିଙ୍କ ଆକାଂକ୍ଷାକୁ ସମ୍ମାନ ଦେଇ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେଇଥିବା କହିଛନ୍ତି।
ଏହା ଉଲ୍ଲେଖଯୋଗ୍ୟ ଯେ, ଧର୍ମେନ୍ଦ୍ର ପ୍ରଧାନଙ୍କ ଏହି ଇସ୍ତଫା ପଛରେ ଦେଶବ୍ୟାପୀ ଛାତ୍ର ଆନ୍ଦୋଳନର ଚାପ ରହିଛି। ତେବେ NEET ଓ UG ପେପର ଲିକକୁ ବିରୋଧ କରି ଜୁନ ୨୦ରୁ ଦିଲ୍ଲୀର ଜନ୍ତରମନ୍ତରରେ କକ୍ରୋଚ ଜନତା ପାର୍ଟି (ସିଜେପି) ପକ୍ଷରୁ ଆନ୍ଦୋଳନ ଆରମ୍ଭ କରାଯାଇଥିବା ବେଳେ ଜୁନ ୨୮ରେ ସୋନମ ଓ୍ବାଙ୍ଗଚକଙ୍କ ପକ୍ଷରୁ ଆମରଣ ଅନଶନ କରାଯାଇଥିଲା। ସୋନମଙ୍କ ସ୍ବାସ୍ଥ୍ୟବସ୍ଥା ଖରାପ ହେବା ପରେ ସେ ହସ୍ପିଟାଲରେ ଭର୍ତ୍ତି ହୋଇଥିଲେ। ଏହାପରେ ଜୁଲାଇ ୧୮ରେ ସିଜେପି ମୁଖ୍ୟ ଅଭିଜିତ ଦୀପକେ ଆମରଣ ଅନଶନରେ ବସିଥିଲେ। ଶେଷରେ ଜୁଲାଇ ୨୩ ରାତିରେ ଓ୍ବାଙ୍ଗଚୁକ ତାଙ୍କର ଅନଶନ ଭାଙ୍ଗିଥିଲେ। ତେବେ ସିଜେପି ଆନ୍ଦୋଳନର ୩୬ ଦିନରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେଇଛନ୍ତି। ଅନ୍ୟପଟେ ଜୁନ ୨୦ରୁ ଆରମ୍ଭ ହୋଇଥିବା ଏହି ଛାତ୍ର ଅନ୍ଦୋଳନ ଏବେ ସମଗ୍ର ଦେଶକୁ ଗ୍ରାସ ଗଲାଣି।
ସୂଚନାଯୋଗ୍ୟ, CJP ସମେତ ବିଭିନ୍ନ ବିରୋଧୀ ଦଳଗୁଡ଼ିକ ନିରନ୍ତର ଭାବରେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଦାବି କରି ଆସୁଥିଲେ। ଗୋଟିଏ ଦିନ ପୂର୍ବରୁ କେନ୍ଦ୍ର ସରକାରଙ୍କ ସହିତ ଆଲୋଚନା ସମୟରେ, CJPର ଦୁଇଟି ଦାବି ତୁରନ୍ତ ଗ୍ରହଣ କରାଯାଇଥିଲା; ତଥାପି, ଧର୍ମେନ୍ଦ୍ରଙ୍କ ଇସ୍ତଫା ଦାବି ସମ୍ପର୍କରେ ୨୪ ଘଣ୍ଟାର ସମୟସୀମା ଉଲ୍ଲେଖ କରାଯାଇଥିଲା।
