ପ୍ୟାରିସ୍,୧୬ା୪: ଆସନ୍ତା ଜୁନ ୧୧ ତାରିଖରୁ ଆରମ୍ଭ ହେବାକୁ ଯାଉଥିବା ଫିଫା ବିଶ୍ୱକପ୍ରେ ଇରାନ୍ ଖେଳିବ। ଏ ନେଇ ଫିଫା ମୁଖ୍ୟ ଜିଆନି ଇନ୍ଫାଣ୍ଟିନୋ ଗୁରୁବାର ସ୍ପଷ୍ଟ କରିଛନ୍ତି।
ଆମେରିକା, ମେକ୍ସିିକୋ ଓ କାନାଡା ମିଳିତ ଭାବେ ବିଶ୍ୱ କ୍ରୀଡ଼ାର ସବୁଠୁ ବଡ଼ ଟୁର୍ନାମେଣ୍ଟର ୨୩ତମ ସଂସ୍କରଣ ଆୟୋଜନ କରିବେ। ମଧ୍ୟପ୍ରାଚ୍ୟରେ ଚାଲିଥିବା ବିବାଦ କାରଣରୁ ଇରାନ ବିଶ୍ୱକପ୍ରେ ଭାଗନେବ କି ନାହିଁ, ସେ ନେଇ ଅନିଶ୍ଚିତତା ଦେଖାଦେଇଥିଲା। ଏପରିକି ଇରାନ ତା’ର ଗ୍ରୁପ୍ ମ୍ୟାଚ୍କୁ ଆମେରିକା ବଦଳରେ ମେକ୍ସିକୋରେ ଆୟୋଜନ କରିବା ଲାଗି ଫିଫାକୁ ଅନୁରୋଧ କରିଥିଲା, ଯାହାକୁ ପରେ ପ୍ରତ୍ୟାଖ୍ୟାନ କରାଯାଇଥିଲା। ଗ୍ରୁପ୍-ଜି’ରେ ସ୍ଥାନ ପାଇଥିବା ଏସିଆର ଟପ୍ ଫୁଟ୍ବଲ ଦଳକୁ ଆମେରିକାର ଲସ୍ ଏଞ୍ଜେଲ୍ସରେ ଦୁଇଟି ଓ ସିଆଟେଲରେ ଗୋଟିଏ ମ୍ୟାଚ୍ ଖେଳିବାର ଅଛି।
ସିଏନ୍ବିସି ଦ୍ୱାରା ଆୟୋଜିତ ଇକୋନୋମିକ୍ କନଫରେନ୍ସରେ ଇନ୍ଫାଣ୍ଟିନୋ କହିଛନ୍ତି, ଇରାନ ନିଶ୍ଚିତ ଆସୁଛି। ବିଶ୍ୱକପ୍ ବେଳକୁ ପରିସ୍ଥିତି ଶାନ୍ତିପୂର୍ଣ୍ଣ ଥିବ, ଯାହାକି ନିଶ୍ଚିତ ସାହାଯ୍ୟ କରିବ ବୋଲି ଆମେ ଆଶା କରୁଛୁ। କିନ୍ତୁ ଇରାନକୁ ଆସିବାକୁ ପଡ଼ିବ। ସେମାନେ ଦେଶବାସୀଙ୍କ ପ୍ରତିନିଧିତ୍ୱ କରନ୍ତି। ସେମାନେ ଯୋଗ୍ୟତା ହାସଲ କରିଛନ୍ତି ଏବଂ ଖେଳିବାକୁ ମଧ୍ୟ ଚାହୁଁଛନ୍ତି।