ନୂଆଦିଲ୍ଲୀ,୨୩।୯: ଦୀପାବଳିର ଆଗମନ ସମୟରେ ଉପହାର ବିନିମୟ ଏବଂ ଖର୍ଚ୍ଚର ମଜା ନେବାରେ ସମସ୍ତେ ବ୍ୟସ୍ତ। କିନ୍ତୁ ଏହି ସମୟରେ କେନ୍ଦ୍ରୀୟ ସରକାର ଏକ କଠୋର ନିଷ୍ପତ୍ତି ନେଇଛନ୍ତି। ଅର୍ଥ ମନ୍ତ୍ରଣାଳୟ ସମସ୍ତ ମନ୍ତ୍ରଣାଳୟ, ବିଭାଗ ଏବଂ ସାର୍ବଜନିକ କ୍ଷେତ୍ରର ଉପକ୍ରମ (CPSEs)ଗୁଡ଼ିକୁ ଦୀପାବଳି ସମୟରେ ଉପହାର ଉପରେ କୌଣସି ଖର୍ଚ୍ଚ କରିବାରୁ ନିଷେଧ କରିଛନ୍ତି। ଏହା ବ୍ୟତୀତ ଅନ୍ୟାନ୍ୟ ପର୍ବମାନଙ୍କରେ ମଧ୍ୟ ଏଭଳି ଖର୍ଚ୍ଚ କରାଯାଇପାରିବ ନାହିଁ।
ଅର୍ଥ ମନ୍ତ୍ରଣାଳୟର ବ୍ୟୟ ବିଭାଗ ସେପ୍ଟେମ୍ବର ୧୯, ୨୦୨୫ରେ ଏକ ଅଫିସ ମେମୋରାଣ୍ଡମ (ଓଏମ) ଜାରି କରିଥିଲେ। ଏଥିରେ ସ୍ପଷ୍ଟ ଉଲ୍ଲେଖ କରାଯାଇଛି ଯେ, ସରକାରୀ ଅଧିକାରୀ ଏବଂ କର୍ମଚାରୀମାନେ କୌଣସି ପର୍ବ ଅବସରରେ ଉପହାର କିମ୍ବା ଅନ୍ୟ ଜିନିଷ ଉପରେ ସରକାରୀ ଟଙ୍କାରୁ ଖର୍ଚ୍ଚ କରିପାରିବେ ନାହିଁ। ଏହାର ଉଦ୍ଦେଶ୍ୟ ଅଣଅତ୍ୟାବଶ୍ୟକୀୟ ଖର୍ଚ୍ଚକୁ ନିୟନ୍ତ୍ରଣ କରିବା ଏବଂ ଆର୍ଥିକ ସନ୍ତୁଳନ ବଜାୟ ରଖିବା।
ଏହି ସର୍କୁଲାରରେ ସ୍ପଷ୍ଟ କରାଯାଇଛି ଯେ କୌଣସି ମନ୍ତ୍ରଣାଳୟ କିମ୍ବା ବିଭାଗ ଦୀପାବଳି କିମ୍ବା ଅନ୍ୟାନ୍ୟ ପର୍ବପର୍ବାଣୀ ପାଇଁ ଉପହାର କ୍ରୟ କିମ୍ବା ବଣ୍ଟନ କରିବାରୁ ନିଷେଧ କରାଯିବ। ଏହି ଆଦେଶ ସଚିବ (ବ୍ୟୟ)ଙ୍କ ଦ୍ୱାରା ଅନୁମୋଦନ ଏବଂ ଯୁଗ୍ମ ସଚିବଙ୍କ ଦ୍ୱାରା ସାଇନ୍ ହୋଇଛି ଏବଂ ଏହାକୁ ତୁରନ୍ତ ପ୍ରଭାବରୁ କାର୍ଯ୍ୟକାରୀ କରାଯାଇଛି।
