ନୂଆଦିଲ୍ଲୀ,୪।୩: T୨୦ ବିଶ୍ୱକପ ୨୦୨୬ ଚାଲିଥିବା ସମୟରେ ICC ପକ୍ଷରୁ ଖେଳାଳିମାନଙ୍କର ସଦ୍ୟତମ T୨୦ ଅନ୍ତର୍ଜାତୀୟ ର଼୍ୟାଙ୍କିଙ୍ଗ ଜାରି କରାଯାଇଛି। ସେମିଫାଇନାଲରେ ପହଞ୍ଚି ସାରିଥିବା ଭାରତୀୟ ଦଳର ଚମତ୍କାର ପ୍ରଦର୍ଶନର ପ୍ରଭାବ ଏହି ର଼୍ୟାଙ୍କିଂରେ ସ୍ପଷ୍ଟ ଭାବେ ଦେଖିବାକୁ ମିଳିଛି। ବିଶେଷ କରି ସଞ୍ଜୁ ସାମସନଙ୍କ ଦମଦାର ଫର୍ମ ତାଙ୍କୁ ଏକ ବଡ଼ ସଫଳତା ଦେଇଛି। ବ୍ୟାଟରଙ୍କ ତାଲିକାରେ ସାମସନ ସବୁଠୁ ଅଧିକ ଚର୍ଚ୍ଚାରେ ରହିଛନ୍ତି। ସେ ଏକାଥରକେ ୨୫ ସ୍ଥାନ ଉପରକୁ ଉଠି ୬୫ତମ ସ୍ଥାନରୁ ସିଧାସଳଖ ୪୦ତମ ସ୍ଥାନରେ ପହଞ୍ଚିଛନ୍ତି। ସୁପର-୮ର ଶେଷ ମ୍ୟାଚରେ ୯୭ ରନର ଗୁରୁତ୍ୱପୂର୍ଣ୍ଣ ଇନିଂସ ତାଙ୍କୁ ଏହି ବଡ଼ ସଫଳତା ଦେଇଛି।
ଅଭିଷେକ ଶର୍ମା ଏବେ ମଧ୍ୟ ବିଶ୍ୱର ନମ୍ବର ୧ T୨୦ ବ୍ୟାଟର ଭାବେ ନିଜ ସ୍ଥାନ ବଜାୟ ରଖିଛନ୍ତି। ଈଶାନ କିଷାନ ଗୋଟିଏ ପାହାଚ ଉପରକୁ ଉଠି ୫ମରୁ ୪ର୍ଥ ସ୍ଥାନକୁ ଆସିଛନ୍ତି। ତିଲକ ବର୍ମା ୭ମରୁ ୬ଷ୍ଠ ସ୍ଥାନକୁ ଉନ୍ନୀତ ହୋଇଛନ୍ତି। ସୂର୍ଯ୍ୟକୁମାର ଯାଦବଙ୍କ ର଼୍ୟାଙ୍କିଂରେ ସାମାନ୍ୟ ହ୍ରାସ ଘଟିଛି, ସେ ଏବେ ୭ମ ସ୍ଥାନରେ ରହିଛନ୍ତି।
ସେହିଭଳି ବୋଲିଂ କ୍ଷେତ୍ରରେ ମଧ୍ୟ ଭାରତୀୟ ବୋଲରଙ୍କ ପ୍ରାଧାନ୍ୟ ଦେଖିବାକୁ ମିଳିଛି। ଭାରତୀୟ ଷ୍ଟାର ବୋଲରମାନେ ନିଜର ର଼୍ୟାଙ୍କିଂରେ ଉଲ୍ଲେଖନୀୟ ସ୍ଥାନ ହାସଲ କରିଛନ୍ତି। ମିଷ୍ଟ୍ରି ସ୍ପିନର ବରୁଣ ଏବେ ମଧ୍ୟ ବିଶ୍ୱର ନମ୍ବର ୧ ବୋଲର ଭାବେ ଶୀର୍ଷରେ ଅଛନ୍ତି। ଜସପ୍ରୀତ ବୁମରା ଗୋଟିଏ ସ୍ଥାନ ଉପରକୁ ଉଠି ୮ମରୁ ୭ମ ସ୍ଥାନରେ ପହଞ୍ଚିଛନ୍ତି। ଅର୍ଶଦୀପ ସିଂ ୬ ଜଣ ଖେଳାଳିଙ୍କୁ ପଛରେ ପକାଇ ୧୩ତମ ସ୍ଥାନକୁ ଆସିଛନ୍ତି।
ସୂଚନାଯୋଗ୍ୟ, ମାର୍ଚ୍ଚ ୫ ତାରିଖରେ ମୁମ୍ବାଇଠାରେ ଭାରତ ଏବଂ ଇଂଲଣ୍ଡ ମଧ୍ୟରେ ହେବାକୁ ଥିବା ହାଇଭୋଲଟେଜ ସେମିଫାଇନାଲ ପୂର୍ବରୁ ଏହି ର଼୍ୟାଙ୍କିଙ୍ଗ ଭାରତୀୟ ଦଳର ମନୋବଳକୁ ନିଶ୍ଚିତ ଭାବେ ବଢ଼ାଇବ।
