ଓ୍ବାଶିଂଟନ,୧୯।୪ : ୨୦୨୨ ପାଇଁ ଆୟକର ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ଉପରାଷ୍ଟ୍ରପତି କମଲା ହାରିସଙ୍କ ଦ୍ୱାରା ସାର୍ବଜନୀନ କରାଯାଇଛି। ଏହା ଅନୁଯାୟୀ, ୨୦୨୨ ମସିହାରେ ଆମେରିକା ରାଷ୍ଟ୍ରପତି ଏବଂ ତାଙ୍କ ପତ୍ନୀ ଜିଲ ବିଡେନଙ୍କ ମିଳିତ ଆୟ ୫ ଲକ୍ଷ ୮୦ ହଜାର ଡଲାର (୪ କୋଟି ୭୬ ଲକ୍ଷ ଟଙ୍କା) ଥିଲା, ଯାହା ୨୦୨୧ ମସିହାରେ ୬ ଲକ୍ଷ ୧୦ ହଜାର ୭୦୨ ଡଲାର (ପ୍ରାୟ ୫କୋଟି ଟଙ୍କା) ରୁ କମ ଥିଲା। । ଉଭୟ ୨୩.୮ ପ୍ରତିଶତ ହାରରେ ଏହି ଆୟ ଉପରେ ୧ ଲକ୍ଷ ୩୭ ହଜାର ୬୫୮(ପ୍ରାୟ ୧.୧୩ କୋଟି ଟଙ୍କା) ଟ୍ୟାକ୍ସ ପ୍ରଦାନ କରିଛନ୍ତି। କେବଳ ଏତିକି ନୁହେଁ, ତାଙ୍କର ରୋଜଗାରର ୩.୫ ପ୍ରତିଶତ ମଧ୍ୟ ୨୦ ଟି ଦାତବ୍ୟ ଅନୁଷ୍ଠାନକୁ ଦାନ କରାଯାଇଥିଲା ।
ଉଲ୍ଲେଖନୀୟ ବିଷୟ ହେଉଛି, ଆମେରିକାର ରାଷ୍ଟ୍ରପତି ଭାବରେ ଜୋ ବାଇଡେନଙ୍କ ବାର୍ଷିକ ଦରମା ହେଉଛି ୪,୦୦,୦୦୦ ଡଲାର (୩ କୋଟି ୨୮ଲକ୍ଷ ଟଙ୍କା)। ଏହା ବ୍ୟତୀତ ଆମେରିକା ସଂସଦ ତାଙ୍କୁ ୫୦,୦୦୦ ଡଲାର (୪୧ ଲକ୍ଷ ଟଙ୍କା) ପର୍ଯ୍ୟନ୍ତ ବ୍ୟୟ ଭତ୍ତା ମଧ୍ୟ ପ୍ରଦାନ କରିଥାଏ। ଉତ୍ତର ଭର୍ଜିନିଆ କମ୍ୟୁନିଟି କଲେଜରେ କାର୍ଯ୍ୟ କରୁଥିବା ତାଙ୍କ ପତ୍ନୀ ଜିଲ ବାଇଡେନ ୨୦୨୨ ମସିହାରେ ୮୨ ହଜାର ୩୩୫ ଡଲାର (ପ୍ରାୟ ୬୭ ଲକ୍ଷ ୫୯ ହଜାର ଟଙ୍କା) ରୋଜଗାର କରିଥିଲେ। ଏହା ବ୍ୟତୀତ ଏହି ଦମ୍ପତି ବିନିଯୋଗ ସୁଧ, ପେନ୍ସନ ଏବଂ ଅନ୍ୟାନ୍ୟ ଜିନିଷରୁ ମଧ୍ୟ ଟଙ୍କା ପାଇଆନ୍ତି। ୨୦୨୨ ମସିହାରେ ଉଭୟ ମୋଟ ଆୟ ୫,୭୯,୫୧୪ ଡଲାର ଦେଖାଇଛନ୍ତି ।
ଅନ୍ୟପକ୍ଷରେ, ଆମେରିକାର ଉପରାଷ୍ଟ୍ରପତି କମଲା ହାରିସ ଏବଂ ତାଙ୍କ ସ୍ବାମୀ ଡଗ ଏମହୋମଙ୍କ ୨୦୨୨ ଆୟକର ମଧ୍ୟ ସାର୍ବଜନୀନ କରାଯାଇଛି। ଉଭୟଙ୍କ ଅଂଶୀଦାରୀ ଆୟକୁ ୪ ଲକ୍ଷ ୫୬ ହଜାର ୯୧୮ (୩ କୋଟି ୭୫ ଲକ୍ଷ ଟଙ୍କା) ଭାବରେ ଦର୍ଶାଯାଇଛି। ଉଭୟ ୨୦.୩ ପ୍ରତିଶତ ହାରରେ ଆୟକର ହିସାବରେ ୯୩ ହଜାର ୫୭୦ ଡଲାର (ପ୍ରାୟ ୭୬ ଲକ୍ଷ ୮୧ ହଜାର ଟଙ୍କା) ପ୍ରଦାନ କରିଛନ୍ତି ।
ଆମେରିକାର ଉପରାଷ୍ଟ୍ରପତି ଭାବେ କମଲା ହାରିସଙ୍କ ରୋଜଗାର ହେଉଛି ୨ ଲକ୍ଷ ୧୯ ହଜାର ୧୭୧ (୧ କୋଟି ୭୯ ଲକ୍ଷ ଟଙ୍କା)। ଏହା ବ୍ୟତୀତ ସେ ତାଙ୍କ ପୁସ୍ତକ ବିକ୍ରୟ ମାଧ୍ୟମରେ ୬୨ ହଜାର ୮୭୦ ଡଲାର (୫୧ ଲକ୍ଷ ୬୧ ହଜାର ଟଙ୍କା) ଆୟ ଦେଖାଇଛନ୍ତି। ଅନ୍ୟପକ୍ଷରେ, ଜର୍ଜେଟାଉନ ୟୁନିଭରସିଟି ଆଇନ କେନ୍ଦ୍ରରେ ଶିକ୍ଷାଦାନ କରୁଥିବା ତାଙ୍କ ସ୍ବାମୀ ଡଗ ଏମହୋମ ତାଙ୍କର ବେତନ ୧,୬୯,୬୬୫ ଡଲାର୍ (ପ୍ରାୟ ୧ କୋଟି ୩୯ ଲକ୍ଷ) ଦର୍ଶାଇଛନ୍ତି। ଏହି ଦମ୍ପତି ରୋଜଗାରର ପାଞ୍ଚ ପ୍ରତିଶତ ଦାତବ୍ୟ ଅନୁଷ୍ଠାନକୁ ଦାନ କରିଛନ୍ତି।
