ପାଟଣା ,୩୦।୧୦(ବୀର କିଶୋର ଦାଶ): କେନ୍ଦୁଝର ଜିଲା ପାଟଣା ଥାନା ଦେଇ ଯାଇଥିବା ୨୨୦ ନମ୍ବର ଜାତୀୟ ରାଜପଥର ସାହାରପଡା ଦେଓ ନଦୀ ପୋଲ ଉପରୁ ଏକ ଗଞ୍ଜେଇ ଭର୍ତ୍ତି କାର୍ ଜବତ ହୋଇଛି। ଭୁବନେଶ୍ୱର ନାର୍କୋଟିକ କରଞ୍ଜିଆ ଅବକାରୀ ବିଭାଗ ସହାୟତାରେ ଧରିବା ସହ ଗାଡିକୁ ଜବତ କରି ଗାଡି ଭିତରୁ ଏକ କ୍ୱିଣ୍ଟାଲ ୭୧ କେଜି ଗଞ୍ଜେଇ ଜବତ କରିଛି । ଏଥି ସହ ଗାଡିର ଡ୍ରାଇଭରଙ୍କୁ ଗିରଫ କରିଥିବା ବେଳେ ଅନ୍ୟ ଦୁଇଜଣ ମାଫିଆ ଫେରାର୍ ହୋଇ ଯିବାରେ ସଫଳ ହୋଇଛନ୍ତି। ଉଭୟ ପୋଲିସ ଓ ଅବକାରୀ ବିଭାଗକୁ ଚକମା ଦେଇ କାର୍ ନମ୍ବର ପ୍ଲେଟରେ ନ୍ୟାଶନାଲ ହ୍ୟୁମାନରାଇଟସ ଏବଂ ଛେଣ୍ଡିପଦା ବ୍ଲକ ଟିମ ଅଫିସର ଲେଖି ଗତକାଲି ଅନୁଗୋଳରୁ ଜାମସେଦପୁରକୁ କାର୍ ଯୋଗେ ମାଫିଆମାନେ ଗଞ୍ଜେଇ ଚାଲାଣ କରୁଥିଲେ। ଏହି ସମୟରେ ନାର୍କୋଟିକ ଟିମ କୌଣସି ସୂତ୍ରରୁ ଖବରପାଇ ଗାଡିର ପିଛା କରିଥିଲା। ମାଫିଆମାନେ ପିଛା କରୁଥିବା ଜାଣି ଗାଡିକୁ କରଞ୍ଜିଆ ଦେଇ ସାହାରପଡା ଆଡ଼କୁ ନେଇ ପଳାଉଥିବା ସମୟରେ ନାର୍କୋଟିକ ଟିମ ଏବଂ କରଞ୍ଜିଆ ଅବକାରୀ ବିଭାଗ ଗୋଡ଼ାଇ ଗୋଡ଼ାଇ କାର୍କୁ ଦେଓ ନଦୀ ପୋଲ ନିକଟରେ ଜବତ କରିଥିଲେ। ଗୁରୁବାର ଡ୍ରାଇଭରକୁ କୋର୍ଟ ଚାଲାଣ କରିଥିବା ଅବକାରୀ ବିଭାଗ ସୂଚନା ଦେଇଛି। ଗିରଫ ଡ୍ରାଇଭର ଅନୁଗୋଳ ଛେଣ୍ଡିପଦା ଅଞ୍ଚଳ ଆଉଁଲି ଗ୍ରାମର ରାଜେଶ ସାହୁ (୩୫)। ଚଢାଉରେ ନାର୍କୋଟିକ ଟିମ ସହ କରଞ୍ଜିଆ ଅବକାରୀ ବିଭାଗ କର୍ମଚାରୀ ସାମିଲ ଥିଲେ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୪୦ ଲକ୍ଷ ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ମିଳିଛି। ଗିରଫ ଡ୍ରାଇଭର ପୂର୍ବରୁ ସମାନ ଢଙ୍ଗରେ ୭ ଥର ଏହି ରାସ୍ତା ଦେଇ ଗଞ୍ଜେଇ ଚାଲାଣ କରିଥିବା ଅବକାରୀ ବିଭାଗ ପକ୍ଷରୁ ସୂଚନା ମିଳିଛି ।
Dharitri – The Largest & Most Trusted Odia Daily
\
