ଭଞ୍ଜନଗର,୧୪।୯(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ପୋଲିସ ଶନିବାର ଏକ ଜୁଆ ଆଡ୍ଡା ଉପରେ ଚଢ଼ାଉ କରି ୧୦ ଜଣ ଜୁଆଡିଙ୍କୁ ଗିରଫ କରିଛି। ଏଥିସହ ସେମାନଙ୍କ ଠାରୁ ୪୭ହଜାର ୫୮୦ ଟଙ୍କା ଓ ତାସ ଜବତ କରିଛି। ଏନେଇ ଭଞ୍ଜନଗର ଥାନାରେ ୧୦୩୭/୨୫ ରେ ଏକ ମାମଲା ରୁଜୁ ହୋଇଛି।
ସୂଚନା ଯୋଗ୍ୟ ଯେ, ଗଞ୍ଜାମ ଜିଲାରେ ଦଶହରା ପୂର୍ବରୁ ଏବଂ ପରେ କୁମାର ପୂର୍ଣ୍ଣିମା, ଅମାବାସ୍ୟା ପର୍ଯ୍ୟନ୍ତ ଗାଁ ଗହଳିରେ ଜୁଆ ଖେଳ ବୃଦ୍ଧି ପାଇଥାଏ। ଏହି ସମୟରେ ଅନେକ ଲୋକ ଜୁଆ ଖେଳରେ ଟଙ୍କା ହରାଇ ମାନସିକ ଦୁଶ୍ଚିନ୍ତାରେ ରହିଥାନ୍ତି। ଏଥିସହ ଏହି ସମୟରେ ଚୋରୀ ମଧ୍ୟ ବଢ଼ିଥାଏ। ତେଣୁ ଗଞ୍ଜାମ ପୋଲିସ ପକ୍ଷରୁ ଜିଲ୍ଲାରେ ଜୁଆ ଆଡ୍ଡାକୁ ଠାବ କରି ଅଭିଯୁକ୍ତ ମାନଙ୍କୁ ଗିରଫ ପାଇଁ ଏସ ପି ଶୁଭେନ୍ଦୁ କୁମାର ପାତ୍ର ନିର୍ଦ୍ଦେଶ ଦେଇଛନ୍ତି। ଏହିଭଳି ଭଞ୍ଜନଗର ଥାନା ଅଧିକାରୀ ଜିବନାନନ୍ଦ ଜେନା ମଧ୍ୟ ଗତକାଲି ଥାନା ଅଞ୍ଚଳରେ ଚାଲୁଥିବା ଏକ ଜୁଆ ଆଡ୍ଡା ଉପରେ ଚଢ଼ାଉ କରିଥିଲେ। ଏହାର କିଛିଦିନ ପୁର୍ବରୁ ମଧ୍ୟ ପୋଲିସ ଆଉ ଏକ ଜୁଆ ଆଡ୍ଡା ଉପରେ ଚଢ଼ାଉ କରିଥିଲେ। ଭଞ୍ଜନଗର ପୋଲିସ ବାରମ୍ବାର ଜୁଆ ଆଡ୍ଡା ଉପରେ ଚଢ଼ାଉ କରୁଥିବା ଯୋଗୁଁ ଜୁଆଡି ମାନେ ଆତଙ୍କିତ ହୋଇପଡିଛନ୍ତି। ଆଗକୁ ବାରମ୍ବାର ଏହିଭଳି ଚଢାଉ କରିବା ପାଇଁ ପୋଲିସ ପକ୍ଷରୁ ଯୋଜନା ଅଛି।
