ଚଣ୍ଡିଗଡ଼,୩।୧୦: ପଞ୍ଜାବ ବିଧାନସଭାରେ କଂଗ୍ରେସ ବିଧାୟକମାନଙ୍କ କକ୍ଷତ୍ୟାଗ ସତ୍ତ୍ୱେ ଆମ୍ ଆଦ୍ମୀ ପାର୍ଟି ସରକାର ସୋମବାର ଆସ୍ଥା ଭୋଟ ଜିତିଯାଇଛନ୍ତି। ରାଜ୍ୟରେ ଭାଜପାର ଅପରେଶନ ଲୋଟସ୍ ବିଫଳ ହୋଇଥିବା ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଆସ୍ଥା ଭୋଟ ଜିତିବା ପରେ କହିଛନ୍ତି। ବିଧାନସଭାରେ ମୁଖ୍ୟମନ୍ତ୍ରୀ ଆସ୍ଥା ପ୍ରସ୍ତାବ ଆଣିଥିଲେ। ଏହା ଉପରେ ଆଲୋଚନା ବେଳେ ଏଏପି ବିଧାୟକମାନେ ଭାଜପାର ଅପରେଶନ ଲୋଟସ୍ ଅଭିଯାନକୁ କଡ଼ା ସମାଲୋଚନା କରିଥିଲେ। ରାଜ୍ୟ ସରକାରକୁ ଭାଙ୍ଗିବା ପାଇଁ ଏହି ଦଳ ଉଦ୍ୟମ କରୁଥିବା ଏବଂ ଏଥିପାଇଁ ଅନୂ୍ୟନ ୧୦ ଜଣ ବିଧାୟକଙ୍କୁ ୨୫ କୋଟି ଲେଖାଏ ଟଙ୍କା ଯଚାଯାଇଥିବା ଏଏପି ପୂର୍ବରୁ ଅଭିଯୋଗ କରିଥିଲା। ଆସ୍ଥା ପ୍ରସ୍ତାବ ଉପରେ ଆଲୋଚନା ପରେ ବାଚସ୍ପତି କୁଲତର ସିଂ ସନ୍ଧଓ୍ବାନ ଏହା ଉପରେ ମତାମତ ଲୋଡ଼ିଥିଲେ। ପ୍ରସ୍ତାବକୁ ସମର୍ଥନ କରୁଥିବା ସଦସ୍ୟମାନେ ହାତ ଟେକିବାକୁ କୁହାଯାଇଥିଲା। ଆଲୋଚନା ଆରମ୍ଭରୁ କଂଗ୍ରେସ ବିଧାୟକମାନେ କକ୍ଷତ୍ୟାଗ କରି ଚାଲିଯାଇଥିଲେ। ୯୧ ଏଏପି ବିଧାୟକଙ୍କ ସମେତ ୯୩ ଜଣ ପ୍ରସ୍ତାବକୁ ସମର୍ଥନ କରିଥିବା ବେଳେ କେହି ବିରୋଧ କରି ନ ଥିଲେ। ଫଳରେ ସର୍ବସମ୍ମତକ୍ରମେ ପ୍ରସ୍ତାବ ଗୃହୀତ ହୋଇଥିବା ବାଚସ୍ପତି କହିଥିଲେ।
