କୋଲକାତା,୧୮।୧: ପ୍ରସିଦ୍ଧ ବଙ୍ଗୀୟ ଲେଖକ ସୁଜନ ଦାସଗୁପ୍ତାଙ୍କ ମୃତଦେହ ତାଙ୍କ ଘରୁ ସନ୍ଦେହଜନକ ଅବସ୍ଥାରେ ଉଦ୍ଧାର କରାଯାଇଛି। କୋଲକାତାରେ ଥିବା ତାଙ୍କ ଫ୍ଲାଟ୍ର ଗାଧୁଆଘରେ ବୁଧବାର ସୁଜନଙ୍କ ମୃତଦେହ ପଡ଼ିଥିବା ଦେଖାଯାଇଥିଲା। ପ୍ରଥମେ ସମ୍ପର୍କୀୟମାନେ ଏହା ନିଶ୍ଚିତ କରିବା ପରେ କୋଲକାତା ପୋଲିସକୁ ସୂଚନା ଦିଆଯାଇଛି। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ୭୮ ବର୍ଷୀୟ ଲେଖକ ସୁଜନ ତାଙ୍କ ଫ୍ଲାଟ୍ରେ ଏକା ରହୁଥିଲେ। ତାଙ୍କ ପତ୍ନୀ ଶାନ୍ତିନିକେତନରେ ରହୁଥିବା ବେଳେ ଝିଅ ବିଦେଶରେ ରୁହନ୍ତି। ସକାଳେ ତାଙ୍କ ଘରେ କାମ କରୁଥିବା ଚାକରାଣୀ ଆସି ତାଙ୍କୁ ଡାକିଥିଲେ। ହେଲେ ଲେଖକ ଶୁଣି ନ ଥିଲେ। ବହୁତ ସମୟ ଅପେକ୍ଷା କରିବା ପରେ ସୋସାଇଟିର ସିକ୍ୟୁରିଟିଙ୍କୁ ଡାକିଥିଲେ। ସେ କବାଟ ବନ୍ଦ ଥିବା ଦେଖିବା ପରେ ସମ୍ପର୍କୀୟଙ୍କୁ ଖବର ଦିଆଯାଇଥିଲା। ଏହାପରେ ପୋଲିସକୁ ଡକା ଯାଇଥିଲା।
