ମୋ ଘର ଯୋଜନା ପ୍ରତି ଆଗ୍ରହୀ ନାହାନ୍ତି ହିତାଧିକାରୀ
8:32 amAugust 3, 2023August 3, 2023 / 08

ସାକ୍ଷୀଗୋପାଳ,୩।୮(ପ୍ରଶାନ୍ତ ବାରିକ/କିଶୋର ମହାପାତ୍ର)ରାଜ୍ୟରେ ଗରିବଙ୍କ ନିମନ୍ତେ ସମସ୍ତ କଚ୍ଚାଘରକୁ ପକ୍କାଘର କରି ଯୋଗାଇଦେବା ଉଦ୍ଦେଶ୍ୟରେ ସରକାର ‘ମୋ ଘର ଯୋଜନା’ କରିଛନ୍ତି। ହେଲେ ପୁରୀ ଜିଲା ସତ୍ୟବାଦୀ ବ୍ଲକରେ ଏହି ଯୋଜନାର ସୁବିଧା ନେବା ପାଇଁ ହିତାଧିକାରୀଙ୍କ ଆଖିଦୃଶିଆ ସଂଖ୍ୟା ଛୁଇଁପାରିନାହିଁ। ସୂଚନା ଅନୁସାରେ ସତ୍ୟବାଦୀ ବ୍ଲକରେ ଗତ ୨ ମାସ ମଧ୍ୟରେ ୩୬୭୦ଜଣ ମୋ ଘର ଯୋଜନା ପାଇଁ ଅନଲାଇନ୍‌ରେ ରେଜିଷ୍ଟ୍ରେଶନ କରିଥିବା ବେଳେ ୩୩୧୫ଜଣଙ୍କ ଆବେଦନ ପତ୍ର ବ୍ଲକ ପ୍ରଶାସନର ହସ୍ତଗତ ହୋଇଛି। ୫୮୬ ଜଣଙ୍କ ଆବେଦନ ପତ୍ରକୁ ଯାଞ୍ଚ କରାଯାଇ ବିଭିନ୍ନ ବ୍ୟାଙ୍କକୁ ପଠାଯାଇଛି। ୩୦ଟି ଆବେଦନ ପତ୍ରକୁ ବିଭିନ୍ନ କାରଣରୁ ବିଡିଓ ରଦ୍ଦ କରିଛନ୍ତି। ଅନ୍ୟପଟେ ମୋ ଘର ଯୋଜନା ପାଇଁ ହୋଇଥିବା ଗାଇଡ୍‌ଲାଇନ୍‌ ପ୍ରକ୍ରିୟା ଓ ବ୍ୟାଙ୍କ ଋଣ ଦେବା ପାଇଁ ସୃଷ୍ଟି ହେଉଥିବା ସମସ୍ୟା ଯୋଗୁ ଏହି ଯୋଜନାରେ ଅଧିକ ଲୋକ ସାମିଲ ହେବା ପାଇଁ ଇଚ୍ଛା ପ୍ରକାଶ କରୁ ନ ଥିବା କେତେଜଣ ହିତାଧିକାରୀ କହିଛନ୍ତି। ଏପଟେ ଏହି ଯୋଜନାରେ ଅନ୍ତର୍ଭୁକ୍ତ ନିମନ୍ତେ ହିତାଧିକାରୀ କଚ୍ଚା ଘରେ କିମ୍ବା ଗୋଟିଏ କୋଠରି ଥିବା କଂକ୍ରିଟ ଘରେ ବାସ କରୁଥିବେ। ପୂର୍ବରୁ ସରକାରଙ୍କ କୌଣସି ଗୃହ ନିର୍ମାଣ ଯୋଜନାରେ ସହାୟତା ପାଇ ନଥିବେ, ପରିବାରର ମାସିକ ଆୟ ୨୫ହଜାର ଟଙ୍କାରୁ କମ୍‌ ଥିବ, ପରିବାରରେ ୪ଚକିଆ ଯାନ ନଥିବ, କେହି ସରକାରୀ କର୍ମଚାରୀ କିମ୍ବା ପେନସନ୍‌ଭୋଗୀ ହୋଇ ନଥିବେ, ୫ ଏକର ଜଳସେଚିତ କିମ୍ବା ୧୫ ଏକର ଅଣଜଳସେଚିତ ଜମିରୁ କମ ଥିଲେ ଯାଇ ଏହି ଯୋଜନାରେ ଋଣ ଓ ସବସିଡି ପାଇବା ପାଇଁ ଯୋଗ୍ୟ ହୋଇପାରିବେ।
ସେହିଭଳି ଏହି ଯୋଜନାରେ ୪ଟି ସ୍ତରରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ହିତାଧିକାରୀ ଋଣ ନେଇପାରିବେ। ଏଥିରେ ସାଧାରଣ ବର୍ଗ ଓ ଅନୁସୂଚିତ ଜାତି/ ଜନଜାତି/ ଦିବ୍ୟାଙ୍ଗ ମୁଖ୍ୟ ପରିବାର ପାଇଁ ଭିନ୍ନ ସବସିଡି ମିଳିବ। ୧ ଲକ୍ଷ ଟଙ୍କାର ଋଣ ନେଲେ ସାଧାରଣ ବର୍ଗଙ୍କୁ ୩୦ ହଜାର, ଅନୁସୂଚିତ ଜାତି/ଜନଜାତି/ଦିବ୍ୟାଙ୍ଗଙ୍କ ପାଇଁ ୪୦ ହଜାର। ୧.୫ ଲକ୍ଷ ଟଙ୍କାର ଋଣ ପାଇଁ ୪୫ ଓ ୫୫ ହଜାର। ୨ ଲକ୍ଷ ପାଇଁ ୬୦ ଓ ୭୦ ହଜାର ଟଙ୍କା ସବସିଡିରେ ମିଳିବ। ଘର ନିର୍ମାଣ ସମୟରେ ୨ ଓ ୩ଟି ପର୍ଯ୍ୟାୟରେ ଏହି ଅର୍ଥ ଦିଆଯିବ। ହିତାଧିକାରୀ ପ୍ରଥମ ବର୍ଷର ରିହାତି ଅବଧିକୁ ବାଦ ଦେଇ ପରବର୍ତ୍ତୀ ୧୦ବର୍ଷରେ ଋଣ ପରିଶୋଧ କରିବେ। ମାସିକ କିସ୍ତି ମାଧ୍ୟମରେ ଋଣ ଶୁଝିବେ। ୧୦ବର୍ଷରୁ କମ୍‌ ସମୟରେ ବି ଋଣ ଶୁଝିପାରିବେ। ଏଥିପାଇଁ ବ୍ୟାଙ୍କ କର୍ତ୍ତୃପକ୍ଷ ଋଣ ମଞ୍ଜୁର ପାଇଁ କୌଣସି ପ୍ରୋସେସିଂ ଫି ନେବେନି ଏବଂ ବନ୍ଧକ ସମୟରେ ଆବଶ୍ୟକ ପଞ୍ଜୀକରଣ ଶୁଳ୍କ ଓ ଷ୍ଟାମ୍ପ ଡିଉଟି ଛାଡ଼, ସବରେଜିଷ୍ଟ୍ରାର କାର୍ଯ୍ୟାଳୟରୁ ଆବଶ୍ୟକ ଦସ୍ତାବିଜ ସମ୍ବନ୍ଧୀୟ ନକଲ, ଇସି ଇତ୍ୟାଦି ପାଇଁ ଦେୟ ମଧ୍ୟ ସରକାର ଛାଡ଼ କରିଛନ୍ତି। ଏହାସତ୍ତ୍ୱେ ଏହି ଯୋଜନା ପାଇଁ ହିତାଧିକାରୀଙ୍କ ମଧ୍ୟରେ ସେଭଳି ଉତ୍ସାହ ଦେଖାଯାଉ ନ ଥିବା ଜଣାପଡ଼ିଛି। ଏ ନେଇ ବିଡିଓ ଲୋଚନ ଦାଶ କହିଛନ୍ତି, ଉକ୍ତ ଯୋଜନା ମାଧ୍ୟମରେ କିଭଳି ଅଧିକରୁ ଅଧିକ ହିତାଧିକାରୀ ସାମିଲ ହେବେ ଓ ଋଣ କ୍ଷେତ୍ରରେ ସରଳୀକରଣ କରିବା ପାଇଁ ସ୍ଥାନୀୟ ବ୍ୟାଙ୍କ ସମୂହକୁ କୁହାଯାଇଛି।