ବଇଣ୍ଡା,୪।୧୦(ଡି.ଏନ.ଏ.): ଆଠମଲ୍ଲିକ ବ୍ଲକ ପେଡିପଥର ପଞ୍ଚାୟତରେ ସ୍ବଚ୍ଛ ଭାରତ ମିଶନରେ ପାଇଖାନା କାର୍ଯ୍ୟରେ ଦୁର୍ନୀତି ହୋଇଥିବା ଅଭିଯୋଗ କରି ଝିଲ୍ଲୀମୁଣ୍ଡା ଗ୍ରାମର ଧରଣୀଧର ନାୟକ ଓ କେତେଜଣ ହିତାଧିକାରୀ ରବିବାର ଆଠମଲ୍ଲିକ ଉପଜିଲାପାଳଙ୍କ କାର୍ଯ୍ୟାଳୟ ପରିସରରେ ଅନଶନ କରିଛନ୍ତି।
ସେମାନେ ଅଭିଯୋଗ କରିଛନ୍ତି, ୨୦୧୯ ଓ ୨୦୨୦ରେ ପେଡିପଥର ପଞ୍ଚାୟତର ବିଭିନ୍ନ ଗ୍ରାମରେ ସ୍ବଚ୍ଛଭାରତ ମିଶନ ଜରିଆରେ ପାଇଖାନା ନିର୍ମାଣ ପାଇଁ ଅର୍ଥ ମଞ୍ଜୁର ହୋଇଥିଲା। ଏହି ପାଇଖାନା କାର୍ଯ୍ୟ ଏକ ମହିଳା ସ୍ବୟଂ ସହାୟକ ଗୋଷ୍ଠୀ ନେଇଥିବାବେଳେ ୨ ଶହ ପାଇଖାନା ନିର୍ମାଣ ନ କରି ମିଥ୍ୟା ବିଲ୍ କରିନେଇଛନ୍ତି। କିଛିମାସ ପୂର୍ବରୁ ଧରଣୀ ଧର ସୂଚନା ଅଧିକାର ଆଇନ ବଳରେ ତଥ୍ୟ ମାଗିବା ପରେ ୨ ଶହ ପାଇଖାନା ନିର୍ମାଣ କରା ନ ଯାଇ ମିଥ୍ୟା ବିଲ କରାଯାଇଥିବା ଜାଣିବାକୁ ପାଇଥିଲେ। ତାଙ୍କର କୌଣସି ପାଇଖାନା ନିର୍ମାଣ କରାଯାଇ ନ ଥିବାବେଳେ କାଗଜପତ୍ରରେ ପାଇଖାନା ନିର୍ମାଣ କରାଯାଇଥିବା ଦର୍ଶାଯାଇଥିବାରୁ ଏହାର ତଦନ୍ତ କରି ପଦକ୍ଷେପ ନେବାକୁ ସେ ଗତ ସେପ୍ଟେମ୍ବର ୯, ୨୦୨୨ରେ ଅନୁଗୋଳ ଜିଲାପାଳଙ୍କଠାରେ ଅଭିଯୋଗ କରିଥିଲେ। ହେଲ କୌଣସି ସୁଫଳ ମିଳି ନ ଥିଲା। ଏଥିରେ କେତେଜଣ ରାଜନେତାଙ୍କ ସମ୍ପୃକ୍ତି ଥିବା ଯୋଗୁ ପ୍ରଶାସନିକ କ୍ଷେତ୍ରରେ ତଦନ୍ତ କରାଯାଉ ନ ଥିବା ଅଭିଯୋଗକରି ଧରଣୀ ରବିବାର ଆଠମଲ୍ଲିକ ଉପଜିଲାପାଳ କାର୍ଯ୍ୟାଳୟଠାରେ ଅନଶନ କରିଥିଲେ। ଘଟଣାସ୍ଥଳରେ ସହକାରୀ ଜିଲାପାଳ କୁଳମଣି ଦଳେଇ ପହଞ୍ଚି ସେମାନଙ୍କୁ ବୁଝାଶୁଝା କରିବା ସହ ଆଠମଲ୍ଲିକ ଉପ ଜିଲାପାଳଙ୍କ ସହ ଆଲୋଚନା କରିଥିଲେ। ଉକ୍ତ ଘଟଣା ତଦନ୍ତ କରାଯାଇ ପଦେକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବା ପରେ ଅନଶନ ପ୍ରତ୍ୟାହୃତ ହୋଇଥିଲା।
