ମାଞ୍ଚେଷ୍ଟର, ୨୦।୭- ଭ୍ରମଣକାରୀ ଓ୍ବେଷ୍ଟଇଣ୍ଡିଜ ବିପକ୍ଷରେ ସ୍ଥାନୀୟ ଓଲ୍ଡ ଟ୍ରାଫୋର୍ଡ ଷ୍ଟାଡିୟମରେ ଚାଲିଥିବା ଦ୍ୱିତୀୟ ଟେଷ୍ଟର ଅନ୍ତିମ ତଥା ୫ମ ଦିବସରେ ସୋମବାର ଇଂଲଣ୍ଡର ବେନ୍ ଷ୍ଟୋକ୍ସ ଏକ କିର୍ତ୍ତୀମାନର ଅଧିକାରୀ ହୋଇଛନ୍ତି। ଟେଷ୍ଟ କ୍ରିକେଟ୍ ସାଧାରଣତଃ ଧିମା କ୍ରିକେଟ୍ ଭାବେ ଜଣାଶୁଣା। କିନ୍ତୁ ଘରୋଇ ଇଂଲଣ୍ଡ ଦଳର ଅଲ୍ରାଉଣ୍ଡର ଷ୍ଟୋକ୍ସ ଛକା ମାରିବାରେ ରେକର୍ଡ ସ୍ଥାପନ କରିଛନ୍ତି। ଇଂଲଣ୍ଡର ଦ୍ୱିତୀୟ ଇନିଂସରେ ଷ୍ଟୋକ୍ସ ୫୭ ବଲରୁ ୭୮ ରନର ଦ୍ରୁତ ଇନିଂସ ଖେଳିଥିଲେ। ଏହାରି ମଧ୍ୟରେ ସେ ୪ଟି ଚୌକା ଓ ୩ଟି ଛକା ମାରିଥିଲେ। ଏଥିସହ ବର୍ତ୍ତମାନ ଟେଷ୍ଟ ଖେଳୁଥିବା କ୍ରିକେଟର୍ଙ୍କ ମଧ୍ୟରେ ଷ୍ଟୋକ୍ସଙ୍କ ନାମରେ ସର୍ବାଧିକ ଛକା ମାରିବାର ରେକର୍ଡ ଲିପିବଦ୍ଧ ହୋଇଛି। ୨୯ ବର୍ଷୀୟ ଏହି ଇଂଲଣ୍ଡ ବ୍ୟାଟ୍ସମ୍ୟାନ ବର୍ତ୍ତମାନ ସୁଦ୍ଧା ଟେଷ୍ଟରେ ୭୪ ଛକା ମାରି ସାରିଛନ୍ତି। ଏହିକ୍ରମରେ ସେ ନ୍ୟୁଜିଲାଣ୍ଡ ଅଲ୍ରାଉଣ୍ଡର ଟିମ୍ ସୌଦୀ (୭୨ ଛକା)ଙ୍କୁ ପଛରେ ପକାଇ ଦେଇଛନ୍ତି। ଏହି ତାଲିକାରେ ଆଞ୍ଜେଲୋ ମାଥ୍ୟୁସ (୬୧), ଡେଭିଡ୍ ଓ୍ବାର୍ନର (୫୬) ଓ ରୋହିତ୍ ଶର୍ମା (୫୨) ପଛକୁ ପଛ ରହିଛନ୍ତି। ଏଠାରେ ଉଲ୍ଲେଖଯୋଗ୍ୟ, ଟେଷ୍ଟ କ୍ରିକେଟ୍ରେ ସର୍ବକାଳୀନ ସର୍ବାଧିକ ଛକା ମାରିବାର ରେକର୍ଡ ଅଷ୍ଟ୍ରେଲିଆର ପୂର୍ବତନ କ୍ରିକେଟର୍ ଆଦାମ ଗିଲକ୍ରିଷ୍ଟଙ୍କ ନାମରେ ରହିଛି। ଗିଲକ୍ରିଷ୍ଟ ୧୦୦ ଛକା ସହ ତାଲିକାର ଶୀର୍ଷରେ ରହିଥିବାବେଳେ କ୍ରିସ୍ ଗେଲ୍ (୯୮), ଜ୍ୟାକ କାଲିସ (୯୭), ବ୍ରେଣ୍ଡନ ମ୍ୟାକ୍କୁଲମ (୯୪) ଓ ବୀରେନ୍ଦ୍ର ସେହ୍ବାଗ (୯୧) ଯଥାକ୍ରମେ ୨ୟରୁ ୫ମ ସ୍ଥାନ ମଧ୍ୟରେ ରହିଛନ୍ତି।
