ନୂଆଦିଲ୍ଲୀ, ୪।୫ : ଦେଶରେ କରୋନାରେ ଆକ୍ରାନ୍ତ ହୋଇ ଘଟିଥିବା ମୃତକଙ୍କ ସଂଖ୍ୟା ରିପୋର୍ଟ ଭାରତ ପକ୍ଷରୁ ଜାରି କରାଯାଇଛି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ମୃତ୍ୟୁ ସଂଖ୍ୟା ଜାରି କରିବା ପୂର୍ବରୁ ଭାରତ ମୃତ୍ୟୁ ସଂଖ୍ୟା ସମ୍ପର୍କରେ ସୂଚନା ପ୍ରଦାନ କରିଛି।
ମୃତ୍ୟୁ ସଂଖ୍ୟାକୁ ନେଇ ଭାରତ ଏବଂ ବିଶ୍ୱ ସ୍ବାସ୍ଥ୍ୟ ସଂଗଠନ ମଧ୍ୟରେ ମତଭେଦ ରହିଛି। ଡବ୍ଲ୍ୟୁଏଚ୍ଓ ଦ୍ୱାରା ରିପୋର୍ଟ ପ୍ରକାଶ ପାଇବାର ଦୁଇ ଦିନ ପୂର୍ବରୁ ଏହି ଆକଳନ ଭାରତ ସରକାରଙ୍କ ଦ୍ୱାରା ପ୍ରକାଶିତ ହୋଇଛି । ଏହା ସମ୍ପୂର୍ଣ୍ଣ ସଠିକ ବୋଲି ଭାରତ ପକ୍ଷରୁ କୁହାଯାଇଛି। ତେବେ ଭାରତର ଏହି ଆକଳନ ଉପରେ ଡବ୍ଲ୍ୟୁଏଚ୍ଓ ପ୍ରଶ୍ନ ଉଠାଇଛି।
ଭାରତ କହିଛି ଯେ ୨୦୨୦ରେ କରୋନାର କାରଣରୁ ମୃତ୍ୟୁ ସଂଖ୍ୟା ୨୦୧୯ ତୁଳନାରେ ୪,୭୫,୦୦୦ ଅଧିକ ଥିଲା। ମଙ୍ଗଳବାର ଭାରତ ସରକାର ନୂତନ ଆକଳନ ଜାରି କରିଛନ୍ତି। ଏହା ପୂର୍ବରୁ ମାସକ ପରେ ଏହା ଜାରି କରାଯିବ ବୋଲି କୁହାଯାଉଥିଲା। କିନ୍ତୁ ବିଶ୍ୱ ସ୍ବାସ୍ଥ୍ୟ ସଂଗଠନର ମୃତ୍ୟୁସଂଖ୍ୟାକୁ ନେଇ ବିବାଦ ଲାଗି ରହିଥିବା ବେଳେ ଭାରତ ସରକାର ମଙ୍ଗଳବାର ଏହି ତଥ୍ୟ ପ୍ରକାଶ କରିଛନ୍ତି।
କେତେକ ବିଶେଷଜ୍ଞଙ୍କ ଅନୁସାରେ ଭାରତରେ କରୋନା ମୃତକଙ୍କ ସଂଖ୍ୟା ୪୦ ଲକ୍ଷରୁ ଅଧିକ। ଯାହା ଭାରତ ସରକାରଙ୍କ ସରକାରୀ ଆକଳନଠାରୁ ଆଠ ଗୁଣ ଅଧିକ। ଗତ ବର୍ଷ ଏପ୍ରିଲ ଏବଂ ମେ ମାସରେ, ଡେଲଟା ଭାରିଆଣ୍ଟ ଯୋଗୁ କୋଭିଡର ଦ୍ୱିତୀୟ ଲହର ଭାରତରେ ତାଣ୍ଡବ ରଚିଥିଲା। ଆକ୍ରାନ୍ତମାନେ ଅମ୍ଳଜାନ ଏବଂ ଡାକ୍ତରଖାନା ବିନା ରାସ୍ତାରେ ଛଟପଟ ହେଉଥିବା ଦେଖିବାକୁ ମିଳିଥିଲା।
ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ଗୁରୁବାର ଭାରତରେ ହୋଇଥିବା କରୋନା ମୃତ୍ୟୁ ବିଷୟରେ ଏହାର ଆକଳନ ପ୍ରକାଶ କରିବାର କାର୍ଯ୍ୟକ୍ରମ ରହିଛି। ଭାରତରେ କରୋନା ମହାମାରୀ ପରିଚାଳନା ଦାୟିତ୍ୱରେ ଥିବା ସ୍ବାସ୍ଥ୍ୟ ଅଧିକାରୀ ବିନୋଦ କୁମାର ପାଲ କହିଛନ୍ତି ଯେ ଭାରତ ସରକାରଙ୍କ ଦ୍ୱାରା ପ୍ରକାଶିତ ମୃତ୍ୟୁ ସଂଖ୍ୟା ସଠିକ। ଏଥିରେ କୌଣସି ଭୁଲ୍ ନାହିଁ। ସେ କହିଛନ୍ତି ଯେ ଦୁଇ-ତିନି ମାସ ପୂର୍ବେ ରେଜିଷ୍ଟ୍ରାର ଜେନେରାଲଙ୍କ କାର୍ଯ୍ୟାଳୟ ୨୦୨୦ରେ ଦେଶରେ ହୋଇଥିବା ମୋଟ କରୋନା ମୃତ୍ୟୁ ସଂଖ୍ୟା ରିପୋର୍ଟ ପ୍ରକାଶ କରିଥିଲେ।
ରେଜିଷ୍ଟ୍ରାର କାର୍ଯ୍ୟାଳୟଙ୍କ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ୨୦୨୦ରେ ଭାରତରେ ମୋଟ ମୃତ୍ୟୁ ସଂଖ୍ୟା ପୂର୍ବ ଦୁଇ ବର୍ଷ ତୁଳନାରେ ମନ୍ଥର ଗତିରେ ବୃଦ୍ଧି ପାଇଛି। ଯଦିଓ ସରକାର କହିଥିଲେ ଯେ ୨୦୨୦ ରେ ୧,୪୮,୭୩୮ଲୋକଙ୍କର ମୃତ୍ୟୁ ହୋଇଛି। କିନ୍ତୁ ମଙ୍ଗଳବାର ପ୍ରକାଶିତ ସଂଖ୍ୟାରେ ଏହି ସଂଖ୍ୟା ତିନି ଗୁଣରୁ ଅଧିକ ବୃଦ୍ଧି ପାଇ ୫,୨୩,୮୮୯ ଉଲ୍ଲେଖ କରାଯାଇଛି। ଆମେରିକା ଏବଂ ବ୍ରାଜିଲରେ ହୋଇଥିବା କରୋନା ମୃତ୍ୟୁ ସଂଖ୍ୟା ଭାରତ ତୁଳନାରେ ଅଧିକ।
୨୦୨୦ରେ, ପୃଥିବୀର ବିଭିନ୍ନ ଦେଶରେ କରୋନା ମୃତକଙ୍କ ସଂଖ୍ୟା ୧୮.୩୦ ଲକ୍ଷ ବୋଲି ରିପୋର୍ଟ ପ୍ରକାଶିତ ହୋଇଥିଲା। କିନ୍ତୁ ବିଶ୍ୱ ସ୍ବାସ୍ଥ୍ୟ ସଂଗଠନ ଆକଳନ କରିଛି ଯେ ଏହି ସଂଖ୍ୟା ୩୦ ଲକ୍ଷରୁ ଅଧିକ ହୋଇପାରେ।
ବିଶ୍ୱ ସ୍ବାସ୍ଥ୍ୟ ସଂଗଠନର ଗଣନା ପଦ୍ଧତିରେ ଏହା ସହମତ ନୁହେଁ ବୋଲି ଭାରତ କହିଛି। ବିଶ୍ୱ ସ୍ବାସ୍ଥ୍ୟ ସଂଗଠନ ଏବଂ ଭାରତ ମଧ୍ୟରେ ବିବାଦ ଏପ୍ରିଲ ୧୬ରେ, ଆମେରିକାର ଖବରକାଗଜ ନ୍ୟୁୟର୍କ ଟାଇମ୍ସରେ ପ୍ରକାଶିତ ହୋଇଥିଲା। ଏଥିରେ ଉଲ୍ଲେଖ କରାଯାଇଥିଲା ଯେ ଡବ୍ଲ୍ୟୁଏଚ୍ଓର କରୋନା ମୃତ୍ୟୁ ସଂଖ୍ୟାକୁ ସାର୍ବଜନୀନ କରିବାରେ ଭାରତ ବାଧା ସୃଷ୍ଟି କରୁଛି। ଡବ୍ଲ୍ୟୁଏଚ୍ଓ ଅନୁଯାୟୀ ଭାରତ ନିଜ ଦେଶରେ କରୋନା ମୃତ୍ୟୁ ସଂଖ୍ୟାକୁ ଜାଣିଶୁଣି କମାଇଛି।
ନ୍ୟୁୟର୍କ ଟାଇମ୍ସ ଲେଖିଛି ଯେ ଡବ୍ଲ୍ୟୁଏଚ୍ଓ ଜାନୁଆରୀରେ ଭାରତ କରୋନା ମୃତ୍ୟୁ ସଂଖ୍ୟା ପ୍ରକାଶ କରିବାକୁ ଚାହୁଁଛି। କିନ୍ତୁ ଭାରତର ବିରୋଧ ଯୋଗୁଁ ଏହା ହୋଇପାରୁ ନାହିଁ। ଏହି ପରିପ୍ରେକ୍ଷୀରେ, ଭାରତ କହିଛି ଯେ ଡବ୍ଲ୍ୟୁଏଚ୍ଓ ଗଣନା ପ୍ରକ୍ରିୟା ଏବଂ ପଦ୍ଧତି ସହ ସହମତ ନୁହେଁ । ଭାରତ ସରକାର ଏକ ବିବୃତ୍ତି ଜାରି ମଧ୍ୟ କରିଥିଲେ।
