ନୂଆଦିଲ୍ଲୀ, ୧୨।୬ : ଦେଶରେ ରାଷ୍ଟ୍ରପତି ନିର୍ବାଚନ ପୂର୍ବରୁ ବିରୋଧୀଙ୍କୁ ଏକଜୁଟ କରିବା ପାଇଁ ମମତା ବାନାର୍ଜୀଙ୍କ ଉଦ୍ୟମ ବିଫଳ ହୋଇଛି। କମ୍ୟୁନିଷ୍ଟ ପାର୍ଟି ଅଫ ଇଣ୍ଡିଆ (ମାର୍କ୍ସବାଦୀ) ନେତା ସୀତାରାମ ୟେଚୁରୀ ଦିଲ୍ଲୀରେ ମମତା ବାନାର୍ଜୀ ଦ୍ୱାରା ଜୁନ୍ ୧୫ରେ ହେବାକୁଥିବା ବିରୋଧୀ ଦଳର ବୈଠକକୁ ଏକପାଖିଆ ବୋଲି କହିଛନ୍ତି। ସେ କହିଛନ୍ତି ଯେ ଏଭଳି ଏକପାଖିଆ ପ୍ରୟାସର ବିପରୀତ ପ୍ରଭାବ ପଡ଼ିବ ଏବଂ ଏହା କେବଳ ବିରୋଧୀଙ୍କ ଏକତାକୁ କ୍ଷତି ପହଞ୍ଚାଇବ।
ଜୁଲାଇ ୧୮ରେ ରାଷ୍ଟ୍ରପତି ନିର୍ବାଚନ ହେବାକୁ ଯାଉଛି। ଏଭଳି ପରିସ୍ଥିତିରେ ସମସ୍ତ ବିରୋଧୀ ଦଳ ମଧ୍ୟରେ ଉଷ୍ଣତା ତୀବ୍ର ହୋଇଛି। ତାଙ୍କ ପ୍ରାର୍ଥୀଙ୍କୁ ଜିତାଇବା ପାଇଁ ପୁଣି ଥରେ ବିରୋଧୀ ଏକଜୁଟ ହୋଇଛନ୍ତି। ଏହି କ୍ରମରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସମସ୍ତ ବିରୋଧୀ ଦଳଙ୍କୁ ଏକ ଚିଠି ଲେଖି ଜୁନ ୧୫ ରେ ପ୍ରସ୍ତାବିତ ବୈଠକରେ ଯୋଗ ଦେବାକୁ ଅନୁରୋଧ କରିଛନ୍ତି ଯାହା ଦ୍ୱାରା ବିରୋଧୀ ଦଳ ରାଷ୍ଟ୍ରପତି ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିପାରିବେ। ସୀତାରାମ ୟେଚୁରୀ କହିଛନ୍ତି, ସାଧାରଣତଃ ଏଭଳି ବୈଠକଗୁଡ଼ିକ କେବଳ ପାରସ୍ପରିକ ପରାମର୍ଶ ପରେ ଡକାଯାଇଥାଏ। କିନ୍ତୁ ମମତା ଏଭଳି କରି ନ ଥିବା ସେ କହିଛନ୍ତି।
ସୀତାରାମ ୟେଚୁରିଙ୍କ ବ୍ୟତୀତ କମ୍ୟୁନିଷ୍ଟ ପାର୍ଟି ଅଫ ଇଣ୍ଡିଆର ସାଧାରଣ ସମ୍ପାଦକ ଡି ରାଜା ମଧ୍ୟ ମମତା ବାନାର୍ଜୀଙ୍କୁ ଏକ ବଡ଼ ଝଟ୍କା ଦେଇଛନ୍ତି। କୌଣସି ପୂର୍ବ ପରାମର୍ଶ ବିନା ଏହିପରି ଏକ ବୈଠକ ଡାକିବା ଠିକ ନୁହେଁ ବୋଲି ସେ କହିଛନ୍ତି। ତେଣୁ, ଏପରି କୌଣସି ପଦକ୍ଷେପ ଗ୍ରହଣ କରାଯିବା ଉଚିତ ନୁହେଁ ଯାହା ଦ୍ୱାରା ଦ୍ୱନ୍ଦ୍ୱ ଏବଂ ଭୁଲ ବୁଝାମଣା ହେବାର ଆଶଙ୍କା ରହିଛି ବୋଲି ସେ କହିଛନ୍ତି।
ମମତା ବାନାର୍ଜୀଙ୍କ ଦ୍ୱାରା ଡକାଯାଇଥିବା ବୈଠକକୁ ନେଇ ଶିବସେନା ନେତା ସଞ୍ଜୟ ରାଉତ କହିଛନ୍ତି ଯେ ଜୁନ ୧୫ ରେ ବୈଠକ ପାଇଁ ଆମନ୍ତ୍ରଣ ପାଇଛୁ। ଆମେ ସେହି ସମୟରେ ଅଯୋଧ୍ୟାରେ ରହିବୁ। ତେଣୁ ଆମ ଦଳର ଜଣେ ପ୍ରତିଷ୍ଠିତ ନେତା ଏହି ସଭାରେ ଯୋଗଦେବେ। ଏଥିସହିତ ସୂଚନା ଅନୁଯାୟୀ ମଲ୍ଲିକାର୍ଜୁନ ଖଡଗେ କଂଗ୍ରେସ ତରଫରୁ ଏହି ବୈଠକରେ ଯୋଗଦେବାର କାର୍ଯ୍ୟକ୍ରମ ରହିଛି।
ମମତା ବାନାର୍ଜୀଙ୍କ ଏହି ପଦକ୍ଷେପକୁ ନେଇ ବିରୋଧୀ ଦଳର ନେତାମାନେ ଖୁସି ନୁହଁନ୍ତି। ବିରୋଧୀଦଳର ନେତାମାନେ ବିଶ୍ୱାସ କରନ୍ତି ଯେ ବରିଷ୍ଠ ନେତାଙ୍କୁ ଅତିକ୍ରମ କରି ମମତା ବାନାର୍ଜୀ ନିଜକୁ ଭାଜପାର ଚେହେରା ରୂପେ ଉପସ୍ଥାପନ କରିବାକୁ ଚାହୁଁଛନ୍ତି। ଏଥିସହିତ କିଛି ନେତା କହିଛନ୍ତି ଯେ ମମତା ବାନାର୍ଜୀଙ୍କ ଏହି ପଦକ୍ଷେପ ବିରୋଧୀ ଦଳ ମଧ୍ୟରେ ମତଭେଦ ସୃଷ୍ଟି କରି ଭାଜପାକୁ ସାହାଯ୍ୟ କରୁଛନ୍ତି।
