ନୂଆଦିଲ୍ଲୀ,୧୭।୭: ସଂସଦର ମୌସୁମୀ ଅଧିବେଶନ ଆରମ୍ଭ ହେବା ପୂର୍ବରୁ ରାଜ୍ୟ ସଭା ଅଧ୍ୟକ୍ଷ ଏମ୍. ଭେଙ୍କିଆ ନାଇଡୁ ବିଭିନ୍ନ ରାଜନୈତିକ ଦଳ ସହ ଏକ ସର୍ବଦଳୀୟ ବୈଠକ ଡକାଇଛନ୍ତି। ଜୁଲାଇ ୧୯ ଅର୍ଥାତ୍ ସୋମବାରରୁ କରୋନା ପ୍ରେଟୋକଲ୍ ଅନୁଯାୟୀ ସଂସଦର ମୌସୁମୀ ଅଧିବେଶନ ଆରମ୍ଭ ହେବାକୁ ଯାଉଛି। ଏହାପୂର୍ବରୁ ଭେଙ୍କିଆ ନାଇଡୁ ଏହି ବୈଠକରେ ଉଚ୍ଚ ସଦନର ସମସ୍ତ ନେତାଙ୍କୁ ଆମନ୍ତ୍ରଣ କରିଛନ୍ତି। ସନ୍ଧ୍ୟାରେ ଏହି ବୈଠକ ଉପରାଷ୍ଟ୍ରପତି ତଥା ରାଜ୍ୟ ସଭା ଅଧ୍ୟକ୍ଷ ଭେଙ୍କିଆ ନାଇଡୁଙ୍କ ବାସଭବନରେ ଆୟୋଜିତ ହେବ। ଏଥିରେ ସେ ଗୃହକୁ ସୁଚାରୁ ରୂପେ ଚଳାଇବାକୁ ସମସ୍ତ ଦଳକୁ ନିବେଦନ କରିବେ। ଏହି ବୈଠକରେ ସାମିଲ ହେବା ପାଇଁ ଏପର୍ଯ୍ୟନ୍ତ ୪୦ଜଣ ନେତା ଓ କେନ୍ଦ୍ରମନ୍ତ୍ରୀ ସହମତି ପ୍ରକାଶ କରିଛନ୍ତି। ସୂଚନା ମୁତାବକ ଚଳିତ ଥର ରାଜ୍ୟ ସଭାରେ ସଦନର ନୂଆ ନେତା ପୀୟୁଷ ଗୋଏଲ ମଧ୍ୟ ସାମିଲ ହେବେ। ସୂଚନାଯୋଗ୍ୟ, ସଂସଦର ଆଗାମୀ ଅଧିବେଶନରେ ଉତ୍ତେଜନା ପ୍ରକାଶ ପାଇପାରେ ବୋଲି ଆଶଙ୍କା କରାଯାଉଛି। କାରଣ ଦେଶରେ କରୋନା, ମହଙ୍ଗା ମାଡ଼ ଓ ବେରୋଜଗାରୀ ଭଳି ଅନେକ ପ୍ରସଙ୍ଗକୁ ନେଇ ବିରୋଧୀ ଦଳ ସରକାରଙ୍କୁ ଘେରିପାରନ୍ତି।
