ବିଶାଖାପାଟନମ,୧।୪: ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଖେଳାଯାଇଥିବା ମ୍ୟାଚରେ ଚେନ୍ନାଇ ସୁପର କିଙ୍ଗ୍ସ ପାଇଁ ୧୬ଟି ବଲରେ ଏମଏସ ଧୋନୀ ୩୭ ରନର ଚମତ୍କାର ଇନିଂସ ଖେଳିଥିଲେ। ଏଥିରେ ୪ଟି ଚୌକା ଓ ୩ ଛକା ସାମିଲ ଥିଲା। ଧୋନୀଙ୍କ ଏହି ଇନିଂସ ଚେନ୍ନାଇ ପାଇଁ ମ୍ୟାଚ ଜିତି ପାରି ନ ଥିଲା, କିନ୍ତୁ ଏହା ନିଶ୍ଚିତ ଭାବରେ ପ୍ରଶଂସକଙ୍କ ହୃଦୟ ଜିତିଥିଲା। ଧୋନୀ ପ୍ରଥମ ଥର ପାଇଁ ଆଇପିଏଲ ୨୦୨୪ରେ ବ୍ୟାଟିଂ ଦେଖି ବହୁତ ଖୁସି ମନେ ହେଉଥିଲେ। ଧୋନୀଙ୍କ ବ୍ୟାଟିଂ ପ୍ରତି ଆଗ୍ରହ କେବଳ ତାଙ୍କ ପ୍ରଶଂସକଙ୍କ ମଧ୍ୟରେ ନୁହେଁ, ତାଙ୍କ ସ୍ତ୍ରୀ ସାକ୍ଷୀଙ୍କୁ ମଧ୍ୟ ଖୁସି କରିଥିଲା।
ଧୋନୀଙ୍କ ଚମତ୍କାର ବ୍ୟାଟିଂ ଦେଖିବା ପରେ ସାକ୍ଷୀ ସୋସିଆଲ ମିଡିଆ ମାଧ୍ୟମରେ ଏକ ଆକର୍ଷଣୀୟ ପ୍ରତିକ୍ରିୟା ଦେଇଥିଲେ। ମ୍ୟାଚ ପରେ ସାକ୍ଷୀ ଏକ ଇନଷ୍ଟାଗ୍ରାମର ଷ୍ଟାଟସ ଶେୟାର କରିଛନ୍ତି, ଯେଉଁଥିରେ ସେ ଧୋନୀଙ୍କ ‘ଷ୍ଟ୍ରାଇକର ଅଫ ଦି ମ୍ୟାଚ’ ପୁରସ୍କାର ଗ୍ରହଣ କରୁଥିବା ଏକ ଫଟୋ ପୋଷ୍ଟ କରିଛନ୍ତି। ଫଟୋ ଉପରେ ସେ ଲେଖିଛନ୍ତି, ଜଣାପଡି ନ ଥିଲା ଯେ ଆମେ ମ୍ୟାଚ ହାରିଛୁ। ଏହା ବ୍ୟତୀତ ସାକ୍ଷୀ ମଧ୍ୟ ଏହି ଷ୍ଟାଟସ ମାଧ୍ୟମରେ ରିଷଭ ପନ୍ତଙ୍କ ସ୍ବାଗତ କରିଥିଲେ। ସେ ଅନ୍ୟ ପଟେ ପନ୍ତଙ୍କ ପାଇଁ ଲେଖିଛନ୍ତି, ସର୍ବପ୍ରଥମେ ରିଷଭ ପନ୍ତଙ୍କୁ ସ୍ବାଗତ କରୁଛି। ସାକ୍ଷୀ ସିଂଙ୍କ ଏହି ପ୍ରତିକ୍ରିୟା ଭାଇରାଲ ହେବାରେ ଲାଗିଛି। ସାକ୍ଷୀଙ୍କ ଏହି ମନ୍ତବ୍ୟ ପାଇଁ ସମସ୍ତେ ତାଙ୍କୁ ପ୍ରଶଂସା କରୁଛନ୍ତି।
