ମହାକାଳପଡ଼ା,୬ା୫(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଦଶ ହଜାରରୁ ଅଧିକ ପାରମ୍ପରିକ ମତ୍ସ୍ୟଜୀବୀ ସମୁଦ୍ର ଉପରେ ନିର୍ଭରକରି ପରିବାର ପ୍ରତିପୋଷଣ କରନ୍ତି। ସାମୁଦ୍ରିକ ଝଡ଼ ବାତ୍ୟା ତୋଫାନ ଭଳି ବିପଦଆପଦ ବେଳେ ମା’ ଡଙ୍ଗା ମଙ୍ଗରେ ବିରାଜିତ ହୋଇ ଆମ୍ଭମାନଙ୍କ ଜୀବନ ରକ୍ଷାକରନ୍ତି ବୋଲି ମତ୍ସ୍ୟଜୀବୀଙ୍କ ବିଶ୍ୱାସ। ଏହିକ୍ରମରେ କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ପେଟ୍ଛେଲା ଗ୍ରାମର ମତ୍ସ୍ୟଜୀବୀମାନେ ବୈଶାଖ ଶୁକ୍ଳପକ୍ଷରେ ୧୩ତମ ବାର୍ଷିକ ମା’ ଗଙ୍ଗାମାତା ମୃଣ୍ମୟୀ ମୂର୍ତ୍ତି ରୀତିନୀତି ଅନୁସାରେ ମଙ୍ଗଳବାର ପୂଜା ପାଉଛନ୍ତି ବୋଲି ଆୟୋଜକ କହିଛନ୍ତି। ମା’ଙ୍କ ପୀଠରେ ବିଭିନ୍ନ ଫଳ ଫୁଲୁରି ନୈବେଦ୍ୟ ଅର୍ପଣ କରାଯାଇଥିଲା। ମାନସିକଧାରୀ ମା’ଙ୍କ ଗଳାରେ ଟଙ୍କାହାର ଅର୍ପଣ କରାଯିବାର ବିଧି ରହିଛି। ଅପରପକ୍ଷରେ ଚଳିତ ମାସ ଶେଷସୁଦ୍ଧା ସରକାରୀ ଭାବେ ସାମୁଦ୍ରିକ ପ୍ରବେଶ ନିଷିଦ୍ଧ କଟକଣା ହଟିବା ପରେ ସମୁଦ୍ରକୁ ଡଙ୍ଗା ଜାଲ ନେଇ ନିଜ ଗୁଜରାଣ ମେଣ୍ଟାଇବା ପାଇଁ ବାହାରିବେ ବୋଲି ମା’ ଦରିଆରାଣୀ ଗଙ୍ଗାଦେବୀ ପୂଜା କମିଟି ସଭାପତି ସତ୍ୟନାରାୟଣ ମହାକୁଡ, ସମ୍ପାଦକ ଚିରନ୍ତନ ଗିରି, ସଦସ୍ୟ ଶକ୍ତିପଦ ଭୂୟାଁ, ରଞ୍ଜିତ ପାତ୍ର, ଯୁଗଳ ଜେନା, ତପନ ମଣ୍ଡଳ, ମହେନ୍ଦ୍ର ମଣ୍ଡଳଙ୍କ ସହ ବହୁ ମତ୍ସ୍ୟଜୀବୀ କହିଛନ୍ତି।
ଆସନ୍ତା ମାସ ରଜ ସଂକ୍ରାନ୍ତି ପରେ ଉପକୂଳବର୍ତ୍ତୀ ଅଞ୍ଚଳର ଜମ୍ବୁ, ସୁନିତି, ତନ୍ତିଆ ପାଳ, ଶାସନ ପେଟା, ରଟପଙ୍କ, ଓସ୍ତିରା, କଳତୁଙ୍ଗା, ବଉଳକଣି, ରାମନଗର, ଖରିନାସି, ବତୀଘର ଆଦି ଅଞ୍ଚଳର ମତ୍ସ୍ୟଜୀବୀମାନେ ଗଭୀର ସମୁଦ୍ରକୁ ମାଛ ଧରିବାକୁ ଯିବେ ବୋଲି କହିଛନ୍ତି। ମା’ଙ୍କ ପୂଜା ଶେଷହେବା ପରେ ଭସାଣ ପର୍ବ ପରେ ରାମଚଣ୍ଡୀ ଗଳିଆ ନଦୀରେ ବିସର୍ଜନ କରାଯାଏ ବୋଲି କହିଛନ୍ତି ଆୟୋଜକ।
