ବ୍ରଜରାଜନଗର, ୬ା୯(ଡି.ଏନ.ଏ.): ବ୍ରଜରାଜନଗର ବିଜୁ ଜନତା ଦଳରେ ଗୋଷ୍ଠୀ କନ୍ଦଳ ଧୀରେ ଧୀରେ ପଦାରେ ପଡ଼ିବାରେ ଲାଗିଛି। ଜିଲା କାର୍ଯ୍ୟକାରିଣୀ ସଦସ୍ୟ ତଥା ଓଡ଼ିଆ ଏକତା ମଞ୍ଚର ସଭାପତି ନୃପ ତାଣ୍ଡିଆ ଓ ପୂର୍ବତନ କାଉନ୍ସିଲର ରାହୁଲ ପାଣ୍ଡେଙ୍କ ମଧ୍ୟରେ ପ୍ରଥମେ ଫୋନରେ ବଚସା ଓ ପରେ ମାରପିଟ ହୋଇଥିବା ନେଇ ଉଭୟ ପକ୍ଷରୁ ପୃଥକ୍ ଅଭିଯୋଗ ହୋଇଛି। ପୋଲିସ ୨ଟି ମାମଲା ରୁଜୁ କରି ତଦନ୍ତ କରୁଥିବା ବ୍ରଜରାଜନଗର ଥାନା ଅଧିକାରୀ ପ୍ରଦ୍ୟୁମ୍ନ ସ୍ବାଇଁ ପ୍ରକାଶ କରିଛନ୍ତି।
ନୃପ ତାଣ୍ଡିଆଙ୍କ ଅଭିଯୋଗ ଅନୁଯାୟୀ ରାହୁଲ ପ୍ରଥମେ ଫୋନରେ ଗାଳିଗୁଲଜ କରି ମାରିବାକୁ ଧମକ ଦେଇଥିଲେ। ପରେ ସେ ତାଙ୍କ ଭାଇ ଅଭିଷେକ ପାଣ୍ଡେଙ୍କ ସହିତ ଗୋପବନ୍ଧୁ ଛକଠାରେ ଥିବା କାର୍ଯ୍ୟାଳୟକୁ ଆସି ଜାତିଆଣ ଆକ୍ଷେପ କରିଥିଲେ। ଏହାକୁ ଭିତ୍ତିକରି ବ୍ରଜରାଜନଗର ଥାନାରେ ଆଇପିସି ଧାରା ୨୯୪, ୫୦୬, ୩୪ରେ ମାମଲା (ନଂ.୨୭୦/୨୨) ରୁଜୁ ହୋଇଛି। ସେହିପରି ରାହୁଲଙ୍କ ଅଭିଯୋଗକ୍ରମେ ସେ ଗୋପବନ୍ଧୁ ଛକ ଦେଇ ଗାନ୍ଧୀ ଛକକୁ ଯାଉଥିବା ବେଳେ ନୃପ ତାଣ୍ଡିଆ ସମର୍ଥକ ତାଙ୍କୁ ଅଟକାଇ ଆକ୍ରମଣ କରିଥିଲେ। ଏହାକୁ ଆଧାର କରି ପୋଲିସ ଆଇପିସି ଧାରା ୩୪୧, ୨୯୪, ୩୨୩, ୩୦୭ ଓ ୩୪ରେ ମାମଲା (ନଂ.୨୭୧/୨୨) ରୁଜୁ କରିଛି।
