ସଜନାଗଡ଼,୭।୧୧(ଡି.ଏନ.ଏ.): ବାଲେଶ୍ୱର ଜିଲା ନୀଳଗିରି ସହରରେ ରବିବାର ଭାଲୁ ଆତଙ୍କ ଦେଖିବାକୁ ମିଳିଥିଲା। ପ୍ରାତଃ ଭ୍ରମଣରେ ଯାଉଥିବା ଜଣେ ଯୁବକଙ୍କୁ ଭାଲୁଟି ଗୋଡ଼ାଇବାରୁ ସେ ଜୀବନ ବଞ୍ଚାଇବାକୁ ଯାଇ ପୋଖରୀ ମଧ୍ୟକୁ ଡେଇଁ ପଡ଼ିଥିଲେ। କିଛି ସମୟ ଧରି ଭାଲୁ ସହର ମଧ୍ୟରେ ରହି ପରେ ପାଖ ଜଙ୍ଗଲକୁ ପଳାଇଥିଲା।
ଶନିବାର ରାତିରେ ଭାଲୁଟି ଖାଦ୍ୟ ଅନ୍ବେଷଣରେ ସ୍ବର୍ଣ୍ଣଚୁଡ଼ ସଂରକ୍ଷିତ ଜଙ୍ଗଲରୁ ଆସି ବାଟବଣା ହୋଇଯାଇଥିଲା। ଜଙ୍ଗଲକୁ ଫେରି ନ ପାରି ସହର ଭିତରକୁ ପଶିଯାଇଥିଲା। ଘାଟଘରସାହି ଅଞ୍ଚଳର ଗୟାଧର ବେହେରା ଭୋର ସମୟରେ ପ୍ରାତଃଭ୍ରମଣ କରୁଥିଲେ। ଏହି ସମୟରେ ଜଗନ୍ନାଥ ବଡ଼ଦାଣ୍ଡରେ ଥିବା ଶଙ୍କରାଖୁଣ୍ଟା ପୋଖରୀ ନିକଟରେ ଭାଲୁଟି ତାଙ୍କୁ ଆକ୍ରମଣ କରିବା ପାଇଁ ଗୋଡ଼ାଇଥିଲା। ସେ ଉପସ୍ଥିତ ବୁଦ୍ଧି ଖଟାଇ ପୋଖରୀକୁ ଡେଇଁ ପଡ଼ି ଜୀବନ ବଞ୍ଚାଇଥିଲେ। ସେହିପରି ବାଇପାସ୍ ରାସ୍ତାରେ ମୁନା ଦାସ ନାମକ ଜଣେ ବ୍ୟକ୍ତି ଫୁଲ ତୋଳିବା ପାଇଁ ଆସିଥିବା ବେଳେ ଭାଲୁ ଗୋଡ଼ାଇବାରୁ ପଡ଼ିଯାଇ ଆହତ ହୋଇଛନ୍ତି। ତେବେ ଭାଲୁକୁ ନେଇ ସହରବାସୀ ଭୟଭୀତ ଅବସ୍ଥାରେ ଥିବା ଜଣାପଡ଼ିଛି।
