ନବରଙ୍ଗପୁର,୯।୬(ସଦାଶିବ ପ୍ରହରାଜ): ପ୍ରଶାସନିକ ଅଧିକାରୀଙ୍କ ମାନବିକତାର ଏକ ନିଆରା ଚିତ୍ର ଦେଖିବାକୁ ମିଳିଛି ନବରଙ୍ଗପୁର ଜିଲା ତେନ୍ତୁଳୀଖୁଣ୍ଟିରେ । ପ୍ରଚଣ୍ଡ ଖରା ଓ ଗରମ ମଧ୍ୟରେ ସ୍ବାସ୍ଥ୍ୟ ପରୀକ୍ଷା ସାରି ଚାଲି ଚାଲି ଘରକୁ ଫେରୁଥିବା ଜଣେ ବୃଦ୍ଧାଙ୍କୁ ଦେଖି ସହାୟତାର ହାତ ବଢ଼ାଇଛନ୍ତି ବିଡିଓ । ନିଜ ଅଫିସ ଗାଡ଼ିରେ ବସାଇ ବୃଦ୍ଧାଙ୍କୁ ଘରେ ପହଞ୍ଚାଇ ମାନବିକତାର ପରିଚୟ ଦେଇଛନ୍ତି ତେନ୍ତୁଳୀଖୁଣ୍ଟି ବିଡିଓ ମନୋଜ ପାଣିଗ୍ରାହୀ । ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ଚାରିଆଡେ ପ୍ରଶଂସାର ସୁଅ ଛୁଟିଛି । ତେନ୍ତୁଳୀଖୁଣ୍ଟି ଠାରୁ ପ୍ରାୟ ୩ କିଲୋମିଟର ଦୂରରେ ଥିବା ଗୌଡ଼ଗୁଡା ଗାଁର ବୃଦ୍ଧା ସୁନାଦେଇ ବାଘ ସ୍ବାସ୍ଥ୍ୟ ପରୀକ୍ଷା ପାଇଁ ଦ୍ୱିପ୍ରହରର ଟାଣ ଖରାରେ ତେନ୍ତୁଳୀଖୁଣ୍ଟି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆସିଥିଲେ । ପରୀକ୍ଷା ସାରି ଔଷଧ ନେବା ପରେ ଘରକୁ ଫେରିବା ପାଇଁ କୌଣସି ଅଟୋ କିମ୍ବା ଯାନବାହନ ନ ମିଳିବାରୁ ସେ ପାଦରେ ଚାଲି ଚାଲି ଗାଁକୁ ଫେରୁଥିଲେ । ସେହି ସମୟରେ ନିଜ ସରକାରୀ କାର୍ଯ୍ୟରେ ବାହାରିଥିବା ତେନ୍ତୁଳୀଖୁଣ୍ଟି ବିଡିଓ ମନୋଜ ପାଣିଗ୍ରାହୀଙ୍କ ନଜର ପଡ଼ିଥିଲା ବୃଦ୍ଧାଙ୍କ ଉପରେ। ବୃଦ୍ଧାଙ୍କ ଅବସ୍ଥା ଦେଖି ସେ ଗାଡ଼ି ଅଟକାଇ ତାଙ୍କ ସହ କଥାବାର୍ତ୍ତା କରିଥିଲେ। ପରେ ନିଜେ ବୃଦ୍ଧାଙ୍କୁ ଧରି ଅଫିସ ଗାଡ଼ିରେ ବସାଇ ଗୌଡ଼ଗୁଡା ସ୍ଥିତ ତାଙ୍କ ଘରେ ସୁରକ୍ଷିତ ଭାବେ ପହଞ୍ଚାଇଥିଲେ । ବିଡିଓଙ୍କ ଏହି ମାନବିକ ପଦକ୍ଷେପକୁ ସ୍ଥାନୀୟ ଅଞ୍ଚଳରେ ବେଶ ପ୍ରଶଂସା କରାଯାଉଛି । ଭାଇରାଲ ଭିଡିଓରେ ଜଣେ ପ୍ରଶାସନିକ ଅଧିକାରୀଙ୍କ ସମ୍ବେଦନଶୀଳତା ଓ ସାମାଜିକ ଦାୟିତ୍ୱବୋଧର ଚିତ୍ର ସ୍ପଷ୍ଟ ଭାବେ ଦେଖିବାକୁ ମିଳିଛି। ବିଡିଓ ମନୋଜ ପାଣିଗ୍ରାହୀଙ୍କ କହିବା ଅନୁସାରେ, ବୃଦ୍ଧା ସୁନାଦେଇ ବାଘ ଭତ୍ତା, ରାଶନ ଚାଉଳ ସମେତ ବିଭିନ୍ନ ସରକାରୀ ଯୋଜନାର ସୁବିଧା ପାଉଛନ୍ତି । ତାଙ୍କୁ ତୁରନ୍ତ ଏକ ହୱିଲଚେୟାର ଯୋଗାଇ ଦେବା ପାଇଁ ବିଏସଏସଓଙ୍କୁ ନିର୍ଦ୍ଦେଶ ଦିଆଯାଇଛି । ସେହିପରି ସ୍ବାସ୍ଥ୍ୟ ବିଭାଗର ଟିମ ନିୟମିତ ଭାବେ ଘରକୁ ଯାଇ ତାଙ୍କ ସ୍ବାସ୍ଥ୍ୟ ପରୀକ୍ଷା କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।