ନୂଆଦିଲ୍ଲୀ,୧୬।୮: ଭାରତୀୟ ଉଇକେଟକିପର ବ୍ୟାଟ୍ସମ୍ୟାନ ଋଷଭ ପନ୍ତଙ୍କୁ ନିକଟରେ ଇଂଲଣ୍ଡ ଗସ୍ତରେ ଗମ୍ଭୀର ଆଘାତର ସମ୍ମୁଖୀନ ହେବାକୁ ପଡ଼ିଥିଲା। ଲର୍ଡସ ଟେଷ୍ଟ ସମୟରେ ଉଇକେଟ କିପିଂ ବେଳେ ତାଙ୍କ ଆଙ୍ଗୁଠିରେ ଆଘାତ ଲାଗିଥିଲା। ଏହାପରେ ମାଞ୍ଚେଷ୍ଟର ଟେଷ୍ଟରେ ତାଙ୍କ ଗୋଡ଼ରେ ଗମ୍ଭୀର ଆଘାତ ଲାଗିଥିଲା, ଯାହାଫଳରେ ତାଙ୍କୁ ମଇଦାନ ଛାଡ଼ିବାକୁ ପଡ଼ିଥିଲା। ପନ୍ତଙ୍କ ଆଘାତ ଏଣ୍ଡରସନ-ତେନ୍ଦୁଲକର ଟ୍ରଫି ସିରିଜରେ ଟିମ୍ ଇଣ୍ଡିଆ ପାଇଁ ଚିନ୍ତା ବଢ଼ାଇ ଦେଇଥିଲା। ଏହାକୁ ଦୃଷ୍ଟିରେ ରଖି ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (BCCI) ଆଗାମୀ ଘରୋଇ ସିଜନ ପୂର୍ବରୁ ଏକ ନୂଆ ନିୟମ ଜାରି କରିଛି।
BCCI ଘରୋଇ କ୍ରିକେଟରେ ମଲ୍ଟି-ଡେ’ ମ୍ୟାଚ୍ ପାଇଁ ‘ସିରିଅସ ଇଞ୍ଜୁରୀ ରିପ୍ଲେସମେଣ୍ଟ’ ନିୟମ ଆରମ୍ଭ କରିଛି। ଏହି ନିୟମ ୨୦୨୫-୨୬ ସିଜନରୁ ଲାଗୁ ହେବ ଏବଂ ମଲ୍ଟି-ଡେ ଫର୍ମାଟରେ ଆଘାତପ୍ରାପ୍ତ ଖେଳାଳିଙ୍କ ପାଇଁ ରିପ୍ଲେସମେଣ୍ଟ ଅନୁମତି ଦିଆଯିବ। ପନ୍ତଙ୍କ ଆଘାତ ଏହି ନିୟମ ପ୍ରଣୟନ ପାଇଁ BCCIକୁ ପ୍ରେରଣା ଦେଇଛି। ନୂଆ ନିୟମ ଅନୁଯାୟୀ ଯଦି କୌଣସି ଖେଳାଳି ମଲ୍ଟି-ଡେ’ ମ୍ୟାଚ୍ ସମୟରେ ଗମ୍ଭୀର ଆଘାତ ହେତୁ ମ୍ୟାଚ୍ ଛାଡ଼ିବାକୁ ପଡ଼େ, ତେବେ ଟିମ୍ ମ୍ୟାନେଜମେଣ୍ଟ ସମାନ ଯୋଗ୍ୟତା ଥିବା ଜଣେ ଖେଳାଳିଙ୍କୁ ରିପ୍ଲେସମେଣ୍ଟ ଭାବେ ନେଇପାରିବ। ଏହି ରିପ୍ଲେସମେଣ୍ଟ ତୁରନ୍ତ ପ୍ରଭାବୀ ହେବ, କିନ୍ତୁ ଏଥିପାଇଁ ଚୟନ ସମିତି ଏବଂ ମ୍ୟାଚ ରେଫରୀଙ୍କ ଅନୁମୋଦନ ଆବଶ୍ୟକ।
‘ସିରିଅସ ଇଞ୍ଜୁରୀ ରିପ୍ଲେସମେଣ୍ଟ’ ନିୟମ ନିଶ୍ଚିତ କରିବ ଯେ ଆଘାତ ହେତୁ ଟିମ୍ର ରଣନୀତି ଉପରେ ପ୍ରଭାବ ନ ପଡ଼େ ଏବଂ ଖେଳର ମାନ ଅକ୍ଷୁର୍ଣ୍ଣ ରହିବ। ଅହମ୍ମଦାବାଦରେ ଚାଲିଥିବା ଆମ୍ପାୟାର ସେମିନାରରେ ଅମ୍ପାୟାରମାନଙ୍କୁ ଖେଳର ନୂଆ ପରିସ୍ଥିତି ସମ୍ପର୍କରେ ଅବଗତ କରାଯାଇଛି। BCCI ସ୍ପଷ୍ଟ କରିଛି ଯେ ସୈୟଦ ମୁଶ୍ତାକ ଅଲୀ କିମ୍ବା ବିଜୟ ହଜାରେ ଟ୍ରଫି ଭଳି ହ୍ବାଇଟ ବଲ ଟୁର୍ନାମେଣ୍ଟରେ ଏଭଳି ରିପ୍ଲେସମେଣ୍ଟ ଅନୁମତି ଦିଆଯିବ ନାହିଁ। ଆଗାମୀ ଆଇପିଏଲ ସିଜନରେ ଏହି ନିୟମ ଲାଗୁ ହେବ କି ନାହିଁ, ତାହା ଏପର୍ଯ୍ୟନ୍ତ ନିଷ୍ପତ୍ତି ହୋଇନାହିଁ। ତେବେ ସିକେ ନାୟଡୁ ଟ୍ରଫି ଭଳି ମଲ୍ଟି-ଡେ ଅଣ୍ଡର-୧୯ ଟୁର୍ନାମେଣ୍ଟରେ ଏହି ନିୟମ ପ୍ରଯୁଜ୍ୟ ହେବ।
ଆନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ନିୟମ ଅନୁଯାୟୀ, ରିପ୍ଲେସମେଣ୍ଟ କେବଳ କନକସନ (ମୁଣ୍ଡରେ ଆଘାତ) ହେଲେ ଦିଆଯାଏ। କନକସନ ନିୟମ ଅନୁସାରେ, ଯଦି ଜଣେ ଖେଳାଳି ଏହି କାରଣରୁ ମ୍ୟାଚ ଛାଡ଼ନ୍ତି, ତେବେ ସେ ୭ ଦିନ ପର୍ଯ୍ୟନ୍ତ କୌଣସି ମ୍ୟାଚ୍ ଖେଳିପାରିବେ ନାହିଁ। କ୍ରିକେଟ ନିୟମ ଅନୁଯାୟୀ, କନକସନ ସବଷ୍ଟିଟ୍ୟୁଟ ତେବେ ଲାଗୁ ହୁଏ, ଯେତେବେଳେ ଖେଳାଳିଙ୍କ ମୁଣ୍ଡରେ ଆଘାତ ଲାଗେ ଏବଂ ସେ ଖେଳ ଜାରି ରଖିବାରେ ଅସମର୍ଥ ହୁଅନ୍ତି। ଏହି ନୂଆ ନିୟମ ଭାରତୀୟ କ୍ରିକେଟରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି, ଯାହା ଖେଳାଳିଙ୍କ ନିରାପତ୍ତା ଏବଂ ଟିମ୍ର ପ୍ରଦର୍ଶନକୁ ସୁନିଶ୍ଚିତ କରିବ।
