ନୂଆଦିଲ୍ଳୀ,୧୪ା୯(ପି.ଟି.): ବିସିସିଆଇ ପକ୍ଷରୁ ଦାଖଲ କରାଯାଇଥିବା ପିଟିସନ୍ ଉପରେ ଶୁଣାଣି କରିଛନ୍ତି ସୁପ୍ରିମକୋର୍ଟ। ବିସିସିଆଇ କାର୍ଯ୍ୟକର୍ତ୍ତାଙ୍କ ଦାୟିତ୍ୱ ଅବଧି ବୃଦ୍ଧି କରିବା ଉପରେ ଶୁଣାଣି କରିବା ସହିତ ଏହାକୁ ଖାରଜ କରି ଦେଇଛନ୍ତି। ଜଷ୍ଟିସ୍ ଡି.ଓ୍ବାଇ. ଚନ୍ଦ୍ରଚୂଡ ଓ ହିମା କୋହଲିଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। କୌଣସି ରାଜ୍ୟ ଓ ବିସିସିଆଇର କର୍ମକର୍ତ୍ତା ଭାବରେ ୬ ବର୍ଷ କାର୍ଯ୍ୟ କରିବା ପରେ ୩ ବର୍ଷ ପାଈଁ ପଦରୁ ଦୂରେଇ ରହିବାର(କୁଲିଂ ଅଫ୍ ପିରିୟଡ୍) ନିୟମ ରହିଥିବା ବେଳେ ଏହାକୁ ସଂଶୋଧନ କରିବା ପାଇଁ ଯାଚିକା ଦାଖଲ କରାଯାଇଥିଲା। କୋର୍ଟ କୁଲିଂ ଅଫ୍ ପିରିୟଡ୍ ବାଧ୍ୟତାମୂଳକ ବୋଲି କହିଥିଲେ। ନିହିତ ସ୍ବାର୍ଥକୁ ରୋକିବା ପାଇଁ ଏହି ବ୍ୟବସ୍ଥା ଲାଗୁ କରାଯାଇଥିବା ବେଳେ ବିସିସିଆଇ ସମ୍ବିଧାନ ଅନୁସାରେ ଏହା ରହିଛି। ବିସିସିଆଇ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ମାମଲା ପରିଚାଳନା କରିଥିଲେ। ୩ ବର୍ଷ କାର୍ଯ୍ୟକାଳ ମଧ୍ୟରେ ତୃଣମୂଳ ସ୍ତରରେ ନେତୃତ୍ୱ ନେବାର ଶୈଳୀ ବିକଶିତ ହେଉନଥିବା ନେଇ ଯୁକ୍ତି କରିଥିଲେ। ମଙ୍ଗଳବାର କୋର୍ଟ କୌଣସି ରାୟ ପ୍ରକାଶ କରିନଥିବା ବେଳେ ଆସନ୍ତା କାଲି ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରିଛନ୍ତି।
