ମହାକାଳପଡ଼ା, ୧୨ା୧୦(ପ୍ରତାପ ଚନ୍ଦ୍ର ସ୍ବାଇଁ): ଛାତ୍ର ସଂସଦ ନିର୍ବାଚନ ପାଇଁ କେନ୍ଦ୍ରାପଡ଼ା ଜିଲା ମହାକାଳପଡ଼ା ସଦର ମହକୁମାସ୍ଥିତ ବାୟା ବାବା କଲେଜ କ୍ୟାମ୍ପସ ଚଳଚଞ୍ଚଳ ହୋଇଛି। ସଂସଦ ଦଖଲ ପାଇଁ ଉଭୟ ବିଜୁ ଛାତ୍ର ଜନତା ଦଳ(ବିସିଜେଡି) ଓ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି)ର ପ୍ରାର୍ଥୀମାନେ ନିଜ ସପକ୍ଷରେ ଭୋଟ ନେବା ପାଇଁ ପ୍ରଚାର ଅଭିଯାନକୁ ଜୋରଦାର କରିଛନ୍ତି। ଏଥିପାଇଁ ସେମାନେ ବିଭିନ୍ନ ରଣକୌଶଳ ଅବଲମ୍ବନ କରୁଥିବା ଦେଖାଯାଉଛି। ବିସିଜେଡି ଓ ଏବିଭିପି ଛାତ୍ର ସଙ୍ଗଠନ ପଛରେ ସେମାନଙ୍କ ରାଜନୈତିକ ଦଳମାନେ ରହି ଗୋଟି ଚାଳନା କରୁଛନ୍ତି। ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପୂର୍ବରୁ ଏହା ଉଭୟ ଶାସକ ଭାଜପା ଓ ବିରୋଧୀ ବିଜେଡି ପାଇଁ ଏସିଡ ଟେଷ୍ଟ ସଦୃଶ ହୋଇଛି। ତେଣୁ କଲେଜରେ ଅଧ୍ୟୟନ କରୁଥିବା ଛାତ୍ରୀଛାତ୍ରଙ୍କୁ ଏହି କମ୍ ସମୟରେ କିପରି ଭେଟା ଯାଇପାରିବ ତାହା ଉପରେ ପ୍ରାର୍ଥୀମାନେ ଗୁରୁତ୍ୱାରୋପ କରୁଛନ୍ତି। କଲେଜ ଆଖପାଖ ଗାଁରେ ଥିବା ଛାତ୍ରୀଛାତ୍ରଙ୍କୁ ଭେଟିବା ଉପରେ ଜୋର ଦିଆଯାଉଛି। ସର୍ବୋପରି ସୋସିଆଲ ମିଡିଆରେ ପ୍ରାର୍ଥୀମାନେ ନିଜ ସପକ୍ଷରେ ଅପିଲ କରିବା ଚର୍ଚ୍ଚାର ବିଷୟ ହୋଇଛି।