ଜେରୁଜେଲମ୍,୧୧ା୧୦: ପାଲେଷ୍ଟାଇନ୍ର ହମାସ୍ ଆତଙ୍କବାଦୀ ଏବଂ ଇସ୍ରାଏଲ୍ ମଧ୍ୟରେ ଯୁଦ୍ଧ ମଙ୍ଗଳବାର ଚତୁର୍ଥ ଦିନରେ ପହଞ୍ଚତ୍ଥିବାବେଳେ ମୃତ୍ୟୁସଂଖ୍ୟା ୧,୬୦୦ ଅତିକ୍ରମ କରିଛି। ଗାଜା ସ୍ବାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁଯାୟୀ ଇସ୍ରାଏଲ୍ ସେନା ଆକ୍ରମଣରେ ୧୪୩ ଶିଶୁ ଓ ୧୦୫ ମହିଳାଙ୍କ ସମେତ ମୋଟ ୭୦୪ ଜଣଙ୍କ ମୃତ୍ୟୁ ଘଟିଛି। ଏହା ବ୍ୟତୀତ ୪,୦୦୦ରୁ ଅଧିକ ଆହତ ହୋଇଛନ୍ତି। ଅନ୍ୟପକ୍ଷରେ ହମାସ୍ ବିଦ୍ରୋହୀଙ୍କ ଆକ୍ରମଣରେ ଇସ୍ରାଏଲ୍ର ଅନୂ୍ୟନ ୯୦୦ ଲୋକ ନିହତ ହୋଇଥିବାବେଳେ ୨,୬୦୦ ଆହତ ହୋଇଛନ୍ତି। ଇସ୍ରାଏଲ୍ରୁ ୧,୫୦୦ ହମାସ୍ ବିଦ୍ରୋହୀଙ୍କ ମୃତଦେହ ମିଳିଥିବା ବେଳେ ଦେଶର ଦକ୍ଷିଣ ଭାଗକୁ ସମ୍ପୂର୍ଣ୍ଣ ନିୟନ୍ତ୍ରଣକୁ ଆଣିଥିବା ସୈନ୍ୟବାହିନୀ ଦାବି କରିଛି। ଇସ୍ରାଏଲ୍ ଜୋର୍ଦାର ବୋମାମାଡ଼ ଜାରି ରଖିଥିବାରୁ ଗାଜାରୁ ୧,୮୭,୫୧୮ ଲୋକ ଜୀବନ ଭୟରେ ଘରଦ୍ୱାର ଛାଡ଼ି ପଳାଇଗଲେଣି ବୋଲି ଜାତିସଂଘ ମାନବୀୟ ବ୍ୟାପାର କାର୍ଯ୍ୟାଳୟ ପକ୍ଷରୁ କୁହାଯାଇଛି। ୧,୩୭,୪୨୭ ଜଣ ୟୁଏନ୍ଆର୍ଡବ୍ଲ୍ୟୁଏର ୮୩ ସ୍କୁଲ୍ରେ ଆଶ୍ରୟ ନେଇଛନ୍ତି।
ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ହମାସ୍ ଆତଙ୍କବାଦୀଙ୍କ ଗୁପ୍ତ ଆଡ୍ଡାକୁ ଧ୍ୱଂସ କରିବାକୁ ସଂକଳ୍ପ କରିଛନ୍ତି। ସେ କହିଛନ୍ତି, ଆମେ ଯୁଦ୍ଧ ଚାହୁଁ ନ ଥିଲୁ, ଆମକୁ ଏଥିପାଇଁ ବାଧ୍ୟ କରାଯାଇଛି। ଇସ୍ରାଏଲ୍ ଯୁଦ୍ଧ ଆରମ୍ଭ କରି ନ ଥିଲା, କିନ୍ତୁ ଏହାର ପରିସମାପ୍ତ ଘଟାଇବ ବୋଲି ସେ କହିଛନ୍ତି। ନେତାନ୍ୟାହୁ ହମାସ୍କୁ ଇସ୍ଲାମୀୟ ଆତଙ୍କବାଦୀ ସଂଗଠନ ଆଇଏସ୍ ସହ ତୁଳନା କରିଛନ୍ତି। ହମାସ୍କୁ ପରାଜିତ କରିବା ଲାଗି ସବୁ ସଭ୍ୟତାର ଶକ୍ତି ଏକଜୁଟ ହେବେ ବୋଲି ସେ ଏକ୍ସରେ ପୋଷ୍ଟ କରିଛନ୍ତି। ଗାଜା ଷ୍ଟ୍ରିପ୍କୁ ଚାରିପଟୁ ସମ୍ପୂର୍ଣ୍ଣ ଅବରୋଧ କରିବା ସହ ସେଠାକୁ ଖାଦ୍ୟ, ଇନ୍ଧନ, ବିଦ୍ୟୁତ୍ ବନ୍ଦ କରିଦେବ ବୋଲି ସୋମବାର ଇସ୍ରାଏଲ୍ କହିଥିଲା। ଇତିମଧ୍ୟରେ ଗାଜାକୁ ଇସ୍ରାଏଲ୍ ବିଦ୍ୟୁତ୍ ଯୋଗାଣ ସମ୍ପୂର୍ଣ୍ଣ ବନ୍ଦ କରିଦେଇଛି। ଗାଜାର ନିରୀହ ଲୋକଙ୍କ ଘର ଉପରେ ଇସ୍ରାଏଲ୍ ବୋମାମାଡ଼ କଲେ ବହୁମୂଲ୍ୟ ଦେବାକୁ ପଡ଼ିବ ବୋଲି ହମାସ୍ ମୁଖପାତ୍ର ଅବୁ ଉବାଇଡା କହିଛନ୍ତି। ଏହାର ଜବାବରେ ହମାସ୍ ବନ୍ଦୀ କରି ରଖିଥିବା ଇସ୍ରାଏଲୀଙ୍କ ମୁଣ୍ଡକାଟ କରିବ ବୋଲି ସୋମବାର ଧମକ ଦେଇଥିଲା। ଇତିମଧ୍ୟରେ ଇସ୍ରାଏଲ୍କୁ ଆମେରିକା ଅସ୍ତ୍ରଶସ୍ତ୍ର ଓ ଅନ୍ୟାନ୍ୟ ସାମରିକ ସହାୟତା ଯୋଗାଇ ଦେଇଥିବାବେଳେ ପାଲେଷ୍ଟାଇନ୍ ରାଷ୍ଟ୍ରପତି ମହମ୍ମଦ ଆବ୍ବାସ୍ ରୁଷିଆ ଗସ୍ତରେ ଯିବେ ବୋଲି ଆଶା କରାଯାଉଛି। ହମାସ୍ ଆତଙ୍କବାଦୀଙ୍କ ଆକ୍ରମଣରେ ଅନୂ୍ୟନ ୧୧ ଆମେରିକୀୟ ନିହତ ହେଲେଣି। ହମାସ୍ ଅପହରଣ କରିନେଇଥିବା ଲୋକଙ୍କ ମଧ୍ୟରେ ଆମେରିକୀୟ ଥାଇପାରନ୍ତି ବୋଲି ରାଷ୍ଟ୍ରପତି ଜୋ ବାଇଡେନ୍ କହିଛନ୍ତି।
ଆମେରିକା, ଫ୍ରାନ୍ସ, ଜର୍ମାନୀ, ଇଟାଲି ଓ ବ୍ରିଟେନ୍ ଯୁଦ୍ଧରେ ଇସ୍ରାଏଲ୍କୁ ସମର୍ଥନ କରୁଥିବା ମଙ୍ଗଳବାର ଏକ ମିଳିତ ବିବୃତିରେ ଘୋଷଣା କରିଛନ୍ତି। ହମାସ୍ର ଆତଙ୍କବାଦୀ କାର୍ଯ୍ୟାନୁଷ୍ଠାନର କୌଣସି ଯଥାର୍ଥତା ନାହିଁ। ଏହା ବିଶ୍ୱବ୍ୟାପୀ ନିନ୍ଦା କରାଯିବା ଆବଶ୍ୟକ। ଏଭଳି ଅତ୍ୟାଚାରରୁ ଆମେ ଆମ ନାଗରିକମାନଙ୍କ ସୁରକ୍ଷା ପାଇଁ ଇସ୍ରାଏଲ୍ର ଉଦ୍ୟମକୁ ସମର୍ଥନ କରୁଛୁ ବୋଲି ଉପରୋକ୍ତ ଦେଶଗୁଡ଼ିକ କହିଛନ୍ତି।
