ରାୟପୁର,୪।୪: ଛତିଶଗଡ଼ରେ ନକ୍ସଲ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳିବିନିମୟରେ ୨୨ ଜଣ ଯବାନ ଶହୀଦ ହୋଇଛନ୍ତି। ତେବେ ଏହି ଯବାନଙ୍କ ପ୍ରତି ଆକ୍ରମଣରେ ୧୫ରୁ ଅଧିକ ନକ୍ସଲ ନିପାତ ହୋଇଛନ୍ତି । ଏନେଇ ଛତିଶଗଡ ବିଜାପୁର ଏସ୍ପି ସୂଚନା ଦେଇଛନ୍ତି। ଯବାନମାନଙ୍କ ମୃତଦେହକୁ ଫେରାଇ ଆଣିବା ଏବଂ ଆହତମାନଙ୍କୁ ସାହାଯ୍ୟ କରିବା ପାଇଁ ବାୟୁସେନା ହେଲିକପ୍ଟରଗୁଡ଼ିକ ଲଗାତାର ସେଠାରେ ନିୟୋଜିତ ଅଛି। କିନ୍ତୁ ଏବେ ସବୁଠୁ ବଡ ସମସ୍ୟା ହେଉଛି ସେଠାରେ କ୍ରମାଗତ ପାଗ ଖରାପ ହେବାରେ ଲାଗିଛି। ପ୍ରଥମ ଧୂଳି ଝଡ଼ ଯୋଗୁ ହେଲିକପ୍ଟରଗୁଡିକୁ ଉଡ଼ାଣ ହୋଇପାରି ନ ଥିଲା ଏବଂ ଏହା ପରେ ପ୍ରବଳ ପବନ ସହିତ ବର୍ଷା ଯୋଗୁ ଉଦ୍ଧାର କାର୍ଯ୍ୟ ବନ୍ଦ ରହିଛି। କିନ୍ତୁ ଏହି ପରିସ୍ଥିତିରେ ମଧ୍ୟ ଯବାନମାନେ ନିଜ ସାଥୀଙ୍କୁ ଫେରାଇ ଆଣିବାକୁ ସ୍ଥିର କରିଛନ୍ତି। ସେମାନେ ଶହୀଦ ଏବଂ ଆହତମାନଙ୍କୁ ଜଗଦଲପୁରକୁ ଆଣିବାରେ ନିୟୋଜିତ ଅଛନ୍ତି।
ଶହୀଦଙ୍କ ମୃତଦେହ ଜଗଦଲପୁରକୁ ଅଣାଯାଉଛି। ଜଗଦଲପୁର ବିମାନବନ୍ଦରରେ ଆର୍ମି ହେଲିକପ୍ଟର ଏମ୍-ଆଇ-୧୭ରେ ୧୨ ଯବାନଙ୍କ ମୃତଦେହ ଅଣାଯାଇଥିଲା। ଏଠାରୁ ଶହୀଦଙ୍କ ମୃତଦେହକୁ ୫ଟି ଆମ୍ବୁଲାନ୍ସ ମାଧ୍ୟମରେ ଡିମରାପାଲ ମେଡିକାଲ କଲେଜକୁ ଅଣାଯାଇଛି। ପୋଷ୍ଟମର୍ଟମ ପରେ ଏଠାରେ ଗର୍ଡ ଅଫ ଅନର ଦିଆଯିବ ଏବଂ ଶହୀଦଙ୍କ ମୃତଦେହ ବିଳମ୍ବିତ ରାତିରେ ନିଜ ସହରକୁ ପଠାଯିବ। ସୂଚନାଯୋଗ୍ୟ, ଛତିଶଗଡ ସୁକମା ଜିଲା ବିଜାପୁରର ତୋରମ ଥାନା ଜୋନାଗୁଡା ଜଙ୍ଗଲ ରେନକ୍ସଲ ଓ ସୁରକ୍ଷାକର୍ମୀ ମୁହାଁମୁହିଁ ହୋଇଥିଲେ। ଏହି ଘଟଣାରେ ୨୨ ଜଣ ଯବାନ ସହିଦ ହୋଇଥିବା ସୂଚନା ମିଳିଥିବା ବେଳେ ୩୦ଜଣ ଯବାନ ଆହତ ହୋଇଛନ୍ତି।
