ନୂଆଦିଲ୍ଲୀ,୧୭।୫: ସଂସଦରେ ବ୍ୟାଙ୍କିଙ୍ଗ୍ ବ୍ୟବସ୍ଥା ଏବଂ ସାଧାରଣ ଜନତାଙ୍କୁ ନେଇ ଏକ ବଡ଼ ପ୍ରସଙ୍ଗ ଉଠିଛି। ସର୍ବନିମ୍ନ ଜମା ରାଶି ନ ରଖିପାରିବାରୁ ଦେଶର ବ୍ୟାଙ୍କଗୁଡ଼ିକ ଗ୍ରାହକଙ୍କଠାରୁ କୋଟି କୋଟି ଟଙ୍କାର ଜରିମାନା ଆଦାୟ କରିଛନ୍ତି। ଏହାକୁ ନେଇ ଆମ୍ ଆଦମୀ ପାର୍ଟି ଏମପି ରାଘବ ଚଢ଼ା ସରକାରଙ୍କୁ ଘେରିଛନ୍ତି।
ବଜେଟ୍ ଅଧିବେଶନରେ ଏମପି ରାଘବ ଚଢ଼ା ସରକାରୀ ତଥ୍ୟ ଉପସ୍ଥାପନ କରି ଏକ ଚକିତ କଲା ଭଳି ତଥ୍ୟ ଦେଇଛନ୍ତି। ସେ କହିଛନ୍ତି ଯେ, ଗତ ୩ଟି ଆର୍ଥିକ ବର୍ଷ (୨୦୨୨-୨୫) ମଧ୍ୟରେ ବ୍ୟାଙ୍କଗୁଡ଼ିକ କେବଳ ମିନିମମ ବାଲାନ୍ସ ଜରିମାନା ବାବଦକୁ ୧୯,୦୦୦ କୋଟି ଟଙ୍କା ସଂଗ୍ରହ କରିଛନ୍ତି।
ଏହି ଜରିମାନା ସବୁଠାରୁ ଗରିବ ଏବଂ ନିମ୍ନ ଆୟକାରୀ ବ୍ୟକ୍ତିଙ୍କ ଉପରେ ପଡୁଛି। କୌଣସି ଜରୁରୀ ପରିସ୍ଥିତିରେ ଟଙ୍କା ଉଠାଇ ନେଲେ ବ୍ୟାଙ୍କ ଜରିମାନା କାଟି ଦେଉଛି।
ଜଣେ ଗରିବ ଲୋକ ତା’ର ଜମା ପୁଞ୍ଜିରୁ କିଛି ଟଙ୍କା ଖର୍ଚ୍ଚ କଲେ, ବ୍ୟାଙ୍କ ମାସକୁ ୧୦୦ ଟଙ୍କା ହିସାବରେ ୬ ମାସରେ ୬୦୦ ଟଙ୍କା କାଟି ଦେଉଛି। ଫଳରେ ଗରିବ ଲୋକଟି ଅଧିକ ଗରିବ ହୋଇଯାଉଛି। ଗାଁ ଗହଳିର ବ୍ୟାଙ୍କ ଶାଖାରେ ୧ ରୁ ୩ ହଜାର ଟଙ୍କା ରଖିବାକୁ ପଡୁଛି। ଜରିମାନା ସହ ୧୮% GST ମଧ୍ୟ ଆଦାୟ କରାଯାଉଛି।
ରାଘବ ଚଢ଼ା କହିଛନ୍ତି ଯେ, ଏହି ବ୍ୟବସ୍ଥା “ଗରିବୀକୁ ଦଣ୍ଡିତ କରୁଛି”। ସେ ସରକାରଙ୍କ ନିକଟରେ ଦାବି କରିଛନ୍ତି, “ଯେପରି ଚାଷୀଙ୍କ ଋଣ ଛାଡ଼ କରାଯାଉଛି, ସେହିପରି ଗରିବଙ୍କ ଉପରୁ ମିନିମମ ବାଲାନ୍ସ ଜରିମାନା ମଧ୍ୟ ଛାଡ଼ କରାଯାଉ। ଏହାଦ୍ୱାରା ଲୋକେ ସଞ୍ଚୟ କରିବାକୁ ଉତ୍ସାହିତ ହେବେ ଏବଂ ଆର୍ଥିକ ଅନ୍ତର୍ଭୁକ୍ତିକରଣ ସଫଳ ହେବ।”
