ନୀଳଗିରି,୫ା୧(ସ୍ବ.ପ୍ର.): ସ୍ପଷ୍ଟ ଦିବାଲୋକରେ ବାଲେଶ୍ୱର ଜିଲା ନୀଳଗିରି ବ୍ଲକ ଅନ୍ତର୍ଗତ ବରହମପୁର ଥାନା ଅଞ୍ଚଳରେ ପୁଣି କଳା ପଲସର ଆତଙ୍କ ସୃଷ୍ଟି ହୋଇଛି। ସ୍ପଷ୍ଟ ଦିବାଲୋକରେ ଗୁରୁବାର ୧୯ ନଂ ରାଜ୍ୟ ରାଜପଥ ଶେରଗଡ଼ – ନୀଳଗିରି – କପ୍ତିପଦା ରାସ୍ତା ଜାମୁନା ଛକରେ ଥିବା ଏକ ଏସ୍ବିଆଇ ଏଟିଏମ୍ରେ ଟଙ୍କା ଭର୍ତ୍ତି କରା ଯାଉଥିବା ବେଳେ ୭ଜଣ ଦୁର୍ବୃତ୍ତ ସେଠାରେ ପହଞ୍ଚି ବନ୍ଧୁକ ଓ ଭୁଜାଲି ଦେଖାଇ ଭଙ୍ଗାରୁଜା କରି ଟଙ୍କା ଲୁଟି ନେଇଛନ୍ତି।
ଅନ୍ୟପକ୍ଷରେ ବ୍ୟାଙ୍କ କର୍ମଚାରୀଙ୍କୁ ଓ ରୁଣ୍ଡ ହୋଇଥିବା ସ୍ଥାନୀୟ ଲୋକଙ୍କୁ ମାରଣାସ୍ତ୍ର ଦେଖାଇ ଭୟଭୀତ କରିବା ସହ ୩ ଲକ୍ଷ ଟଙ୍କା ଧରି ମୟୂରଭଞ୍ଜ ଜିଲା କପ୍ତିପଦା ରାସ୍ତାରେ ଖସି ଯାଇଛନ୍ତି। ଉକ୍ତ ଏସ୍ବିଆଇ ଏଟିଏମ୍ ଓ କିଓସ୍କ ବ୍ୟାଙ୍କର ମାଲିକ ଚନ୍ଦନ କୁମାର ସାହୁଙ୍କୁ ମଧ୍ୟ ଆକ୍ରମଣ କରିଥିଲେ। ଯିବା ସମୟରେ ଗୋଟିଏ ଭୁଜାଲିକୁ ଲୁଟେରାମାନେ ଛାଡ଼ି ଦେଇଛନ୍ତି। ଖବର ପାଇ ବରହମପୁର ପୋଲିସ ପହଞ୍ଚି ତନାଘନା କରିଥିବା ବେଳେ ଘଟଣାସ୍ଥଳଠାରୁ କିଛି ଦୂରରେ ଗୋଟିଏ ଗୁଳି ଜବତ କରିବା ସହ ସିସିଟିଭି ମାଧ୍ୟମରେ ଛାନ୍ଭିନ୍ କରୁଥିବା ଦେଖିବାକୁ ମିଳିଛି।
