ବୈପାରିଗୁଡ଼ା,୧୯ା୫ (ଡି.ଏନ୍.ଏ.): ବ୍ୟାଙ୍କରୁ କମ୍ ସୁଧରେ ସ୍ବର୍ଣ୍ଣ ବନ୍ଧକ ଋଣ ନେଇ କୃଷି କାର୍ଯ୍ୟରେ ଲଗାଇଥାନ୍ତି ଚାଷୀ। ମାତ୍ର ଏକ ରାଷ୍ଟ୍ରାୟତ୍ତ ବ୍ୟାଙ୍କରୁ ଋଣ ନେଇ ବୈପାରିଗୁଡ଼ା ବ୍ଲକର ଜଣେ ଚାଷୀଙ୍କୁ ହଇରାଣ ହେବାକୁ ପଡୁଛି ା ସେ ଋଣ ପରିଶୋଧ କରି ସାରିଥିଲେ ମଧ୍ୟ ୫ବର୍ଷ ହେଲା ସମ୍ପୃକ୍ତ ବ୍ୟାଙ୍କ ତାଙ୍କ ସୁନା ଅଳଙ୍କାର ଫେରାଉନାହିଁ।
ଖବରରୁ ଜଣାପଡ଼ିଛି, ବୈପାରିଗୁଡ଼ା ବ୍ଲକ ମହୁଲି ପଞ୍ଚାୟତ ତୋଲା ଗ୍ରାମର ସ୍ବର୍ଗତ ଜଗବନ୍ଧୁ ମାଳି ଚାଷକାମ ପାଇଁ ୨୦୧୬ରେ ବୈପାରିଗୁଡ଼ା ଇଣ୍ଡିଆନ ଓଭରସିଜ୍ ବ୍ୟାଙ୍କ(ଆଇଓବି)ରୁ ୧୧ା୫ା୧୬ରେ ୧୨ ଗ୍ରାମର ସୁନା ଅଳଙ୍କାର ବନ୍ଧକ ରଖି ୧୩ ହଜାର ଟଙ୍କା ଋଣ ନେଇଥିଲେ। ତାଙ୍କର ଲୋନ୍ ଆକାଉଣ୍ଟ ନମ୍ବର ୦୪୬୮୦୩୪୬୨୦୦୦୦୫୩ ଥିଲା। ୩୦ା୧୨ା୧୭ରେ ଜଗନ୍ଧୁଙ୍କ ମୃତ୍ୟୁ ହୋଇଥିଲା। ୯ା୧ା୨୦୧୮ରେ ଜଗବନ୍ଧୁଙ୍କ ଜ୍ୱାଇଁ ଲକ୍ଷ୍ମୀପୁର ମାଳିଗୁଡ଼ା ଗ୍ରାମର ଦୀନବନ୍ଧୁ ମାଳି ଆଇଓବି ବ୍ୟାଙ୍କକୁ ଯାଇ ସୁନା ମୁକୁଳାଇବା ପାଇଁ ମୂଳ ଟଙ୍କା ସହ ସୁଧ ମିଶାଇ ମୋଟ ୧୪ ହଜାର ୧ ଶହ ଟଙ୍କା ପୈଠ କରିଥିଲେ। ବ୍ୟାଙ୍କ ମଧ୍ୟ ଲୋନ୍ ଆକାଉଣ୍ଟ କ୍ଲୋଜ୍ କରିଥିଲା। ମାତ୍ର ବନ୍ଧକ ସୁନା ଅଳଙ୍କାର ଫେରାଇବା ପାଇଁ ବ୍ୟାଙ୍କ କିଛିଦିନ ସମୟ ନେଇଥିଲା। ବ୍ୟାଙ୍କ ପରାମର୍ଶକ୍ରମେ ଦୀନବନ୍ଧୁ ସ୍ବର୍ଗତ ଜଗବନ୍ଧୁ ମାଳିଙ୍କ ମୃତ୍ୟୁ ପ୍ରମାଣପତ୍ର ଓ ଉତ୍ତରାଧିକାରୀ ପ୍ରମାଣପତ୍ର ଦାଖଲ କରିଥିଲେ। ସେତେବେଳେ ଜଗବନ୍ଧୁଙ୍କ ଉତ୍ତରାଧିକାରୀମାନେ ବ୍ୟାଙ୍କକୁ ଯାଇ ଉପସ୍ଥିତ ହୋଇଥିଲେ। ବ୍ୟାଙ୍କ ପକ୍ଷରୁ ସେମାନଙ୍କ ଫଟୋ ଉଠାଯାଇଥିଲା। ଏହା ସତ୍ତ୍ବେ ବ୍ୟାଙ୍କ ବନ୍ଧକ ରଖିଥିବା ସୁନା ଦେବାକୁ ଦିନ ପରେ ଦିନ ଗଡ଼େଇ ଚାଲିଥିଲା ା ସେ ମାସକୁ ପ୍ରାୟ୨୪/୨୫ ଥର ବ୍ୟାଙ୍କକୁ ଯାଇ ନିରାଶ ହୋଇ ଫେରଥିବା ଦୀନବନ୍ଧୁ କହିଛନ୍ତି। ପ୍ରତିଥର ବ୍ୟାଙ୍କ କର୍ତ୍ତୃପକ୍ଷ କିଛି ନା କିଛି ଆଳକରି ଦିନ ଗଡ଼େଇ ଚାଲନ୍ତି। ଇତିମଧ୍ୟରେ ୩ ଜଣ ବ୍ୟାଙ୍କ ମ୍ୟାନେଜରଙ୍କ ବଦଳି ହୋଇଗଲାଣି ା ମାତ୍ର ତାଙ୍କ ଶ୍ୱଶୁର ବନ୍ଧକ ରଖିଥିବା ସୁନା ଅଳଙ୍କାର ମିଳିପାରୁନାହିଁ। ବନ୍ଧକ ଥିବା ସୁନାର ଦାମ୍ ୭୦ ହଜାର ଟଙ୍କାରୁ ଊର୍ଦ୍ଧ୍ୱ ହେବ। ଏବେ ଏହି ସୁନା ଅଳଙ୍କାର ବ୍ୟାଙ୍କରେ ଅଛି କି ନାହିଁ ସେ ଆଶଙ୍କା ପ୍ରକାଶ କରିଛନ୍ତି। ସୂଚନାଯୋଗ୍ୟ, ଉକ୍ତ ବ୍ୟାଙ୍କ ଶାଖାରୁ ଜମାକାରୀଙ୍କ ଖାତାରୁ ପ୍ରାୟ ୮୦ ଲକ୍ଷ ଟଙ୍କା ହଡ଼ପ କରିବା ଘଟଣାରେ ଜଣେ କର୍ମଚାରୀଙ୍କୁ ଗତବର୍ଷ ପୋଲିସ ଗିରଫକରି କୋର୍ଟ ଚାଲାଣ କରିଥିଲା।
