ନବରଙ୍ଗପୁର, ୨୮।୯ ( ବି.ପ୍ର.): ଚଳିତ ମାସ ୩୦ ଓ ଅକ୍ଟୋବର ୧ ଦିଲ୍ଲୀରେ ହେବାକୁ ଥିବା ଜାତୀୟ ସ୍ବଚ୍ଛତା ସମାରୋହରେ ଭାଗନେଇ ନିଜର ପ୍ରକଳ୍ପ ପ୍ରଦର୍ଶନ କରିବା ପାଇଁ ଭାରତ ସରକାରଙ୍କ ମୁଖ୍ୟ ବିଜ୍ଞାନ ପରାମର୍ଶଦାତା କାର୍ଯ୍ୟାଳୟରୁ ନିମନ୍ତ୍ରଣ ପାଇଛନ୍ତି ପ୍ରଧାନମନ୍ତ୍ରୀ ବାଲ୍ ପୁରସ୍କାର ବିଜୟିନୀ ବନିତା ଦାସ । ଏହି ଅବସରରେ ସେ ଆଇଆଇଟି ଦିଲ୍ଲୀ ଓ ରାଷ୍ଟ୍ରପତି ଭବନରେ ଆୟୋଜିତ କାର୍ଯ୍ୟକ୍ରମରେ ଯୋଗଦେଇ ବିଭିନ୍ନ ସ୍ବଚ୍ଛତା ପ୍ରକଳ୍ପ ପ୍ରଦର୍ଶନ କରିବା କାର୍ଯ୍ୟକ୍ରମ ରହିଛି । ଏଥିପାଇଁ ସେ ଦିଲ୍ଲୀ ଗସ୍ତ କରିଛନ୍ତି। ଭାରତ ସରକାରଙ୍କ ମୁଖ୍ୟ ବିଜ୍ଞାନ ପରାମର୍ଶଦାତା ଓ ପ୍ରଧାନମନ୍ତ୍ରୀ କାର୍ଯ୍ୟାଳୟର ଇନ୍ଭେଷ୍ଟ୍ଟ ଇଣ୍ଡିଆ ଦ୍ୱାରା ୱେଷ୍ଟ ଟୁ ୱେଲ୍ଥ ମିଶନରେ ସେ ସ୍ବଚ୍ଛତା ସାରଥି ରୂପେ ମନୋନୀତ ହୋଇ ବିଗତ ଏକ ବର୍ଷ ହେବ ସିଙ୍ଗଲ ୟୁଜ ପ୍ଲାଷ୍ଟିକକୁ କିଭଳି ପୁନଃ ଚକ୍ରଣ କରାଯାଇପାରିବ ସେ ବିଷୟରେ ବିଭିନ୍ନ ପ୍ରକଳ୍ପ ପ୍ରସ୍ତୁତ କରିଥିଲେ। ସେ ଅନେକ ବିଦ୍ୟାଳୟ ଏବଂ ବିଭିନ୍ନ ଅଞ୍ଚଳରେ ସ୍ବଚ୍ଛତା କାର୍ଯ୍ୟକ୍ରମର ଆୟୋଜନ କରିଥିଲେ। ମଧ୍ୟପ୍ରଦେଶର ଅମରକଣ୍ଟକରେ ଥିବା ନର୍ମଦା ନଦୀର ଉତ୍ପତ୍ତିସ୍ଥଳରେ ଏକ ସ୍ବଚ୍ଛତା କାର୍ଯ୍ୟକ୍ରମରେ ସେ ଭାଗ ନେଇଥିଲେ। ବନିତା ମହାକାଶ ବିଜ୍ଞାନରେ ନିଜର କୃତିତ୍ୱ ହାସଲ କରିବା ପରେ ସ୍ବଚ୍ଛତା କ୍ଷେତ୍ରରେ ମଧ୍ୟ ଜାତୀୟସ୍ତରରେ ନିଜର ପରିଚୟ ସୃଷ୍ଟିକରି ସମଗ୍ର ଓଡ଼ିଶା ତଥା ଅବିଭକ୍ତ କୋରାପୁଟ ଜିଲା ପାଇଁ ଗୌରବ ଆଣିିଛନ୍ତି ।
