ଢାକା,୬।୨: ପୁଣି ନିଆଁର ଆଁରେ ବାଂଲାଦେଶ। ଦେଶରେ ପୁଣି ହିଂସାକାଣ୍ଡ ଦେଖିବାକୁ ମିଳିଛି। ବୁଧବାର ବାଂଲାଦେଶର ପ୍ରତିଷ୍ଠାତା ତଥା ଶେଖ ହାସିନାଙ୍କ ବାପା ଶେଖ ମୁଜିବୁର ରହମାନଙ୍କ ଢାକାସ୍ଥିତ ବାସଭବନରେ ବିକ୍ଷୋଭକାରୀ ଭଙ୍ଗାରୁଜା କରିବା ସହ ନିଆଁ ଲଗାଇ ଦେଇଛନ୍ତି। ଏହି ଭଙ୍ଗାରୁଜା ସେତେବେଳେ ଘଟିଥିଲା ଯେତେବେଳେ ତାଙ୍କ ଝିଅ ଏବଂ ବହିଷ୍କୃତ ପ୍ରଧାନମନ୍ତ୍ରୀ ଶେଖ ହାସିନା ‘ଅନଲାଇନ’ରେ ଲୋକଙ୍କୁ ସମ୍ବୋଧିତ କରୁଥିଲେ।
ଯେତେବେଳେ ବାଂଲାଦେଶରେ ଖବର ପ୍ରଚାରିତ ହେଲା ଯେ ହସିନା ବୁଧବାର ରାତି ୯ଟାରେ ଭାଷଣ ଦେବାକୁ ଯାଉଛନ୍ତି, ସେତେବେଳେ ହାସିନାଙ୍କ ବିରୋଧୀ ଶିବିର ସକ୍ରିୟ ହୋଇ ଉଠିଲା। ହସିନାଙ୍କ ଭାଷଣ ବିରୋଧରେ ସୋସିଆଲ ମିଡିଆରେ ‘ବୁଲଡୋଜର ରାଲି’ ପାଇଁ ଡାକରା ଦିଆଯାଇଥିଲା। ଏହା ପରେ ସଂଧ୍ୟାରୁ ରାଜଧାନୀର ଧାନମଣ୍ଡି ଅଞ୍ଚଳରେ ଥିବା ଶେଖ ମୁଜିବୁର ରହମାନଙ୍କ ଘର ଆଗରେ ହଜାର ହଜାର ଲୋକ ଏକାଠି ହୋଇଥିଲେ।
କହି ରଖୁଛୁ ଯେ ବାଂଲାଦେଶ ସୱାଧୀନତାର କିଛି ବର୍ଷ ପରେ ଶେଖ ମୁଜିବୁର ରହମାନଙ୍କ ମୃତ୍ୟୁ ହୋଇଥିଲା। ତାଙ୍କୁ ୧୯୭୫ ମସିହାରେ ହତ୍ୟା କରାଯାଇଥିଲା। ପରେ ଢାକାରେ ତାଙ୍କ ବାସଭବନକୁ ଏକ ସ୍ମାରକୀ ସଂଗ୍ରହାଳୟରେ ପରିଣତ କରାଯାଇଥିଲା।
ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନା ତାଙ୍କ ଭାଷଣ ପୂର୍ବରୁ ତାଙ୍କ ବାପାଙ୍କ ଘରେ ପୋଡ଼ାଜଳା ଏବଂ ଭଙ୍ଗାରୁଜା ସମ୍ପର୍କରେ ସୂଚନା ପାଇଥିଲେ। ଏହା ପରେ ସେ ରାଗିଯାଇ ନିଜ ସମ୍ବୋଧନରେ ବଡ଼ ବୟାନ ଦେଇଥିଲେ। ସେ କହିଥିଲେ, ‘ମୁଁ ତୁମ ପାଇଁ କିଛି କରିନଥିଲି କି?’ ମୁଁ କାମ କରିନଥିଲି କି? ତେବେ ମୋ ବାପା ଯେଉଁଠାରୁ ସୱାଧୀନତାର ସ୍ଲୋଗାନ ଦେଇଥିଲେ, ମୋ ଘରକୁ କାହିଁକି ଭଙ୍ଗାଗଲା? ମୁଁ ନ୍ୟାୟ ଚାହୁଁଛି।ଏଥିସହ ସେ ୟୁନୁସ ସରକାରଙ୍କୁ ମଧ୍ୟ ଟାର୍ଗେଟ କରିଥିଲେ। ସେ କହିଥିଲେ, “ଲକ୍ଷ ଲକ୍ଷ ସହିଦଙ୍କ ଜୀବନର ମୂଲ୍ୟ ଦେଇ ଆମେ ଯେଉଁ ଜାତୀୟ ପତାକା, ସମ୍ବିଧାନ ଏବଂ ସୱାଧୀନତା ଅର୍ଜନ କରିଛୁ, ତାହାକୁ ବୁଲଡୋଜର କରିଦେବା ପାଇଁ ସେମାନଙ୍କ ପାଖରେ ଏପର୍ଯ୍ୟନ୍ତ ଶକ୍ତି ନାହିଁ। ସେମାନେ କୋଠା ଭାଙ୍ଗି ପାରିବେ, କିନ୍ତୁ ଇତିହାସକୁ ନୁହେଁ। ସେମାନେ ଏହା ମଧ୍ୟ ମନେ ରଖିବା ଉଚିତ ଯେ ଇତିହାସ ଏହାର ପ୍ରତିଶୋଧ ନେଇଥାଏ।
