ଭୁବନେଶ୍ୱର,୧୩।୨(ବ୍ୟୁରୋ):ବନ୍ଧୁକ ଦେଖାଇ ଆତଙ୍କ ଖେଳାଉଥିଲେ। ନିଜକୁ ଲୋକାଲ ଡନ୍ କହି ବ୍ୟବସାୟୀଙ୍କଠାରୁ ବଟି ଆଦାୟ କରୁଥିଲେ। ଅଭିଯୋଗ ପରେ ଶେଷରେ କ୍ୟାପିଟାଲ ଥାନା ପୋଲିସ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିଛି। ସେ ହେଲେ ଏହି ଥାନା ଅନ୍ତର୍ଗତ କେଦାରପଲ୍ଲୀ ବସ୍ତିରେ ରହୁଥିବା ବାଙ୍ଗା ନାୟକ। ତାଙ୍କଠାରୁ ଗୋଟିଏ ଦେଶୀ ବନ୍ଧୁକ ସହ ଗୋଟିଏ ଅଫୁଟା ଗୁଳି ଜବତ ହୋଇଛି। ତେବେ ଚଢ଼ାଉ ସମୟରେ ବାଙ୍ଗା ପୋଲିସ ଉପରକୁ ଗୁଳି ଚଳାଇ ଖସି ଯିବାକୁ ଚେଷ୍ଟା କରିଥିଲେ। ହେଲେ ପୋଲିସ ଟିମ୍ ଚାରିପଟୁ ଘେରାଉ କରି ବହୁ କଷ୍ଟରେ ତାଙ୍କୁ ଗିରଫ କରିବାରେ ସଫଳ ହୋଇଛି। ଏନେଇ ପୋଲିସ ଆର୍ମ ଆକ୍ଟ ସହ ୩୮୭ ଦଫାରେ ମାମଲା (ନଂ ୯୫/୨୩) ରୁଜୁ କରି ରବିବାର ତାଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ବାଙ୍ଗାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ବାଙ୍ଗାଙ୍କ ନାମରେ ପୂର୍ବରୁ ବିଭିନ୍ନ ଥାନାରେ ଚୋରି, ଛିନ୍ତାଇ, ବୋମା ମାଡ଼, ହତ୍ୟା ଉଦ୍ୟମ ଭଳି ୨୦ରୁ ଊର୍ଦ୍ଧ୍ୱ ମାମଲା ରହିଛି। ସେ ବାରମ୍ବାର ଜେଲ୍ ଯାଇ ବେଲରେ ଆସିବା ପରେ ପୁଣି ଆପରାଧିକ କାର୍ଯ୍ୟରେ ସମ୍ପୃକ୍ତ ରହିଥିବା ପୋଲିସ ଜାଣିବାକୁ ପାଇଛି। ତେଣୁ ବାଙ୍ଗାକୁ ତଡିପାର କରାଯିବା ନେଇ ପଦକ୍ଷେପ ନିଆଯିବା ନେଇ ପ୍ରକ୍ରିୟା ଆରମ୍ଭ କରାଯାଉଥିବା ପୋଲିସ କହିଛି।
ସୂଚନାନୁସାରେ, ଶନିବାର ରାତି ୯ଟାରେ ଅଭିଯୁକ୍ତ ବାଙ୍ଗା ବାପୁଜୀନଗର ମାର୍କେଟରେ ଦୋକାନୀଙ୍କୁ ବନ୍ଧୁକ ଦେଖାଇ ଧମକ ଦେଉଥିବା କ୍ୟାପିଟାଲ ଥାନା ପୋଲିସ ବିଶେଷସୂତ୍ରରୁ ଖବରପାଇ ଘଟଣାସ୍ଥଳକୁ ଯାଇଥିଲା। ହେଲେ ଏହାପୂର୍ବରୁ ଅଭିଯୁକ୍ତ ବାଙ୍ଗା ସେଠାରୁ ଫେରାର ହୋଇଯାଇଥିଲେ। ପୋଲିସ ତାଙ୍କୁ ଧରିବା ଲାଗି ବିଭିନ୍ନ ସ୍ଥାନରେ ଚଢାଉ କରୁଥିବାବେଳେ କେଦାରପଲ୍ଲୀ ବସ୍ତି ନିକଟ ଫ୍ଲାଏ ଓଭର ପାଖରେ ବାଙ୍ଗାକୁ ଠାବ କରିଥିଲେ। ପୋଲିସ ଟିମ ତାଙ୍କୁ ଧରିବା ଲାଗି ଉଦ୍ୟମ କରୁଥିବାବେଳେ ସେ ବନ୍ଧୁକ ଦେଖାଇ ଧମକ ଦେଇଥିଲେ। ପାଖକୁ ଆସିଲେ ଗୁଳି କରିଦେବାକୁ ବାରମ୍ବାର କହିବା ପୋଲିସ ସତର୍କତାର ସହ ଧରିବାକୁ ଯୋଜନା କରିଥିଲା। ଏଥିପାଇଁ ପୋଲିସ ଓ ବାଙ୍ଗା ମଧ୍ୟରେ ଛକାପଞ୍ଝା ଚାଲିଥିଲା। ଏହା ଭିତରେ ପୋଲିସ ଟିମ୍ ଚାରିପଟୁ ଘେରି ଯିବାରୁ ବାଙ୍ଗା ଶେଷରେ ରେଳଧାରଣାରେ ଦୌଡି ଫେରାର ହେବାକୁ ଚେଷ୍ଟା କରୁଥିବାବେଳେ ପୋଲିସ ତାଙ୍କୁ ଗୋଡ଼ାଇ ଧରିଥିଲା।
