ଚମ୍ପୁଆ,୧ା୧୧(ଡି.ଏନ୍.ଏ): କେନ୍ଦୁଝର ଜିଲା ଚମ୍ପୁଆ ଗାନ୍ଧୀଛକଠାରେ ଥିବା ମାର୍କେଟ କମ୍ପ୍ଲେକ୍ସ ଅସୁରକ୍ଷିତ ଅବସ୍ଥାରେ ରହିଛି। ଉପର ମହଲାର ସୁରକ୍ଷା ବାଡ଼ ଭାଙ୍ଗିଯାଇଥିବା ବେଳେ ସାହାରା ପାଇଁ ଏକ ବାଉଁଶ ବାନ୍ଧାଯାଇଛି। ଏହାର ପ୍ରତିକାର ନିମନ୍ତେ ଚମ୍ପୁଆ ଏନ୍ଏସିର ଆନ୍ତରିକତାର ଅଭାବ ଦେଖାଯାଇଛି। ଅଭିଯୋଗ ପରେ ଅଧିକାରୀମାନେ ବୁଲି ଦେଖିବା ସହ ଖର୍ଚ୍ଚ ଅଟକଳ କରୁଛନ୍ତି, ମାତ୍ର ମରାମତି ହେଉନାହିଁ।
ସୂଚନା ଅନୁସାରେ, ସରକାରଙ୍କ ନିୟମ ଅନୁସାରେ ରାସ୍ତାକଡ଼ ଉଚ୍ଛେଦ ଅଭିଯାନରେ ଭାଙ୍ଗିଥିବା ଦୋକାନୀଙ୍କୁ ୨୦୧୦/୧୧ରେ ଉକ୍ତ ମାର୍କେଟ କମ୍ପ୍ଲେସ ନିର୍ମାଣ କରାଯାଇ ଥଇଥାନ କରାଯାଇଥିଲା। ନିମ୍ନମାନର କାମ ଯୋଗୁ ମାତ୍ର ୧୨ ବର୍ଷରେ ଏହାର ଅବସ୍ଥା ବିଗିଡ଼ି ଗଲାଣି। କେତେକ ଦୋକାନ ଘର ଛାତରୁ ପ୍ଲାଷ୍ଟର ଖସୁଛି। ଗ୍ରାହକଙ୍କ ସୁରକ୍ଷା ଦୃଷ୍ଟିରୁ ଉପର ମହଲାରେ ନିର୍ମାଣ କରାଯାଇଥିବା ବାଡ଼ ଆଜକୁ ୪ବର୍ଷ ହେବ ଭାଙ୍ଗି ଯାଇଛି। ଗ୍ରାହକଙ୍କୁ ସୁରକ୍ଷା ଦୃଷ୍ଟିରୁ ଦୋକାନୀ ଏକ ବାଉଁଶ ବାନ୍ଧି ରଖିଛନ୍ତି। କେତେବେଳେ ଯେ ଅଘଟଣ ନ ଘଟିବ କହିହେବ ନାହିଁ। ଏ ନେଇ ଦୋକାନୀଙ୍କ ପକ୍ଷରୁ ଅଭିଯୋଗ ପରେ ତଦନ୍ତ ହେଉଛି। କିନ୍ତୁ ତିନି ତିନି ଜଣ ନିର୍ବାହୀ ଅଧିକାରୀଙ୍କ ବଦଳି ହୋଇଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ତାହା ନିର୍ମାଣ ହୋଇପାରିନାହିଁ। ଦୋକାନ ଗୃହ ବାବଦକୁ ଦୋକାନୀଙ୍କ ନିକଟରୁ ମାସିକ ଭଡ଼ା ଆଦାୟ କରାଯାଉଥିଲେ ମଧ୍ୟ ଅଭିଯୋଗର ସମାଧାନ ହେଉ ନ ଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି। ତୁରନ୍ତ ଏଥିପ୍ରତି ଦୃଷ୍ଟିଦେବାକୁ ଦୋକାନୀମାନେ ଦାବି କରିଛନ୍ତି। ଏ ନେଇ ଏନ୍ଏସି ଅଧ୍ୟକ୍ଷ ଗିରିଜା ଶଙ୍କର ସାହୁଙ୍କୁ ପଚାରିବାରୁ କହିଛନ୍ତି, ଏ ବିଷୟ ପ୍ରତି ଆମର ନଜର ରହିଛି। ଏକ ସପ୍ତାହ ମଧ୍ୟରେ କାର୍ଯ୍ୟ ଆରମ୍ଭ କରାଯିବ ବୋଲି ସୂଚନା ଦେଇଛନ୍ତି।
