ବାଲିମେଳା,୨୭ା୭(ଶିବଦତ୍ତ ସାହୁ): ଦିନକୁ ଦିନ ବାଉଁଶ ଗଜା(କରଡି)ର ଚାହିଦା ସ୍ଥାନୀୟ ଅଞ୍ଚଳରେ ବଢୁଛି। ଲୋକେ ଏଥିରେ ବିଭିନ୍ନ ପ୍ରକାର ବ୍ୟଞ୍ଜନ ପ୍ରସ୍ତୁତ କରି ଖାଉଥିବା ବେଳେ ଆଦିବାସୀମାନେ ଜଙ୍ଗଲରୁ ଏହାକୁ ସଂଗ୍ରହ କରି ବଜାରରେ ବିକ୍ରି କରି ବେସ ଦି ପଇସା ମଧ୍ୟ ରୋଜଗାର କରୁଛନ୍ତି । ଅନ୍ୟପକ୍ଷରେ ପ୍ରତିଦିନ ଜଙ୍ଗଲରୁ ବିପୁଳ ପରିମାଣରେ କରଡି ସଂଗ୍ରହ ହେଉଥିବା ଯୋଗୁ ମାଲକାନଗିରି ଜିଲାର ବିଭିନ୍ନ ଅଞ୍ଚଳରେ ବାଉଁଶ ଜଙ୍ଗଲ ପଦା ହେବାରେ ଲାଗିଛି। ବନ ବିଭାଗର କର୍ତ୍ତୃପକ୍ଷ ଓ କର୍ମଚାରୀମାନେ ଏ ଦିଗରେ ନୀରବ ରହୁଥିବାରୁ ଲୋକେ ବେଧଡକ ଭାବେ ଜଙ୍ଗଲରୁ କରଡି ସଂଗ୍ରହ କରି ଚାଲିଛନ୍ତି ।
ସୂଚନାଯୋଗ୍ୟ, କରଡି ସଂଗ୍ରହକରି ବଜାରରେ ବିକ୍ରି କରିବା ମାଲକାନଗିରି ଜିଲା ଆଦିବାସୀ ଜନଜାତିଙ୍କର ଅନ୍ୟ ଏକ ରୋଜଗାର ପନ୍ଥା। ବର୍ଷା ଦିନେ ପ୍ରତିଦିନ ସକାଳେ ଆଦିବାସୀମାନେ ଜଙ୍ଗଲକୁ ଯାଇ ବାଉଁଶ ମୂଳରୁ କରଡି ସଂଗ୍ରହ କରିଥାନ୍ତି
ଉପରେ ଥିବା ଅଂଶରୁ ମୋଟା ଆବରଣକୁ କାଟି ବିଡା ବାନ୍ଧିଥାନ୍ତି। ପ୍ରତି ବିଡ଼ାରେ ୪ ରୁ ୫ ଟି ଲେଖାଏ କରଡି ଥାଏ । କରଡିରେ ନାନା ପ୍ରକାର ସ୍ବାଦିଷ୍ଟ ବ୍ୟଞ୍ଜନ ପ୍ରସ୍ତୁତ କରି ସାଧାରଣ ଲୋକେ ମଧ୍ୟ ଏହାକୁ ଖାଦ୍ୟ ଭବେ ଗ୍ରହଣ କରିଥାନ୍ତି। ଜଣେ ଆଦିବାସୀ ବଜାରରେ କରଡି ବିକ୍ରି କରି ଦିନକୁ ହାରାହାରି ୩୦୦ ଟଙ୍କା ରୋଜଗାର କରିଥାନ୍ତି। ମାଲକାନଗିରି ଜିଲା କୋରୁକୋଣ୍ଡା, ବାଲିମେଳା, ଚିତ୍ରକୋଣ୍ଡା, କୁଡୁମୁଳୁଗୁମ୍ମା, ଖଇରପୁଟ, ମାଥିଲି ଓ ଗୋବିନ୍ଦାପାଲ୍ଲୀ ଆଦି ବିଭିନ୍ନ ଅଞ୍ଚଳରେ କରଡି ପ୍ରଚୁର ପରିମାଣରେ ଉପଲବ୍ଧ ହୋଇଥାଏ।
ଏହି ସବୁ ଅଞ୍ଚଳର ନିକଟବର୍ତ୍ତୀ ଜଙ୍ଗଲ ଗୁଡିକରେ ବାଉଁଶ ଗଛ ଥିବାରୁ ଲୋକେ ଉକ୍ତ ଜଙ୍ଗଲରୁ ଅଧିକରୁ ଅଧିକ କରଡି ସଂଗ୍ରହ କରିଥାନ୍ତି । ତେବେ ପ୍ରତିବର୍ଷ ବର୍ଷା ଦିନେ ଜଙ୍ଗଲରେ ଥିବା ବାଉଁଶ ଗଛ ମୂଳରେ ଗଜା ବାହାରିବା ସମୟରେ ସେଠାରୁ ବିପୁଳ ପରିମାଣର କରଡି ସଂଗ୍ରହ ହେଉଥିବା ଯୋଗୁ ଜଙ୍ଗଲରେ ବାଉଁଶ ଜଙ୍ଗଲ ଲୋପ ପାଉଥିବାରୁ ଅଞ୍ଚଳ ବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
