ପାରାଦୀପ, ୭ା୫(ସ୍ବ.ପ୍ର.) ପାରାଦୀପର ସବୁଠାରୁ ଚିତ୍ତବିନୋଦନ ସ୍ଥାନ ବାଲିଯାତ୍ରା ପଡ଼ିଆ ତଥା ବତୀଘର ପାଖ ସମୁଦ୍ର ବେଳାଭୂମି ଗତ ୬ ଦିନ ହେଲା ଅନ୍ଧାରରେ ରହିଛି। ଏହାଦ୍ୱାରା ଉକ୍ତ ସ୍ଥାନ ସା ପରଠାରୁ ଶୂନଶାନ ହେବା ସହ ଭୟାତୁର ପରିବେଶ ସୃଷ୍ଟି ହୋଇଛି। ଏନେଇ ପାରାଦୀପ ଅନ୍ତେବାସୀଙ୍କ ମଧ୍ୟରେ ଆଲୋଚନା ପର୍ଯ୍ୟାଲୋଚନା ହେଉଛି। ଏପରି ହେବା ପଛରେ ଠିକା କର୍ମଚାରୀଙ୍କ ଦରମା ବନ୍ଦ ବୋଲି ପୌର ପ୍ରଶାସନ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ପାରାଦୀପର ବାଲିଯାତ୍ରା ପଡ଼ିଆ ଅଞ୍ଚଳ ସବୁବେଳେ ପର୍ଯ୍ୟଟକ ଓ ସ୍ଥାନୀୟ ଲୋକଙ୍କ ପାଇଁ ଏକମାତ୍ର ଚିତ୍ତବିନୋଦନ ସ୍ଥାନ ଭାବେ ପରିଚିତ। କାରଣ ପ୍ରତିଦିନ ସେଠାରେ ଲୋକେ ବୁଲାବୁଲି କରିବା ସହ ସମୁଦ୍ର ଢେଉର ଦୃଶ୍ୟ ଉପଭୋଗ କରିଥାନ୍ତି। ବିଶେଷକରି ଖରାଦିନେ ଅଧିକ ଲୋକ ସେଠାରେ ରାତି ପର୍ଯ୍ୟନ୍ତ ରହିଥାନ୍ତି। ଲୋକଙ୍କ ସମାଗମ ଯୋଗୁ ପାରାଦୀପ ପୌରପରିଷଦ ପକ୍ଷରୁ ସେଠାରେ ଅନେକ ଆଖିଦୃଶିଆ ସୌନ୍ଦର୍ଯ୍ୟକରଣ କାମ କରାଯାଇଛି। ଏଠାରେ ପର୍ଯ୍ୟଟକ ସୁବିଧା କେନ୍ଦ୍ର, ବିଜୁ ମିନାର, ବାଲିଯାତ୍ରା ମଣ୍ଡପ, ଖୋଲା ବ୍ୟାୟାମ ସେଣ୍ଟର, ପିଲାଙ୍କ ପାଇଁ ଦୋଳି, ବସିବା ପାଇଁ ୫୦ରୁ ଅଧିକ ସିମେଣ୍ଟ ପିଣ୍ଡି, ବାଲି ଉପରେ କାଠପୋଲ, ଜାତୀୟ ପତାକା ତ୍ରିରଙ୍ଗା ସ୍ତମ୍ଭ, ଶାରଳା ମଣ୍ଡପ, କଙ୍କ୍ରିଟ ରାସ୍ତା, ପାର୍କିଂ ଏରିଆ, ଜେଏସଡବ୍ଲ୍ୟୁ କମ୍ପାନୀ ସହାୟତାରେ ହାଇଟେକ ଶୌଚାଳୟ, ନୌକା ଚାଳନା ଆଦି ଅନେକ ପ୍ରକଳ୍ପ କରାଯାଇଛି। ସା ସମୟରେ ଆକର୍ଷଣ ପାଇଁ ୪ଟି ସୁଉଚ୍ଚ ହାଇମାଷ୍ଟ ଲାଇଟ, ବେଳାଭୂମି ରାସ୍ତାରେ ୪ ଥାକିଆ ବିଦ୍ୟୁତ ଆଲୋକ, ଲିଚୁ ଲାଇଟ, ମ୍ୟୁଜିକ ବ୍ୟବସ୍ଥା ଆଦି କରାଯାଇଛି। ଏଥିପାଇଁ ସେଠାରେ ସା ସମୟରେ ହଜାରରୁ ଅଧିକ ଲୋକ ପରିବାର ସହ ବୁଲାବୁଲି କରିଥାନ୍ତି। ପୌରପରିଷଦ ସୌନ୍ଦର୍ଯ୍ୟକରଣ ପ୍ରକଳ୍ପର ପରିଚାଳନା, ସୁରକ୍ଷା ପାଇଁ ଠିକା କର୍ମଚାରୀ ରଖିଥିଲେ। ଏହାବ୍ୟତୀତ ପୌରାଞ୍ଚଳର ବିଭିନ୍ନ ସ୍ଥାନରେ ହୋଇଥିବା ନୂଆ ପ୍ରକଳ୍ପ, ଜଳସାଥି, ସ୍ବଚ୍ଛ ସାଥି, ଆହାର କେନ୍ଦ୍ର ପରିଚାଳନା, ଆଶ୍ରୟକେନ୍ଦ୍ର ପରିଚାଳନା ପାଇଁ ସମୁଦାୟ ୫୫ ଜଣ ଠିକା କର୍ମଚାରୀ ପ୍ରାୟ ବର୍ଷେ ହେଲା ରହିଥିଲେ। ସେହି କର୍ମଚାରୀଙ୍କ ଦରମା ଗତ ୫ ମାସ ହେଲା ବନ୍ଦ ରହିଛି। ସେଥିପାଇଁ ଆମେ କାମକୁ ଯାଉନାହୁଁ ବୋଲି ପରେଶ ଦଳାଇ ନାମକ କର୍ମଚାରୀ କୁହନ୍ତି। ସେମାନଙ୍କ ଦରମା ବନ୍ଦ ସମ୍ପର୍କରେ ପୌରାଧ୍ୟକ୍ଷ ବସନ୍ତ ବିଶ୍ୱାଳଙ୍କୁ ପଚାରିଲେ କୁହନ୍ତି, ରାଜ୍ୟ ସରକାରଙ୍କ ନଗର ଉନ୍ନୟନ ବିଭାଗ ୬ ମାସ ତଳେ ଠିକା କର୍ମଚାରୀ ନିଯୁକ୍ତି ଉପରେ କଟକଣା ଜାରି କରିଛନ୍ତି। ସେଥିପାଇଁ ଆମ ଅଧିକାରୀମାନେ ତାଙ୍କ ଦରମା ରିଲିଜ କରୁନାହାନ୍ତି। ଏଥିପାଇଁ ଏପରି ସମସ୍ୟା ଉପୁଜିଛି। ଏନେଇ ଆଲୋଚନା ଜାରି ରହିଛି। ଖୁବଶୀଘ୍ର ଏହାର ସମାଧାନ ହୋଇଯିବ ବୋଲି ସେ କହିଛନ୍ତି।
