ବାଲେଶ୍ୱର ଅଫିସ, ୧୦।୧୨: ଦୀର୍ଘ ୮ ମାସ ହେଲା ପୌର ନିର୍ବାଚନ ଶେଷ ହୋଇଥିଲେ ମଧ୍ୟ ବାଲେଶ୍ୱର ସହରରେ କୌଣସି ଉନ୍ନତିମୂଳକ କାର୍ଯ୍ୟ ହୋଇନାହିଁ। ବାଲେଶ୍ୱର ପୌରପାଳିକାର ସ୍ଥାଣୁତାକୁ ନେଇ ଭାଜପାର ନଗର ଶାଖା ପକ୍ଷରୁ ଶୁକ୍ରବାର ଏକ ଖବରଦାତା ସମ୍ମିଳନୀ କରାଯାଇ ଉଦ୍ବେଗ ପ୍ରକାଶ କରାଯାଇଛି। ଏଥିରେ ଭାଜପା ସମର୍ଥିତ କାଉନସିଲରମାନେ ଯୋଗଦେଇ ଏହାର ପ୍ରତିବାଦ କରିଛନ୍ତି।
ସ୍ଥାୟୀ କାର୍ଯ୍ୟନିର୍ବାହୀ ଅଧିକାରୀ ନିଯୁକ୍ତି, ୱାର୍ଡ଼ଗୁଡ଼ିକରେ ଉନ୍ନୟନମୂଳକ କାର୍ଯ୍ୟ ପାଇଁ ପରିଷଦର ନିଷ୍ପତ୍ତି ଅନୁଯାୟୀ ଟେଣ୍ଡର ପ୍ରକ୍ରିୟା ଆରମ୍ଭ, ସହର ପରିମଳ ବ୍ୟବସ୍ଥା ଠିକ୍ ଢଙ୍ଗରେ ପରିଚାଳନା ପାଇଁ ଠିକାଦାରଙ୍କ ସହ ମଧୁଚନ୍ଦ୍ରିକା ବନ୍ଦ କରି ନୂତନ ଟେଣ୍ଡର ପ୍ରକ୍ରିୟା ଆରମ୍ଭ, ରକ୍ଷଣାବେକ୍ଷଣ ଅଭାବରୁ ବନ୍ଦ ପଡ଼ିଥିବା ଷ୍ଟ୍ରିଟ୍ଲାଇଟ୍ ମରାମତି ସହ ନୂତନ ଲାଇଟ୍ ଲଗାଇବା, ପୌରପାଳିକାରୁ ଜନସ୍ବାସ୍ଥ୍ୟ ବିଭାଗ ୧୦କୋଟି ଟଙ୍କା ନେଇଥିବା ସତ୍ତ୍ୱେ ଉକତ୍ଟ ହୋଇଥିବା ଜଳ ସମସ୍ୟାର ତୁରନ୍ତ ସମାଧାନ, ନୂତନ ଟାଉନ ବସ୍ ପ୍ରଚଳନ ପାଇଁ ଭାଜପା ନଗର ସଭାପତି ଚିତ୍ତରଞ୍ଜନ ପଣ୍ଡା, କାଉନସିଲର ସତ୍ୟଶିବ ସୁନ୍ଦର ଦାସ, ପୂର୍ବତନ କାଉନସିଲର ଜୟପ୍ରକାଶ ଦାଶ ପ୍ରମୁଖ ଦାବି କରିଥିଲେ। ସାମ୍ପ୍ରତିକ ସ୍ଥିତିରେ ପୌରପାଳିକାରେ ଉପୁଜିଥିବା ସମସ୍ୟା ଓ ତାହାର ନିରାକରଣ ସମ୍ପର୍କରେ ଆଲୋଚନା ହୋଇଥିଲା। ପୂର୍ବ ପୌରପରିଷଦ ଭାଙ୍ଗିବାର ସାଢ଼େ ୩ବର୍ଷ ପରେ ପୌର ନିର୍ବାଚନ ଦ୍ୱାରା ଏକକ ବ୍ୟକ୍ତି ପରିଚାଳିତ ପୌରପରିଷଦ ସମାପ୍ତି ସହ ନୂତନ ପରିଷଦ ଗଠନ ହୋଇଥିଲା। ମାତ୍ର ଅଧିକାରୀଙ୍କ ଉଦାସୀନତା ଯୋଗୁ ପରିଷଦରେ ଗ୍ରହଣ ହେଉଥିବା ନିଷ୍ପତ୍ତି ଅନୁଯାୟୀ ସହରରେ କୌଣସି ପ୍ରକାର ଉନ୍ନୟନମୂଳକ କାର୍ଯ୍ୟ ହୋଇପାରୁନାହଁି। ଦୀର୍ଘବର୍ଷ ଧରି ସ୍ଥାୟୀ କାର୍ଯ୍ୟନିର୍ବାହୀ ଅଧିକାରୀ ନିଯୁକ୍ତିରେ ରାଜ୍ୟ ସରକାରଙ୍କ ଉଦାସୀନତା ପାଇଁ ପୌରପାଳିକାର କାର୍ଯ୍ୟଦକ୍ଷତା ସଙ୍କୁଚିତ ହେଉଥିବା ସହ ବିଭିନ୍ନ ସମସ୍ୟା ଜଟିଳତା ମଧ୍ୟକୁ ଠେଲି ହୋଇଯାଉଛି। ନିର୍ବାଚିତ କାଉନସିଲରମାନେ ପୌର ପରିଷଦ ବୈଠକରେ ୱାର୍ଡ଼ରେ ଦେଖାଦେଉଥିବା ସମସ୍ୟା ନେଇ ବାରମ୍ବାର ସ୍ବର ଉତ୍ତୋଳନ କରୁଥିବା ସତ୍ତ୍ୱେ ଗୋଟିଏ ହେଲେ ନିଷ୍ପତ୍ତି କାର୍ଯ୍ୟକାରୀ ହୋଇପାରୁନାହିଁ। ମାସକୁ ମାସ ବଦଳୁଥିବା ନୂତନ କାର୍ଯ୍ୟନିର୍ବାହୀ ଅଧିକାରୀଙ୍କ ସହ ପୌରାଧ୍ୟକ୍ଷା ଓ କାଉନସିଲରମାନଙ୍କ ସମନ୍ବୟ ଅଭାବରୁ ବାଲେଶ୍ୱର ପୌରପାଳିକା ଏବେ ଦିଗଭ୍ରଷ୍ଟ ହୋଇଥିବା ଭାଜପା ନେତାମାନେ ଅଭିଯୋଗ କରିଥିଲେ। ଭାଜପା ମିଡିଆ ସହ ସଂଯୋଜକ ଅରୂପ ଜେନା ଖବରଦାତା ସମ୍ମିଳନୀର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ। ରୋଜାଲିନ ପାଣି, ଗୋରୀ ଦାଶ, ସସ୍ମିତା ନାଥ, ପ୍ରତିମା ବେହେରା, ନିରୂପମା ଦାଶ, ସୁଚିସ୍ମିତା ପଣ୍ଡା, ଭାରତୀ ପାତ୍ର, ନିତ୍ୟଗୋପାଲ ସିଂ ପ୍ରମୁଖ କାଉନସିଲରଙ୍କ ସମେତ ସଂଯୁକ୍ତା ମହାପାତ୍ର, କାର୍ତ୍ତିକ ନାଥ, ବିବେକାନନ୍ଦ ମହାନ୍ତି, ଶୈଳେନ୍ଦ୍ର ଦାସ ପ୍ରମୁଖ ଉପସ୍ଥିତ ଥିଲେ।
