ରାୟପୁର,୧୪ା୯: ସାରା ଦେଶରେ ଦିନକୁ ଦିନ କର୍କଟ ରୋଗୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ବିଶେଷକରି ରୋଗଠାରୁ ରୋଗୀର ମାନସିକ ଯନ୍ତ୍ରଣା ବର୍ତ୍ତମାନ ସମୟରେ ସବୁଠାରୁ ବଡ଼ ଚିନ୍ତାର କାରଣ ବୋଲି କୁହାଯାଉଛି। ଏଭଳି ମାନସିକ ଚିନ୍ତାରେ ପଡ଼ିଥିବା ବିଭିନ୍ନ ବର୍ଗର ଲୋକଙ୍କୁ ଉଭୟ ଆର୍ଥିକ ଓ ମାନସିକ ଚିନ୍ତାରୁ କିଛି ପରିମାଣରେ ଦୂରକରିବା ଲାଗି ନିକଟରେ ଛତିଶଗଡ଼ ନ୍ୟୁ ରାୟପୁରର ବାଲ୍କୋ ମେଡିକାଲ ସେଣ୍ଟରରେ ବିଏମ୍ସି ଚାରିଟେବୁଲ ଫଣ୍ଡ ଏବଂ ବିଏମ୍ସି କର୍କଟ ସ୍କ୍ରିନିଂ କାର୍ଯ୍ୟକ୍ରମର ଶୁଭାରମ୍ଭ ହୋଇଯାଇଛି। ଏହି ଅବସରରେ ବାଲ୍କୋ ମେଡିକାଲ ସେଣ୍ଟରର ଅଧ୍ୟକ୍ଷା ଜ୍ୟୋତି ଅଗ୍ରୱାଲ ମୁଖ୍ୟ ଅତିଥି ଭାବେ ଯୋଗଦେଇ ଏହାର ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ମେଡିକାଲର କର୍କଟ ରୋଗ ବିଶେଷଜ୍ଞ, ବରିଷ୍ଠ ଅଙ୍କୋଲୋଜିଷ୍ଟ, ନର୍ସ ଏବଂ ଅନ୍ୟ କର୍ମଚାରୀମାନେ ମଧ୍ୟ ଉପସ୍ଥିତ ଥିଲେ।
ଏ ସମ୍ପର୍କରେ ଜ୍ୟୋତି ଅଗ୍ରୱାଲ କହିଛନ୍ତି, ଏଠାରେ ଦେଶର ସର୍ବୋତ୍ତମ କର୍କଟ ଚିକିତ୍ସା ସୁବିଧା ଓ ସେବା ଯୋଗାଇ ଦିଆଯାଉଛି। ଏପରିକି ଆମର ସର୍ବୋତ୍ତମ ମେଡିକାଲ ଟିମ୍ ଏବଂ ପ୍ରଯୁକ୍ତିବିଦ୍ୟା ଅନ୍ୟମାନଙ୍କଠାରୁ ଅଧିକ ଗୁଣାତ୍ମକ ଏବଂ ଅତ୍ୟାଧୁନିକ ଜ୍ଞାନକୌଶଳର ସାମଗ୍ରୀ ସବୁ ଉପଲବ୍ଧ ରହିଛି।
