ଔପଦା, ୧୮।୮(ଧରିତ୍ରୀ ପଣ୍ଡା): ବାଲେଶ୍ୱର ଜିଲା ଔପଦା ଥାନା ଅଞ୍ଚଳରେ ଏକ ଅଭାବନୀୟ ଏବଂ ସମ୍ବେଦନଶୀଳ ଘଟଣା ସାମ୍ନାକୁ ଆସିଛି। ଜଣେ ଶିକ୍ଷୟତ୍ରୀଙ୍କୁ ଏକତରଫା ପ୍ରେମ କରି ଚାକିରିରୁ ବହିଷ୍କୃତ ହୋଇଥିବା ଜଣେ କନିଷ୍ଠ ଶିକ୍ଷକଙ୍କ ଉନ୍ମତ୍ତ କାଣ୍ଡ ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇ ଦେଇଛି। ଔପଦା ପିଏମ୍ଶ୍ରୀ ସରକାରୀ ଉଚ୍ଚ ବିଦ୍ୟାଳୟର ବହିଷ୍କୃତ ଚୁକ୍ତିଭିତ୍ତିକ କନିଷ୍ଠ ଶିକ୍ଷକ ପୃଥ୍ୱୀରାଜ କର ମଙ୍ଗଳବାର ଅପରାହ୍ନରେ ପ୍ରେମ କରୁଥିବା ଶିକ୍ଷୟତ୍ରୀଙ୍କ ଘରେ ପଶି ଏକ ଧାରୁଆ ଛୁରୀରେ ମରଣାତ୍ମକ ଆକ୍ରମଣ କରିଛନ୍ତି। ଏହି ବର୍ବର କାଣ୍ଡରେ ଶିକ୍ଷୟତ୍ରୀଙ୍କ ସମେତ ତାଙ୍କ ପରିବାରର ୫ ଜଣ ସଦସ୍ୟ ଗୁରୁତର ଭାବେ ଆହତ ହୋଇଛନ୍ତି।
ମିଳିଥିବା ସୂଚନା ମୁତାବକ, ଔପଦା ଥାନା ଅଧୀନ ଉକ୍ତ ବିଦ୍ୟାଳୟରେ ଯୁବତୀ ବିଜ୍ଞାନ ଶିକ୍ଷୟତ୍ରୀ ଭାବେ କାର୍ଯ୍ୟରତ ଅଛନ୍ତି। ଅଭିଯୁକ୍ତ ଶିକ୍ଷକ ପୃଥ୍ୱୀରାଜ ତାଙ୍କୁ ଦୀର୍ଘ ଦିନ ହେବ ଏକତରଫା ପ୍ରେମ କରିବା ସହ ଅଶ୍ଳୀଳ ବ୍ୟବହାର ଓ ମୋବାଇଲ୍ ମେସେଜ୍ ପଠାଉଥିବା ନେଇ ଗତ ୨୦.୦୯.୨୦୨୫ ତାରିଖରେ ଔପଦା ଥାନାରେ ଏକ ଲିଖିତ ଅଭିଯୋଗ ହୋଇଥିଲା। ଏହି ଘଟଣାକୁ ଆଧାର କରି ଥାନାରେ ମାମଲା ନଂ- ୧୫୩/୨୫ ରୁଜୁ କରାଯାଇଥିବାବେଳେ ଶିକ୍ଷା ବିଭାଗ ପକ୍ଷରୁ ଅଭିଯୁକ୍ତ ପୃଥ୍ୱୀରାଜଙ୍କୁ ଚାକିରୀରୁ ବହିଷ୍କାର କରାଯାଇଥିଲା।
ଚାକିରିରୁ ବହିଷ୍କୃତ ହେବା ପରେ ପ୍ରତିଶୋଧପରାୟଣ ହୋଇ ପୃଥ୍ୱୀରାଜ ମଙ୍ଗଳବାର ଅପରାହ୍ନ ପ୍ରାୟ ୪ଟା ସମୟରେ ଏକ ଧାରୁଆ କାତି ଧରି ପାଟପୁରସ୍ଥିତ ଶୁଚିସ୍ମିତାଙ୍କ ବାସଭବନରେ ପହଞ୍ଚିଥିଲେ। କିଛି ବୁଝିବା ଆଗରୁ ସେ ଅତର୍କିତ ଭାବେ ଘରେ ପଶି ପରିବାର ଲୋକଙ୍କୁ ଆକ୍ରମଣ କରିଥିଲେ। ଏହି ଘାତକ ଆକ୍ରମଣରେ ଶିକ୍ଷୟତ୍ରୀ, ତାଙ୍କ ବାପା, ମା’, ସାନ ଭାଇ ଏବଂ ଜଣେ ଦାଦା ଗୁରୁତର ଭାବେ ଆହତ ହୋଇଛନ୍ତି।
ଘଟଣାସ୍ଥଳରେ ଆହତମାନଙ୍କ ଚିତ୍କାର ଶୁଣି ଆଖପାଖର ଲୋକେ ଦୌଡ଼ି ଆସି ଅଭିଯୁକ୍ତ ପୃଥ୍ୱୀରାଜଙ୍କୁ କାବୁ କରିବା ସହ ବାନ୍ଧି ପକାଇଥିଲେ। ପରେ ଘଟଣା ସମ୍ପର୍କରେ ପୋଲିସକୁ ଖବର ଦିଆଯିବାରୁ ପୋଲିସ ସେଠାରେ ପହଞ୍ଚି ଅଭିଯୁକ୍ତଙ୍କୁ ଥାନାକୁ ଆଣିଛି। ଅନ୍ୟପକ୍ଷରେ, ସମସ୍ତ ଗୁରୁତର ଆହତଙ୍କୁ ଉଦ୍ଧାର କରାଯାଇ ତୁରନ୍ତ ଚିକିତ୍ସା ନିମନ୍ତେ ସୋର ହସ୍ପିଟାଲକୁ ପଠାଯାଇଛି।