କାବୁଲ,୩ା୭: ଯୁଦ୍ଧ ପ୍ରଭାବିତ ଆଫଗାନିସ୍ତାନରୁ କିଛି ସମୟ ଧରି ଆମେରକୀୟ ସେନା ପର୍ଯ୍ୟାୟକ୍ରମେ ସ୍ବଦେଶକୁ ଫେରିବାରେ ଲାଗିଛନ୍ତି। ଏହି କ୍ରମରେ ବଗ୍ରାମ ବାୟୁସେନା ଘାଟିରୁ ଆମେରିକା ଓ ନାଟୋ ସୈନ୍ୟ ପ୍ରତ୍ୟାବର୍ତ୍ତନ କରିଛନ୍ତି। ଆଫଗାନ ଜାତୀୟ ସୁରକ୍ଷା ଏବଂ ପ୍ରତିରକ୍ଷା ବଳକୁ ଉକ୍ତ ଏୟାରଫିଲ୍ଡ ସମ୍ପୂଣ୍ଣର୍ ରୂପେ ହସ୍ତାନ୍ତର କରାଯାଇଛି।
ଏହି ଅଞ୍ଚଳ ୨୦ ବର୍ଷ ଧରି କଠୋରପନ୍ଥୀଙ୍କ ବିରୋଧରେ ଲଢ଼େଇର କେନ୍ଦ୍ରସ୍ଥଳ ରହି ଆସିଥିଲା। ଆମେରିକା ଓ ନାଟୋ ସୈନ୍ୟଙ୍କ ପ୍ରତ୍ୟାହାର ଆଫଗାନିସ୍ତାନରୁ ଖୁବ୍ ଶୀଘ୍ର ସମସ୍ତ ବିଦେଶୀ ସୈନ୍ୟ ଫେରିଯିବେ ବୋଲି ଦର୍ଶାଉଛି। କିନ୍ତୁ ରାଜଧାନୀ କାବୁଲର ଉତ୍ତରରେ ଥିବା ଏହି ବିସ୍ତୃତ ସେନା ଘାଟିରୁ ସୈନ୍ୟ ପ୍ରତ୍ୟାହାର ଦେଶର ବିଭିନ୍ନ ପ୍ରାନ୍ତରେ ତାଲିବାନକୁ ଶକ୍ତି ବୃଦ୍ଧି ପାଇଁ ସୁଯୋଗ ଦେଇପାରେ।
୩ ହଜାର ଲୋକଙ୍କ ଜୀବନ ନେଇଥିବା ୯/୧୧ ଓ୍ବାଲର୍ଡ ଟ୍ରେଡ୍ ସେଣ୍ଟର ଆକ୍ରମଣର ୧୦ ବର୍ଷ ପୂର୍ତ୍ତି (ଆସନ୍ତା ସେପ୍ଟେମ୍ବର ୯) ସୁଦ୍ଧା ଆଫଗାନିସ୍ତାନରୁ ସମ୍ପୂର୍ଣ୍ଣ ସୈନ୍ୟ ପ୍ରତ୍ୟାହାର କରାଯିବ ବୋଲି ଆମେରିକା ରାଷ୍ଟ୍ରପତି ଜୋ ବାଇଡେନ୍ ପୂର୍ବରୁ ଘୋଷଣା କରିସାରିଛନ୍ତି। ଅଲ୍-କାଏଦା ପକ୍ଷରୁ ଏହି ଆତଙ୍କବାଦୀ ଆକ୍ରମଣ କରାଯାଇଥିଲା। ତାଲିବାନଠାରୁ ସହାୟତା ପାଇ ଅଲ୍-କାଏଦା ଆଫଗାନିସ୍ତାନରେ ସକ୍ରିୟ ଥିଲା। ଏହି ଆକ୍ରମଣ ପରେ ଆମେରିକା ନେତୃତ୍ୱାଧୀନ ନାଟୋ ସେନା ଆଫଗାନିସ୍ତାନରେ ଉଭୟ ତାଲିବାନ ଓ ଅଲ୍-କାଏଦା ଆତଙ୍କବାଦୀଙ୍କୁ ପରାଜିତ କରିଥିଲା। ଦୀର୍ଘ ସମୟ ଧରି ଚାଲିଥିବା ଲଢ଼େଇରେ ଅନେକ ଜୀବନ ଯାଇଥିଲା। ଏଥିରେ ଆମେରିକା ପକ୍ଷରୁ ବିପୁଳ ଅର୍ଥ ବ୍ୟୟ କରାଯାଇଥିଲା। ଆମେରିକା ଏବେ ଯୁଦ୍ଧ ଶେଷ କରିବାକୁ ଚାହୁଁଛି। ଆଫଗାନିସ୍ତାନରେ ୨୫୦୦-୩୦୦୦ ଆମେରିକୀୟ ସୈନ୍ୟ ଅଛନ୍ତି। ନାଟୋର ୭,୦୦୦ ସୈନ୍ୟଙ୍କ ସହ ଆମେରିକୀୟ ସୈନ୍ୟ ଫେରିଯିବା ପରେ ଆଫଗାନିସ୍ତାନରେ ୧ ହଜାରରୁ ବି କମ୍ ବିଦେଶୀ ସୈନ୍ୟ ରହିବେ। ଇତିମଧ୍ୟରେ ଆଫଗାନିସ୍ତାନରେ ତାଲିବାନର ପ୍ରଭାବ ବଢ଼ିବାରେ ଲାଗିଛି। ବିଦେଶୀ ସେନାର ପ୍ରତ୍ୟାବର୍ତ୍ତନକୁ ନେଇ ଉତ୍ସାହିତ ତାଲିବାନ ୫୦ରୁ ଊର୍ଦ୍ଧ୍ୱ ଜିଲାକୁ ଦଖଲ କରିସାରିଛି। ଫଳରେ ଦେଶରେ ଗୃହଯୁଦ୍ଧ ସୃଷ୍ଟି ହେବା ଆଶଙ୍କା ଦେଖାଦେଇଛି।
ବଗ୍ରାମ ଘାଟିର ଗୁରୁତ୍ୱ
୧୯୮୦ରେ ସୋଭିଏଟ୍ ୟୁନିୟନ୍ ଦଖଲ ବେଳେ ବଗ୍ରାମ ବାୟୁସେନା ଘାଟି ନିର୍ମାଣ କରାଯାଇଥିଲା। ନିକଟରେ ଥିବା ଏକ ଗ୍ରାମର ନାଁ ଅନୁସାରେ ଏହାର ନାମକରଣ କରାଯାଇଥିଲା। ରାଜଧାନୀ କାବୁଲର ୪୦ କି.ମି. ଉତ୍ତରରେ ଏହା ଅବସ୍ଥିତ। ଆମେରିକୀୟ ସେନା ୨୦୦୧ରେ ଏଠାରେ ପାଦ ଥାପି ଏହାକୁ ଆହୁରି ବଡ଼ ସାମରିକ ଘାଟିରେ ପରିଣତ କରିଥିଲା। ଘାଟିରେ ଏକସଙ୍ଗେ ପ୍ରାୟ ୧୦ ହଜାର ସୈନ୍ୟ ରହିପାରିବେ। ଏଠାରେ ଦୁଇଟି ରନ୍ଓ୍ବେ ରହିଛି। ନିକଟରେ ନିର୍ମିତ ୩.୬ କି.ମି. ବିସ୍ତୃତ ରନ୍ଓ୍ବେ’ରେ ବଡ଼ କାର୍ଗୋ ଓ ଏୟାରକ୍ରାଫ୍ଟ ଅବତରଣ କରିପାରିବ। ପାର୍କିଂ ପାଇଁ ଏଠାରେ ୧୧୦ଟି ସ୍ଥାନ ରହିଛି, ଯାହା ବିସ୍ଫୋରଣ ନିରୋଧୀ ପ୍ରାଚୀର ଦ୍ୱାରା ସୁରକ୍ଷିତ। ସେହିପରି ୫୦ ଶଯ୍ୟା ବିଶିଷ୍ଟ ହସ୍ପିଟାଲ, ୩ ଥିଏଟର ଓ ଏକ ଅଧୁନିକ ଦାନ୍ତ କ୍ଲିନିକ ମଧ୍ୟ ଏଠାରେ ରହିଛି। ଯୁଦ୍ଧବନ୍ଦୀଙ୍କୁ ରଖିବା ପାଇଁ ଉକ୍ତ ଘାଟିରେ ଏକ ଜେଲ୍ ରହିଛି।
