ମାଲକାନଗିରି,୯ା୩(ନୃସିଂହ ଚରଣ ମହାନ୍ତି): ମାଲକାନଗିରି ଜିଲାରେ କାହିଁ କେଉଁକାଳରୁ ପାଳନ ହୋଇଆସୁଛି ‘ବଡ଼ଯାତ୍ରା’। ପ୍ରତି ୨ ବର୍ଷରେ ଥରେ ପାଳନ ହେଉଥିବା ଏହି ଯାତ୍ରା ପ୍ରାୟ ୧ ମାସ ଧରି ବିଭିନ୍ନ ନୀତିକାନ୍ତିରେ ଆରମ୍ଭ ହୋଇଛି। ବଡ଼ଯାତ୍ରା ପାଇଁ ଆନ୍ଧ୍ରସ୍ଥିତ ତାଡ଼କାରେଉ କୁଣ୍ଡରେ ୩ ଠାକୁର କାନମରାଜୁ, ବାଲରାଜୁ, ପୋତରାଜୁ ଓ ମା’ ମୁତିୟାଲୁ ଆମ୍ମାଙ୍କୁ ସ୍ନାନ ପରେ ମାଲକାନଗିରି ଅଭିମୁଖେ ଅଣାଯାଇଛି। ବିମାନ ଯୋଗେ ଠାକୁରଙ୍କୁ ପ୍ରାୟ ୧୦୦ କି.ମି. ବାଟ ଭକ୍ତମାନେ ଆଣିବା ପରେ ଶନିବାର ଠାକୁର ମାଲକାନଗିରି ଜିଲା ସଦରସ୍ଥିତ କନ୍ୟାମାଝି ବନ୍ଧ ପୀଠରେ ପହଞ୍ଚି ଥିଲେ। ଫଳରେ ସକାଳୁ ଉତ୍ସବମୁଖର ହୋଇପଡ଼ିଛି ମାଲକାନଗିରି ସହର।
ତମସା ନଦୀକୂଳରୁ ଭକ୍ତମାନେ ଶୋଭାଯାତ୍ରାରେ କନ୍ୟାମାଝି ପୂଜାମଣ୍ଡପ ନିକଟରେ ଠାକୁରଙ୍କ ବିମାନ ପହଞ୍ଚାଇ ଥିଲେ। ପରେ ପାଟପୂଜାରୀ, ପୂଜାକମିଟି ସଭାପତି, ତହସିଲଦାର ଓ ଅନ୍ୟାନ୍ୟ ଅଧିକାରୀ, ପୂଜା କମିଟିର ସଦସ୍ୟମାନେ ରାଜଭୋଗ ଲଗାଇବା ପରେ ଠାକୁରଙ୍କୁ ମଣ୍ଡପକୁ ପ୍ରବେଶ କରାଇଥିଲେ।
କାଳିଶି ନୃତ୍ୟ ସାଙ୍ଗକୁ ଦିଶାରି, ପୂଜାରୀ ଓ ଗୁଣିଆ ଲାଠିଧାରୀଙ୍କ ନାଟବେଶ ଚମତ୍କାର ଦୃଶ୍ୟ ଦେଖିବାକୁ ମିଳିଥିଲା। ଏହି ଅବସରେ ପୋଲିସ ପ୍ରଶାସନ, ସତ୍ୟସାଇ ସେବା ସଂସ୍ଥା, ଶିବାନନ୍ଦ ଆଶ୍ରମ, ଜୟ ମାଲକାନଗିରି ସହ କେତକ ସ୍ବଚ୍ଛାସେବୀ ଅନୁଷ୍ଠାନ, ଯୁବକ ସଂଘ ପକ୍ଷରୁ ସମସ୍ତ ଭକ୍ତଙ୍କ ପ୍ରସାଦ ସେବନର ବ୍ୟବସ୍ଥା କରିଥିଲେ।
ଓଡିଶା, ଆନ୍ଦ୍ର, ତେଲଙ୍ଗାନା ଓ ଛତିଶଗଡରୁ ଭକ୍ତମାନେ ଏହି ପୂଜାରେ ସାମିଲ ହୋଇଥିଲେ। ଶନିବାର ରାତିରେ ବଡ ଠାକୁରଙ୍କ ବିମାନକୁ ଶୋଭାଯାତ୍ରାରେ କନ୍ୟାମାଝି ବନ୍ଧ ପାଖରୁ ମାଣ୍ଡିଆଭଟା ମଣ୍ଡପ ନିକଟକୁ ନିଆଯାଇ ରାତି ରହଣି ପରେ ରବିବାର ମାଣ୍ଡିଆ ଭଟ୍ଟାରେ ଭକ୍ତଙ୍କୁ ଦର୍ଶନ ଦେଉଥିଲେ।
ପରେ ସନ୍ଧ୍ୟାରେ ପଟୁଆରରେ ବାହାରି ସହର ମଧ୍ୟରେ ଥିବା ମା’ ମାଉଲି ମନ୍ଦିର ସିଂହଦ୍ୱାର ନିକଟରେ ମଙ୍ଗଳବାର ରାତି ୧୨ ଟା ପର୍ଯ୍ୟନ୍ତ ପୂଜା ପାଇ ମୂଖ୍ୟ ପୂଜାରୀଙ୍କ ସହ ସ୍ବସ୍ଥାନକୁ ଫେରିଯିବା କାର୍ଯକ୍ରମ ରହିଛି।
