ନୂଆଦିଲ୍ଲୀ: ନ୍ୟାଶନାଲ ଆସେଟ ରିକନ୍ଷ୍ଟ୍ରକଶନ କମ୍ପାନୀ ଲିମିଟେଡ(ଏନ୍ଏଆର୍ସିଏଲ୍) ବା ବ୍ୟାଡ୍ ବ୍ୟାଙ୍କ ଚଳିତବର୍ଷ ଜୁନଠାରୁ କାର୍ଯ୍ୟ ଆରମ୍ଭ କରିପାରେ। ଇଣ୍ଡିଆନ ବ୍ୟାଙ୍କ ଆସୋସିଏଶନର ସିଇଓ ସୁନୀଲ ମେହେଟ୍ଟା ଏ ସମ୍ପର୍କରେ ରବିବାର ସୂଚନା ଦେଇଛନ୍ତି। ଆର୍ଥତ୍କବର୍ଷ ୨୦୨୧-୨୨ ବଜେଟ ସମୟରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ବ୍ୟାଡ୍ ବ୍ୟାଙ୍କ ସ୍ଥାପନ ସମ୍ପର୍କରେ ଘୋଷଣା କରିଥିଲେ। ବ୍ୟାଙ୍କରେ ଫସି ରହିଥିବା ଋଣ ଏବଂ ଅନାଦାୟ ସମ୍ପତ୍ତିକୁ ନିଜ ପରିସରକୁ ନେଇ ଏହାର ସମାଧାନ କରୁଥିବା ଆର୍ଥତ୍କ ଅନୁଷ୍ଠାନକୁ ବ୍ୟାଡ୍ ବ୍ୟାଙ୍କ କୁହାଯାଇଥାଏ। ଏକ ନ୍ୟୁଜ ଏଜେନ୍ସି ସହ ସାକ୍ଷାତ୍କାର ବେଳେ ମେହେଟ୍ଟା କହିଛନ୍ତି, ବ୍ୟାଡ୍ ବ୍ୟାଙ୍କର ସ୍ଥାପନା ସରକାରୀ ଏବଂ ଘରୋଇ ବ୍ୟାଙ୍କର ସହଭାଗିତାରେ ହେବ। ଏହି ବ୍ୟାଙ୍କ ସ୍ଥାପନ କରିବା ଲାଗି ବିଭିନ୍ନ କାର୍ଯ୍ୟକ୍ରମ ଜାରି ରହିଛି। ଆସନ୍ତା ମାସରେ ଏହା କାର୍ଯ୍ୟ ଆରମ୍ଭ କରିବା ନେଇ ଆଶା ରହିଛି ବୋଲି ମେହେଟ୍ଟା କହିଛନ୍ତି।
ସାରା ଦେଶରେ ବ୍ୟାଙ୍କଗୁଡ଼ିକର ଏନ୍ପିଏକୁ ଏକତ୍ର କରିବା ବ୍ୟାଡ୍ ବ୍ୟାଙ୍କର ପ୍ରମୁଖ କାର୍ଯ୍ୟ ରହିବ ବୋଲି ସେ ସ୍ପଷ୍ଟ କରିଛନ୍ତି। ଏନ୍ପିଏ ଅସୁଲ କରିବା ଦିଗରେ ଏହି ବ୍ୟାଙ୍କ ବେଶ୍ ଯୋଗଦାନ ରଖିବ ବୋଲି ଆଶା କରାଯାଉଛି। ଏଭଳି ପ୍ରମୁଖ କାରଣ ଲାଗି ଏଥିରେ ବିଭିନ୍ନ ବ୍ୟାଙ୍କ ଯୋଡ଼ି ହେବେ। ବର୍ତ୍ତମାନ ବ୍ୟାଙ୍କଗୁଡ଼ିକ ଲାଗି ଅନାଦାୟ ସମ୍ପତ୍ତି ଏକ ପ୍ରମୁଖ ସମସ୍ୟା ଭାବେ ଉଭା ହୋଇଛି। ବ୍ୟାଙ୍କଗୁଡ଼ିକ ପକ୍ଷରୁ ଘୋଷଣା ହୋଇଥିବା ଏନ୍ପିଏ ସମ୍ପତ୍ତିକୁ ଏହି ବ୍ୟାଙ୍କ ଟେକ୍ ଓଭର କରିବ। ଏହି ସମ୍ପତ୍ତି କିଭଳି ବିକ୍ରି ହେବ ସେ ନେଇ ମଧ୍ୟ ବ୍ୟାଡ୍ ବ୍ୟାଙ୍କ ପଦକ୍ଷେପ ଘୋଷଣା କରିବ। ସେହିଭଳି ଅନ୍ୟ ଆସେଟ ରିକନ୍ଷ୍ଟ୍ରକଶନ କମ୍ପାନୀଗୁଡିକୁ ଏନ୍ପିଏ କ୍ରୟ କରିବା ଲାଗି ମଧ୍ୟ ଆମନ୍ତ୍ରଣ କରାଯିବ।
ଅର୍ଥମନ୍ତ୍ରୀ ନିର୍ମଳା ସୀତାରାମନ ଚଳିତବର୍ଷ ଫେବୃୟାରୀ ପହିଲାରେ ଦେଶର ଉତ୍କଟ ହୋଇଥିବା ଏନ୍ପିଏ ସମସ୍ୟା ସମାଧାନ ପାଇଁ ଏକ ବ୍ୟାଡ୍ ବ୍ୟାଙ୍କ ଗଠନ ସମ୍ପର୍କରେ ଘୋଷଣା କରିଥିଲେ। ଏହା ଆସେଟ ରିକନଷ୍ଟ୍ରକଶନ କମ୍ପାନୀ(ଏଆର୍ସି) ଏବଂ ଆସେଟ ମ୍ୟାନେଜମେଣ୍ଟ(ଏଏମ୍ସି) ଭଳି ସ୍ଥାପନା ହେବ। ବ୍ୟାଙ୍କିଙ୍ଗ କ୍ଷେତ୍ର ଏନ୍ପିଏକୁ ପ୍ରଫେଶନାଲ ଭାବେ ସମାଧାନ କରିବା ଦିଗରେ ଏହା କାର୍ଯ୍ୟ କରିବ। ଏନ୍ପିଏକୁ ଠିକ୍ ଭାବେ ସମାଧାନ କରିବା ଲାଗି ଏକ ବ୍ୟାଡ୍ ବ୍ୟାଙ୍କ ଦେଶ ମଧ୍ୟରେ ସ୍ଥାପନ କରାଯାଉ ବୋଲି ଆଇବିଏ ସରକାରଙ୍କୁ ପ୍ରସ୍ତାବ ଦେଇଥିଲା। ଅପରପକ୍ଷରେ ଠକେଇ ହୋଇଥିବା ଋଣକୁ ବ୍ୟାଡ୍ ବ୍ୟାଙ୍କକୁ ଦିଆଯିବନାହିଁ।
