କୋଲକାତା,୨୩ା୧୨: ବିଶ୍ୱଭାରତୀର ୬ ଜଣ ଗବେଷକଙ୍କ ଟିମ୍ ଏକ ନୂଆ ପ୍ରଜାତିର ବ୍ୟାକ୍ଟେରିଆ ଆବିଷ୍କାର କରିଛନ୍ତି। ଉଦ୍ଭିଦକୁ ପୋଷଣ ଦେଇ ବଡ଼ କରାଇବା ଗୁଣ ଏହି ବ୍ୟାକ୍ଟେରିଆର ରହିଛି। ନୋବେଲ ବିଜୟୀ ବିଶ୍ୱକବି ରବୀନ୍ଦ୍ରନାଥ ଟାଗୋରଙ୍କ ସମ୍ମାନରେ ବିଶ୍ୱଭାରତୀ ଉକ୍ତ ବ୍ୟାକ୍ଟେରିଆର ନାଁ ପାଣ୍ଟୋଆ ଟାଗୋରେଇ ରଖିଛି। ଟାଗୋର କୃଷିକୁ ବିକଶିତ କରି ଏକ ଉଚ୍ଚ ସ୍ତରରେ ପହଞ୍ଚାଇବାକୁ ଉଦ୍ୟମ କରୁଥିଲେ। ତେଣୁ ଏହି ଉପକାରୀ ବ୍ୟାକ୍ଟେରିଆକୁ ତାଙ୍କ ନାମରେ ନାମିତ କରିବା ଲାଗି ନିଷ୍ପତ୍ତି ନିଆଯାଇଥିବା ଉଦ୍ଭିଦ ବିଜ୍ଞାନ ବିଭାଗ ମାଇକ୍ରୋବାୟୋଲୋଜି ଲାବ୍ର ଆସିଷ୍ଟାଣ୍ଟ ପ୍ରଫେସର ବୋମ୍ବା ଡାମ୍ କହିଛନ୍ତି। ପ୍ରଥମ ଥର ପାଇଁ କୌଣସି ଜୀବନ୍ତ ବସ୍ତୁକୁ ବିଶ୍ୱକବିଙ୍କ ନାମରେ ନାମିତ କରାଯାଇଛି। ଡାମ୍ଙ୍କ ସହ ଗବେଷକ ଟିମ୍ରେ ରାଜୁ ବିଶ୍ୱାସ, ଅରିଜିତ୍ ମିଶ୍ରା, ସନ୍ଦିପ ଘୋଷ, ଅଭିନବ ଚକ୍ରବର୍ତ୍ତୀ ଏବଂ ପୂଜା ମୁଖାର୍ଜୀ ସାମିଲ ହୋଇଥିଲେ। ଭାରତୀୟ ପତ୍ରିକା ମାଇକ୍ରୋବାୟୋଲୋଜିରେ ଏହି ଗବେଷଣାତ୍ମକ ସନ୍ଦର୍ଭ ପ୍ରକାଶ ପାଇଛି।
ଡାମ୍ଙ୍କ ମତରେ କୃଷି ପାଇଁ ଅତ୍ୟଧିକ ରାସାୟନିକ ସାର ପ୍ରୟୋଗ ଯୋଗୁ ଜମିଗୁଡ଼ିକ ଧୀରେ ଧୀରେ ଅକାମୀ ହୋଇଯାଉଛି। ଫଳରେ ଚାଷୀମାନେ ଏବେ ଜୈବ କୃଷି ଏବଂ ଜୈବିକ ସାର ଆଡ଼କୁ ଢଳିଲେଣି। ଗବେଷକମାନେ ଝରିଆ କୋଇଲା ଖଣି ଅଞ୍ଚଳର ମାଟିରୁ ପାଇଥିବା ବ୍ୟାକ୍ଟେରିଆ କେବଳ ପୋଟାସିୟମକୁ ଦ୍ରବଣୀୟ କରୁନାହିଁ, ବରଂ ନାଇଟ୍ରୋଜେନର ଅଭାବକୁ ଭରଣା କରିବା ସହ ଫସ୍ଫରସ୍କୁ ଦ୍ରବଣୀୟ କରାଇପାରୁଛି। ଉକ୍ତ ବ୍ୟାକ୍ଟେରିଆର କେତେକ ଗୁଣ ଉଦ୍ଭିଦକୁ ବଢ଼ାଇପାରିବ। ତେଣୁ ଏହା ଏକ ନୂତନ ପ୍ରଜାତିର ‘ଉତ୍ତମ’ ବ୍ୟାକ୍ଟେରିଆ ବୋଲି ଅନୁଶୀଳନରୁ ଜଣାପଡ଼ିଥିଲା। ଗବେଷକମାନେ ଏହି ବ୍ୟାକ୍ଟେରିଆକୁ କୃଷକମାନଙ୍କ ଜରିଆରେ କୃଷିକାର୍ଯ୍ୟରେ ପ୍ରୟୋଗ କରିଛନ୍ତି। ସେମାନେ ଏହାର ଫଳାଫଳକୁ ନେଇ ବହୁତ ଖୁସି ବ୍ୟକ୍ତ କରିଛନ୍ତି। ଗବେଷକ ଟିମ୍ର କାର୍ଯ୍ୟକୁ ବିଶ୍ୱଭାରତୀର କାର୍ଯ୍ୟକାରୀ କୁଳପତି ସଞ୍ଜୟ କୁମାର ମଲ୍ଲିକ ଉଚ୍ଚ ପ୍ରଶଂସା କରିବା ସହ ସେମାନଙ୍କ କାର୍ଯ୍ୟ କୃଷି ଉପରେ ଗଭୀର ପ୍ରଭାବ ପକାଇବ ବୋଲି କହିଛନ୍ତି।
