ଅନୁଗୋଳ ଅଫିସ, ୨।୮: ପ୍ରତି ପ୍ରକୋଷ୍ଠରେ ଏସି, ଚକ୍ଚକ୍ ଆଲୁଅ। ଏଥିପାଇଁ ଖର୍ଚ୍ଚ ହେଉଛି ଲକ୍ଷ ଲକ୍ଷ ଟଙ୍କାର ବିଦ୍ୟୁତ୍ ଶକ୍ତି। ହେଲେ ଏ ବାବଦ ବିଲ୍ ପଇଠ କରୁନିି କାର୍ଯ୍ୟାଳୟ। ଫଳରେ ବକେୟା ବଢ଼ି ବଢ଼ି ଆସି ୩ କୋଟି ହେଲାଣି। ସାଧାରଣ ଉପଭୋକ୍ତା ଠିକ ସମୟରେ ବିଲ୍ ନ ଦେଲେ ସେମାନଙ୍କ ବିଦ୍ୟୁତ୍ ସଂଯୋଗ କାଟି ଦିଆଯାଉଥିବାବେଳେ ଅନୁଗୋଳ ସହରର ବିଭିନ୍ନ ସରକାରୀ ଅଫିସ୍ରେ ଏହାର ଓଲଟା ଚିତ୍ର ଦେଖିବାକୁ ମିଳିଛି। ସହରର ଅନେକ ସରକାରୀ କାର୍ଯ୍ୟାଳୟରେ ଅନାବଶ୍ୟକ ଭାବେ ଶୀତତାପ ନିୟନ୍ତ୍ରକ ଯନ୍ତ୍ର ମଧ୍ୟ ଲଗାଯାଇଛି। ଏଥିପାଇଁ ବିଲ୍ ଦେବାକୁ ପଡୁ ନ ଥିବାରୁ ମନଇଚ୍ଛା ବିଦ୍ୟୁତ୍ ବ୍ୟବହାର କରୁଛନ୍ତି ଅଧିକାରୀ। ଦେୟ ଆଦାୟ ପାଇଁ ପୂର୍ବରୁ ଥିବା ସେସୁ ବର୍ତ୍ତମାନର ଟାଟା ପାୱାର ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ(ଟିପିସିଓଡିଏଲ) କର୍ତ୍ତୃପକ୍ଷ ମଧ୍ୟ ଏଥିପାଇଁ ତତ୍ପରତା ଦେଖାଉ ନ ଥିବା ଅଭିଯୋଗ ହେଉଛି।
ସୂଚନା ଅନୁଯାୟୀ, ଅନୁଗୋଳର ବିଭିନ୍ନ ସରକାରୀ ପ୍ରତିଷ୍ଠାନ ଉପରେ ଗତ ଏପ୍ରିଲ ୩ ତାରିଖ ସୁଦ୍ଧା ମୋଟ ୩ କୋଟି ୫ ଲକ୍ଷ ୭୬ ହଜାର ୭୪୮ ଟଙ୍କା ବିଦ୍ୟୁତ ବିଲ୍ ଅନାଦାୟ ରହିଛି। ମୋଟ ୧୦୮୧ ସରକାରୀ ଉପଭୋକ୍ତଙ୍କ ଉପରେ ଏହି ବିଲ୍ ବାକି ରହିଛି। ଅନୁଗୋଳ ଗ୍ରାମ୍ୟ ଉନ୍ନୟନ(ଆରଡି) କାର୍ଯ୍ୟାଳୟ ଉପରେ ସର୍ବାଧିକ ୯୩ ଲକ୍ଷ ୭୨ ହଜାର ୩୯୬ ଟଙ୍କା ବାକି ରହିଥିବାବେଳେ ଗୃହ ଓ ନଗର ଉନ୍ନୟନ କାର୍ଯ୍ୟାଳୟ ଉପରେ ୫୬ ଲକ୍ଷ ୪୨ ହଜାର ୮୦୫, ସ୍କୁଲ ଓ ଗଣଶିକ୍ଷା କାର୍ଯ୍ୟାଳୟ ଉପରେ ୨୯ ଲକ୍ଷ ୫୦ ହଜାର ୨୪୬, ପଞ୍ଚାୟତ ବିଭାଗ ଉପରେ ୨୬ ଲକ୍ଷ ୨୬ ହଜାର ୪୭୮, ଉଚ୍ଚ ଶିକ୍ଷା ବିଭାଗ କାର୍ଯ୍ୟାଳୟ ଉପରେ ୨୧ ଲକ୍ଷ ୪୩ ହଜାର ୬୯୭, ସ୍ବାସ୍ଥ୍ୟ ଓ ପରିବାର କଲ୍ୟାଣ ଅଧୀନରେ ଥିବା ମେଡିକାଲ ଉପରେ ୨୧ଲକ୍ଷ ୧୪ ହଜାର ୪୫୦, ପୋଲିସ ବିଭାଗ ଉପରେ ୧୪ ଲକ୍ଷ ୧୪ ହଜାର ୨୧୯, ବିପର୍ଯ୍ୟୟ ଓ ପରିଚାଳନା କାର୍ଯ୍ୟାଳୟ ଉପରେ ୧୨ ଲକ୍ଷ ୫ ହଜାର ୧୬୪ ଟଙ୍କା ବାକି ରହିଛି। ଏତେ ଟଙ୍କା ବାକି ଥିଲେ ମଧ୍ୟ ବିଲ୍ ଆଦାୟ ପାଇଁ କୌଣସି ତତ୍ପରତା ପ୍ରକାଶ ପାଉନାହିଁ କିମ୍ବା ସରକାରୀ କାର୍ଯ୍ୟାଳୟ ବିଲ୍ ଦେବା ପାଇଁ ଆନ୍ତରିକତା ମଧ୍ୟ ଦେଖାଉନାହିଁ।
ଘଟଣା ସମ୍ପର୍କରେ ଟିପିସିଓଡିଏଲ ମ୍ୟାନେଜର ସୁବ୍ରତ ସାହୁଙ୍କୁ ପଚାରିବାରେ କହିଛନ୍ତି, ବିଭିନ୍ନ ବିଭାଗୀୟ କାର୍ଯ୍ୟାଳୟକୁ ଚିଠି ଲେଖାଯାଇଛି। ମାତ୍ର କୌଣସି ଅଫିସ ବିଲ୍ ପଇଠ ପାଇଁ ପଦକ୍ଷେପ ନେଉନାହାନ୍ତି। ବର୍ଷକୁ ଥରେ ମାର୍ଚ୍ଚ ମାସରେ କିଛି ବିଲ୍ ପ୍ରଦାନ କରୁଛନ୍ତି। ନିକଟରେ ଅନୁଗୋଳ ପୌରପାଳିକା ସର୍ବାଧିକ ବକେୟା ବିଲ୍ ପ୍ରଦାନ କରିଛି। ଏହି ସରକାରୀ କାର୍ଯ୍ୟାଳୟଗୁଡିକରେ ଥିବା ବକେୟା ବିଲ୍ ସମ୍ପର୍କରେ ସଂସ୍ଥା କ’ଣ ପଦକ୍ଷେପ ଗ୍ରହଣ କରିବ କିଛି ସ୍ପଷ୍ଟ ହୋଇନାହିଁ। ଆଗକୁ ଯେଉଁ ନିର୍ଦ୍ଦେଶ ଆସିବ ତାକୁ ବିଭିନ୍ନ ସରକାରୀ କାର୍ଯ୍ୟାଳୟକୁ ଚିଠି କରି ଦିଆଯିବ ବୋଲି ମ୍ୟାନେଜର ସାହୁ କହିଛନ୍ତି।
