ମଥୁରାନଗରୀ,୬।୧(ପ୍ରେମାନନ୍ଦ ଖମାରୀ):ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ଶୁକ୍ରବାର ସନ୍ଧ୍ୟାରୁ ଆରମ୍ଭ ହୋଇଛି। ଦୀର୍ଘ ୧୧ଦିନ ବ୍ୟାପୀ ଏହି ମହୋତ୍ସବ ଚାଲିବ। ତେବେ ଏହି ମହୋତ୍ସବ ଚାଲିଥିବା ବେଳେ ଜିଲା ଶିକ୍ଷା ବିଭାଗ ପକ୍ଷରୁ ଆଉ ଏକ ୩ଦିନିଆ ବାଲ୍ ଧନୁଯାତ୍ରା ହେବ। ଆସନ୍ତା ୯ତାରିଖରୁ ୧୧ତାରିଖ ପର୍ଯ୍ୟନ୍ତ ଏହା ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଅନୁଷ୍ଠିତ ହେବ। ଏଥିରେ ଉକ୍ତ ବିଦ୍ୟାଳୟର ୩୨ ଛାତ୍ରୀ ବିଭିନ୍ନ ଚରିତ୍ରରେ ଅଭିନୟ କରିବେ। ସେମାନଙ୍କ ମଧ୍ୟରୁ ଛାତ୍ରୀ ବର୍ଷା ପଟେଲ କଂସ ଭୂମିକାରେ ଅଭିନୟ କରିବେ। ସେହିପରି ଧନୁଯାତ୍ରା ଭଳି ଉଗ୍ରସେନ, ଶ୍ରୀକୃଷ୍ଣ, ବଳରାମ, ଶ୍ରୀରାଧା ଆଦି ଚରିତ୍ର ଗୁଡ଼ିକରେ ମଧ୍ୟ ଉକ୍ତ ବିଦ୍ୟାଳୟର ଛାତ୍ରୀ ଅଭିନୟ କରିବେ। ଏହାସହିତ ଧନୁଯାତ୍ରା ଭଳି ଏଠାରେ ମଧ୍ୟ ରଙ୍ଗସଭା ଦୃଶ୍ୟାଭିନୟ ଅଭିନୀତ ହେବ ଏବଂ ଏଥିରେ ଜିଲା ଶିକ୍ଷା ବିଭାଗର ବିଭିନ୍ନ ପଦପଦବୀରେ ରହିଥିବା ୧୬ ଅଧିକାରୀ ଉପସ୍ଥିତ ରହିବେ।
ଏଥିପାଇଁ ବରଗଡ଼ ସରକାରୀ ବାଳିକା ଉଚ୍ଚ ବିଦ୍ୟାଳୟରେ ଛାତ୍ରୀମାନଙ୍କ ରିହର୍ସାଲ ଆରମ୍ଭ ହୋଇଯାଇଛି। ନାଟ୍ୟକାର ନକୁଳ ବାଦୀ ଏହାର ନିର୍ଦ୍ଦେଶନା ଦେଉଛନ୍ତି। ସେହିପରି ନୃତ୍ୟଗୁରୁ ଶଙ୍କର ପଟ୍ଟନାୟକ ନୃତ୍ୟ, ସଙ୍ଗୀତ ନିର୍ଦ୍ଦେଶନା ଦେଉଛନ୍ତି। କଂସ ଭୂମିକାରେ ଅଭିନୟ ପାଇଁ ମନୋନୀତ ଛାତ୍ରୀ ବର୍ଷା କହିଛନ୍ତି, ଦୃଶ୍ୟାଭିନୟ ପାଇଁ ସାର୍ମାନେ ଭଲ ଶିକ୍ଷା ଦେଉଛନ୍ତି। ଏହି କାର୍ଯ୍ୟକ୍ରମରେ କଂସ ଭୂମିକାରେ ଅଭିନୟ କରିବାର ସୁଯୋଗ ପାଇଥିବା ଯୋଗୁ ସେ ଗର୍ବିତ। ସେହିପରି ନିର୍ଦ୍ଦେଶକ ତଥା ନାଟ୍ୟକାର ବାଦୀ କହିଛନ୍ତି, ଜିଲା ଶିକ୍ଷାଧିକାରୀଙ୍କ ନିର୍ଦ୍ଦେଶକ୍ରମେ ଏହି କାର୍ଯ୍ୟକ୍ରମ କରାଯାଉଛି। ଛାତ୍ରୀମାନଙ୍କ ମଧ୍ୟରେ ଥିବା ଅନ୍ତର୍ନିହିତ ପ୍ରତିଭାର ପରିପ୍ରକାଶ ସହିତ ବାଲ୍ ଧନୁଯାତ୍ରା ମାଧ୍ୟମରେ ବହୁକିଛି ଶିକ୍ଷଣୀୟ ବାର୍ତ୍ତା ଦେବା ଉକ୍ତ କାର୍ଯ୍ୟକ୍ରମର ମୂଳଲକ୍ଷ୍ୟ ରହିଛି। ସେହିପରି ନୃତ୍ୟଗୁରୁ ପଟ୍ଟନାୟକ କହିଛନ୍ତି, ଛାତ୍ରୀମାନଙ୍କ ମଧ୍ୟରେ ଅନ୍ତର୍ନିହିତ ଗୁଣାବଳୀ ଭରି ରହିଛି। ତାର ପରିପ୍ରକାଶ କରିବା ପାଇଁ ଜିଲା ଶିକ୍ଷା ବିଭାଗର ଏଭଳି ଉଦ୍ୟମ ସ୍ବାଗତଯୋଗ୍ୟ ପଦକ୍ଷେପ ବୋଲି ପଟ୍ଟନାୟକ କହିଛନ୍ତି।
