ସିକଲ୍ ସେଲ୍ ରୋଗ ଏକ ବେମାରୀ ସମୂହ, ଯାହା ଆମର ଲୋହିତ ରକ୍ତ କଣିକାକୁ ପ୍ରଭାବିତ କରିଥାଏ। ଏପରି ସ୍ବାସ୍ଥ୍ୟ ସମସ୍ୟା ଦେଖାଦେଲେ ତାହାର ଚିକିତ୍ସା କରାଇ ନେବା ଜରୁରୀ। ସିକଲ୍ ସେଲ୍ ରୋଗ ବିଷୟରେ ଜନସାଧାରଣକୁ ସଚେତନ କରିବା ଲାଗି ପ୍ରତିବର୍ଷ ଜୁନ୍ ୧୯କୁ ‘ବିଶ୍ୱ ସିକଲ୍ ସେଲ୍ ରୋଗ ଦିବସ’ ଭାବରେ ପାଳନ କରାଯାଇଥାଏ। ଚଳିତ ବର୍ଷ ଏହି ଦିବସର ସ୍ଲୋଗାନ ହେଉଛି- ‘ଅବରୋଧକୁ ଛିନ୍ନ କରି ଆଶାର ସଞ୍ଚାର’ ଅର୍ଥାତ୍ ଏହି ରୋଗକୁ ପ୍ରଥମରୁ ପ୍ରତିହତ କରି ଏକ ସୁସ୍ଥ ଜୀବନଯାପନ କରିପାରିବା ପାଇଁ ଉଦ୍ୟମ। ସିକଲ୍ ସେଲ୍ ରୋଗ ବିଷୟରେ ବରିଷ୍ଠ ଚିକିତ୍ସକ ତଥା ପରାମର୍ଶଦାତା ଡା. ରାମଚନ୍ଦ୍ର ରାଉତ କହନ୍ତି, ”ସିକଲ୍ ସେଲ୍ ରୋଗରେ ଲୋହିତ ରକ୍ତକଣିକା ପ୍ରଭାବିତ ହୋଇଥାଏ। ଏହାଦ୍ୱାରା ଏହି ରକ୍ତକଣିକା ଗୋଲ୍ ଚେପ୍ଟା ପରି ଦେଖାଯିବା ବଦଳରେ ଦାଆ ପରି ବକ୍ର ଓ ଅଣଚଉଡ଼ା ହୋଇଯାଏ। ଏହା ଏକ ଗୁଣସୂତ୍ରଗତ(ଜିନ୍) ରୋଗ। ମାତାପିତାଙ୍କଠାରୁ ଶିଶୁମାନଙ୍କୁ ଏହା ଆସିଥାଏ। ଏହି ରୋଗରେ ଆକ୍ରାନ୍ତ ହେଲେ ଶରୀରରେ ଯନ୍ତ୍ରଣା, ଷ୍ଟ୍ରୋକ୍, ଛାତି ଯନ୍ତ୍ରଣା, ହଠାତ୍ ଅମ୍ଳତ୍ୱ, ଅସ୍ଥିମଜ୍ଜା ନଷ୍ଟ ଏବଂ ଦୀର୍ଘ ସମୟ ଧରି ଯନ୍ତ୍ରଣାଦାୟକ ଲିଙ୍ଗ ଦୃଢ଼ତା ଇତ୍ୟାଦି ପରିଲକ୍ଷିତ ହୁଏ। ଏହାଦ୍ୱାରା ଶରୀରର ଅଙ୍ଗମାନଙ୍କର କ୍ଷତି ଓ କାର୍ଯ୍ୟହୀନତା ସହିତ ଯକୃତ(ଲିଭର), କିଡ୍ନୀ, ଫୁସ୍ଫୁସ, ହୃଦ୍ଯନ୍ତ୍ର ଓ ପ୍ଲିହା ଇତ୍ୟାଦି ନଷ୍ଟ ହୋଇଯାଏ। ଫଳରେ ଆକ୍ରାନ୍ତ ବ୍ୟକ୍ତି ମୃତ୍ୟୁମୁଖରେ ପଡ଼ିଥାଏ। ତେଣୁ ଏହି ରୋଗ ବିଷୟରେ ସମସ୍ତେ ସଚେତନ ରହିବା ନିହାତି ଜରୁରୀ। ଏଥିପାଇଁ ମିଳିତ ଜାତିସଂଘ ଦ୍ୱାରା ସ୍ଥିରୀକୃତ ‘ବିଶ୍ୱ ସିକଲ୍ ସେଲ୍ ରୋଗ ଦିବସ’ ୨୦୦୮ରୁ ପ୍ରତିବର୍ଷ ଜୁନ୍ ୧୯ରେ ପାଳନ ହୋଇ ଆସୁଅଛି। ଏଥିପାଇଁ ରୋଗର ଶୃଙ୍ଖଳ ଛିନ୍ନ କରିବାକୁ ହେବ। ଜନ୍ମ ସମୟରେ ରକ୍ତ ପରୀକ୍ଷା କରି ଏହି ରୋଗ ଅଛି କି ନାହିଁ ଜାଣିନେବା ଜରୁରୀ। ସବୁ ନବଜାତ ଶିଶୁଙ୍କର ଜନ୍ମର ୨୪-୪୮ ଘଣ୍ଟା ମଧ୍ୟରେ ଏଥିପାଇଁ ରକ୍ତ ପରୀକ୍ଷା କରାଇ ନେବା ଦରକାର। ସମ୍ପୂର୍ଣ୍ଣ ସ୍ଥିର ନିଶ୍ଚିତ ପାଇଁ ଅଧିକ ରକ୍ତ ପରୀକ୍ଷା କରାଇ ନିଅନ୍ତୁ। ଏହି ରକ୍ତ ପରୀକ୍ଷାସମୂହ ହେଲା- ସିବିସି (CBC), ହିମୋଗ୍ଲୋବିନ୍-ରକ୍ତହୀନତାର ମାତ୍ରା, ଏମ୍ଭିସି, ହିମୋଗ୍ଲୋବିନ୍ ଇଲେକ୍ଟ୍ରୋଫୋରେସିସ୍, ଏଚ୍ପିଏଲ୍ସି ଏବଂ ଡିଏନ୍ଏ। ପ୍ରାରମ୍ଭରୁ ସଚେତନ ରହିଲେ ଭବିଷ୍ୟତରେ ଏଭଳି ଜଟିଳ ସ୍ବାସ୍ଥ୍ୟ ସମସ୍ୟାକୁ ଏଡ଼ାଇ ଦେଇହେବ।“
