ଦାରିଙ୍ଗବାଡ଼ି,୯ା୮(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି କୁଇକୁଳ ସମିତି ପକ୍ଷରୁ ବିଶ୍ୱ ଆଦିବାସୀ ଦିବସକୁ ଧୂମ୍ଧାମରେ ପାଳନ କରାଯାଇଛି। ସମିତିର ସଭାପତି କରୁଣାକର ପ୍ରଧାନଙ୍କ ନେତୃତ୍ୱରେ ଏହି ଦିବସ ପାଳନ ଅବସରରେ ଆଦିବାସୀଙ୍କ ସମସ୍ୟାର ସମାଧାନ ସମ୍ପର୍କରେ ଆଲୋଚନା କରାଯାଇଥିବା ବେଳେ ଏହି ଦିବସର ମହତ୍ତ୍ୱ ସମ୍ପର୍କରେ କୁହାଯାଇଥିଲା। ଏଥିସହ ଆଦିବାସୀଙ୍କ ପାରମ୍ପରିକ ଚାଷ ଚଳଣି, ସଂସ୍କୃତି, ପୋଷାକ, ଅଳଙ୍କାର, ଖାଦ୍ୟ ଆଦି ସମ୍ପର୍କରେ ଆଲୋଚନା କରାଯାଇଥିଲା। ଯେଉଁ ସବୁ ପାରମ୍ପରିକ ଚଳଣି ଆଦିରେ ପରିବର୍ତ୍ତନ ଆସୁଛି ତାକୁ ପୁନଃରୁଦ୍ଧାର ପାଇଁ ଆଲୋଚନା ହୋଇଥିଲା।
ସେହିପରି ଆଦିବାସୀଙ୍କ ଅଧିକାର, ଜଙ୍ଗଲ ଜମି ପାରମ୍ପରିକ ଚାଷ ଆଦି ଆଲୋଚନା କରାଯାଇଥିଲା। ଏହି ପ୍ରରିପ୍ରେକ୍ଷୀରେ ପାରମ୍ପରିକ ବାଦ୍ୟଯନ୍ତ୍ରରେ ଏକ ବିରାଟ ଶୋଭାଯାତ୍ରାରେ ବାହାରି ଦାରିଙ୍ଗବାଡ଼ି ସହର ପରିକ୍ରମା କରି ସାରିଙ୍ଗିଇର୍ପି ପଡ଼ିଆଠାରେ ପହଞ୍ଚି ସେଠାରେ ବୈଠକ ଅନୁଷ୍ଠିତ ହୋଇଥିଲା।
କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ କୁଇକୁଳ ସମିତିର ସମ୍ପାଦକ ଶୁକଦେବ ପ୍ରଧାନ, ଉପସଭାପତି ପୁରେ ପ୍ରଧାନ, କୋଷାଧ୍ୟକ୍ଷ ରମାକାନ୍ତ ପ୍ରଧାନ, ଶରତ ଚନ୍ଦ୍ର ପ୍ରଧାନ, ଜ୍ୟୋତିରାଜ ପ୍ରଧାନ, ସୁନୀଲ ପ୍ରଧାନ, ଆବ୍ରାହମ ପ୍ରଧାନ, ଅଜୟ ଚନ୍ଦ୍ର ପଡ୍ରା, କୁଶନାଥ ପ୍ରଧାନଙ୍କ ସମେତ ବିଭନ୍ନ ପଞ୍ଚାୟତର ଶତାଧିକ ଆଦିବାସୀ ଭଉଣୀ ଭାଇ ଯୋଗଦେଇଥିଲେ। ଏହି ଦିବସ ପାଇଁ ଅଞ୍ଚଳରେ ବସବାସ କରୁଥିବା ଆଦିବାସୀଙ୍କ ମଧ୍ୟରେ ଉତ୍ସାହ ଦେଖାଯାଇଥିଲା।
