ସାଉଥାମ୍ପଟନ,୨୮।୮ (ପି.ଟି.) : କୋଭିଡ୍-୧୯ ମହାମାରୀକୁ ଦୃଷ୍ଟିରେ ରଖି ପୂର୍ବରୁ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ବଲରେ ଲାଳ ବ୍ୟବହାର କରିବା ନେଇ ବାରଣ କରିଥିଲା। କିନ୍ତୁ କ୍ରିକେଟ ଅଷ୍ଟ୍ରେଲିଆ ଏହି ଦୃଷ୍ଟିକୋଣରୁ ଦେଖିବାକୁ ଗଲେ ଆଉ ଗୋଟିଏ ପାଦ ଆଗେଇ ଯାଇଛି। ବଲ୍ରେ ଝାଳ ଲଗାଇବା ନେଇ ଆଇସିସି ବାରଣ କରି ନ ଥିଲା। କିନ୍ତୁ କ୍ରିକେଟ ଅଷ୍ଟ୍ରେଲିଆ ଝାଳ ବ୍ୟବହାର ନ କରିବାକୁ ନିଜ ଖେଳାଳିମାନଙ୍କୁ ନିର୍ଦ୍ଦେଶ ଦେଇଛି। ସୀମିତ ଓଭର ସିରିଜ ଖେଳିବାକୁ ଅଷ୍ଟ୍ରେଲିଆ ଇଂଲଣ୍ଡ ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହି ଗସ୍ତରେ ମୁଣ୍ଡ, ମୁହଁ ଓ ବେକର ଝାଳ ବ୍ୟବହାର କରିବା ନେଇ ଅଷ୍ଟ୍ରେଲିଆ ପ୍ରତିବନ୍ଧ ଲଗାଇଛି।
କରୋନା ଭାଇରସ୍ ସଂକ୍ରମଣର ସମ୍ଭାବନାକୁ କମାଇବା ପାଇଁ କ୍ରିକେଟ ଅଷ୍ଟ୍ରେଲିଆ ଏହି ନିଷ୍ପତ୍ତି ନେଇଛି। ସ୍ବାସ୍ଥ୍ୟଗତ ନିର୍ଦ୍ଦେଶନାମାକୁ ପାଳନ କରି ବୋର୍ଡ ଖେଳାଳିମାନଙ୍କୁ ମୁହଁ, ନାକରୁ ଝାଳ ବ୍ୟବହାର ନ କରିବାକୁ କହିଛି। ଫଳରେ ଖେଳାଳିମାନଙ୍କ ପାଇଁ ସାଉଥାମ୍ପଟନରେ ସେପ୍ଟେମ୍ବର ୪ରୁ ଆରମ୍ଭ ହେବାକୁ ଯାଉଥିବା ସୀମିତ ଓଭର ସିରିଜରେ ପିଠି କିମ୍ବା ପେଟରୁ ଝାଳ ବ୍ୟବହାର କରିବାର ବିକଳ୍ପ ରହିବ।
ସୀମିତ ଓଭର ଫର୍ମାଟରେ ଏହି ନୂଆ ନିୟମ ସେତେଟା ପ୍ରଭାବ ପକାଇବ ନାହିଁ ବୋଲି ଅଷ୍ଟ୍ରେଲିଆ ଦ୍ରୁତ ବୋଲର ମିଚେଲ ଷ୍ଟାର୍କ କହିଛନ୍ତି। ତେବେ ଟେଷ୍ଟ ଫର୍ମାଟ୍ରେ ଏହାର ପ୍ରଭାବ ନିଶ୍ଚିତ ଭାବେ ରହିବ। ଗତ ପାକିସ୍ତାନ ବିପକ୍ଷ ଟେଷ୍ଟ ସିରିଜରେ ଇଂଲଣ୍ଡ ଖେଳାଳିମାନେ ପିଠି ଓ ମଥାରୁ ଝାଳ ବ୍ୟବହାର କରୁଥିବା ଲକ୍ଷ୍ୟ କରାଯାଇଥିଲା। ତେବେ ଟେଷ୍ଟ ସିରିଜ ଖେଳିବା ପୂର୍ବରୁ ଏହି କ୍ରିକେଟ ଅଷ୍ଟ୍ରେଲିଆର ଏହି ନୂଆ ନିୟମ ନେଇ ଆଲୋଚନା ହେବ ବୋଲି ଷ୍ଟାର୍କ କହିଛନ୍ତି।
