ମେଲବୋର୍ନ,୨୫।୧: ଅଷ୍ଟ୍ରେଲିଆ କ୍ରିକେଟ ଦଳ ତା’ର ନିୟମିତ ଖେଳାଳିଙ୍କ ସହ ପାକିସ୍ତାନ ଗସ୍ତ କରିବାକୁ ଯାଉଛି। ଏପର୍ଯ୍ୟନ୍ତ ଅଷ୍ଟ୍ରେଲିଆ ଦଳର କୌଣସି ଖେଳାଳି ପାକିସ୍ତାନ ଯିବା ପାଇଁ ଅନିଚ୍ଛା ପ୍ରକାଶ କରି ନାହାନ୍ତି। ସୁରକ୍ଷା ଗତ କାରଣରୁ ଏକ ଦଶନ୍ଧିରୁ ଊର୍ଦ୍ଧ୍ୱ ସମୟ ହେଲା କୌଣସି ବଡ଼ କ୍ରିକେଟିଂ ଦେଶ ପାକିସ୍ତାନକୁ ଗସ୍ତ କରିବାକୁ ଇଚ୍ଛା ପ୍ରକଟ କରୁ ନାହାନ୍ତି।
୧୯୯୬ରେ ଅନ୍ତିମ ଥର ଆଇସିସି ଇଭେଣ୍ଟ ଆୟୋଜନ କରିଥିଲା ପାକିସ୍ତାନ। ସେତେବେଳେ ଶ୍ରୀଲଙ୍କା ସହ ମିଶି ପାକିସ୍ତାନ ବିଶ୍ୱକପ୍ ଆୟୋଜନ କରିଥିଲା। ୨୦୦୯ରେ ଶ୍ରୀଲଙ୍କା କ୍ରିକେଟ ଦଳର ବସ ଉପରେ ଆତଙ୍କବାଦୀ ଆକ୍ରମଣ ପରଠାରୁ ୨୦୧୯ ପର୍ଯ୍ୟନ୍ତ ଦେଶରେ ଟେଷ୍ଟ କ୍ରିକେଟ ଦୂରେଇ ଯାଇଥିଲା।
ଗତ ବର୍ଷ ଟି୨୦ ବିଶ୍ୱକପ୍ ପୂର୍ବରୁ ନ୍ୟୁଜିଲାଣ୍ଡ ଓ ଇଂଲଣ୍ଡ ସୁରକ୍ଷା ଗତ କାରଣ ଦର୍ଶାଇ ପାକିସ୍ତାନ ଗସ୍ତରୁ ଓହରି ଯାଇଥିଲେ। କିନ୍ତୁ ଅଷ୍ଟ୍ରେଲିଆ ଦଳର ଗସ୍ତ ଏବେ ଟ୍ରାକରେ ଥିବା ଭଳି ଅନୁଭବ ହେଉଛି। ଅଷ୍ଟ୍ରେଲିଆ କ୍ରିକେଟ(ସିଏ)ର ଜାତୀୟ ଚୟନକର୍ତ୍ତା ଜର୍ଜ ବେଲି ସୁରକ୍ଷା ବ୍ୟବସ୍ଥାକୁ ପ୍ରଶଂସା କରିଛନ୍ତି।
“ସିଏ ପାକିସ୍ତାନ ଗସ୍ତ ଉପରେ ଏବେ ଛୋଟ ଛୋଟ କାମ କରୁଛି। ଏସବୁ ଶେଷ ହେଲା ପରେ ଗସ୍ତ ଲାଗି ଦଳ ଘୋଷଣା କରାଯିବ। ଏପର୍ଯ୍ୟନ୍ତ ସବୁ କିଛି ଠିକ୍ ଚାଲିଛି” ବୋଲି ବେଲି କହିଛନ୍ତି। ଅନ୍ତିମ ଥର ୧୯୯୮ରେ ମାର୍କ ଟେଲରଙ୍କ ନେତୃତ୍ୱରେ ଅଷ୍ଟ୍ରେଲିଆ ଦଳ ପାକିସ୍ତାନ ଗସ୍ତ କରିଥିଲା।
