ଅନୁଗୋଳ ଅଫିସ, ୨୯ା୯: ଏଣିକି ସହରରେ ଆଉ ଅଳିଆ ପଡ଼ିବ ନାହିଁ କି ଟ୍ରାଫିକ୍ ସମସ୍ୟାରେ ଲୋକମାନେ ଦହଗଞ୍ଜ ହେବେ ନାହିଁ। ସେହିଭଳି ଅପରାଧୀମାନେ ମଧ୍ୟ ଅପରାଧ ଘଟାଇବାକୁ ଭୟ କରିବେ। ଏ ନେଇ ଅନୁଗୋଳ ପୌରପାଳିକା ପକ୍ଷରୁ ସିସିଟିଭି ସର୍ଭିଲାନ୍ସ ବ୍ୟବସ୍ଥା କରାଯାଉଛି। ଇତିମଧ୍ୟରେ ଅନୁଗୋଳର ହେଲଥ୍ କରିଡରରେ ପାଖାପାଖି ୩୦ଟି କ୍ୟାମେରା ଖଞ୍ଜା ସରିଲାଣି। ସହରର ବିଭିନ୍ନ ସ୍ଥାନରେ ଏଭଳି ୧୦୦ରୁ ଊର୍ଦ୍ଧ୍ୱ କ୍ୟାମେରା ଲଗାଯିବହେବ ବୋଲି ପୌର ନିର୍ବାହୀ ଅଧିକାରୀ ସୂଚନା ଦେଇଛନ୍ତି।
ଅନୁଗୋଳ ସହରରେ ବିଭିନ୍ନ ସମୟରେ ଅପରାଧିକ କାର୍ଯ୍ୟକଳାପଠାରୁ ଆରମ୍ଭ କରି ଗାଡ଼ିମୋଟର ଜାମ ହେଉଥିଲା। ଏଥିସହ ବ୍ୟବସାୟୀ ପ୍ରତିଷ୍ଠାନଗୁଡ଼ିକ ମନ ଇଚ୍ଛା ଅଳିଆ ଆବର୍ଜନା ରାସ୍ତାରେ ଫିଙ୍ଗିଦେଇ ଚାଲିଯାଉଥିଲେ। ସହରରେ ବିଭିନ୍ନ ନିର୍ମାଣ ସମୟରେ ମଧ୍ୟ ଲୋକମାନେ ମନଇଚ୍ଛା ବିଭିନ୍ନ ସାମଗ୍ରୀ ରାସ୍ତାରେ ପକାଇ ଦେଉଥିଲେ। ଫଳରେ ଜନସାଧାରଣ ଯାତାୟାତରେ ନାହିଁ ନ ଥିବା ସମସ୍ୟା ସମ୍ମୁଖୀନ ହେଉଥିଲେ। ଏସବୁକୁ ଦୃଷ୍ଟିରେ ରଖି ସହରରେ ସିସିଟିଭି ସର୍ଭିଲାନ୍ସ ବ୍ୟବସ୍ଥା କରାଯାଇଛି। ଏହା ପ୍ରାଥମିକ ପର୍ଯ୍ୟାୟକ୍ରମେ ଅନୁଗୋଳର ହେଲଥ୍ କରିଡର ଅଞ୍ଚଳରେ କାର୍ଯ୍ୟକାରୀ ହୋଇଛି। ଏହାପରେ ବ୍ୟବସାୟିକ ଅନୁଷ୍ଠାନ ଅଞ୍ଚଳରେ ସିସିଟିଭି ଖଞ୍ଜା ହେବ। ପରେ ସହରର ବିଭିନ୍ନ ସ୍ଥାନରେ ଏହାକୁ ଲଗାଯିବ। ଏହି ସିସିଟିଭି ସର୍ଭିଲାନ୍ସର କଣ୍ଟ୍ରୋଲ ରୁମ୍ ଅନୁଗୋଳ ପୌର କାର୍ଯ୍ୟାଳୟରେ ରହିବ। ସହରର କେଉଁ ଅଞ୍ଚଳରେ କ’ଣ କରାଯାଉଛି ଏବଂ କେଉଁଠାରେ କ’ଣ ସମସ୍ୟା ରହିଛି ତାହା ସିଧାସଳଖ ଭାବେ ପୌର କାର୍ଯ୍ୟାଳୟରେ ଜଣାପଡ଼ିବ। ଏଭଳି କି ସହରକୁ ଆବର୍ଜନା କଲେ ଘରୋଇ ଲୋକ କିମ୍ବା ବ୍ୟବସାୟିକ ଅନୁଷ୍ଠାନକୁ ଜରିମାନା ପାଇଁ ନୋଟିସ୍ ପ୍ରଦାନ କରାଯିବ ବୋଲି ସୂଚନା ପ୍ରଦାନ କରାଯାଇଛି।
